ޓެރަރިސްޓް ޖަމަޢާތެއްކަމަށްވާ އިސްލާކިމް ސްޓޭޓް ނުވަތަ އައި.އެސް ޖަމާޢަތާ ގާތްގުޅުމެއް އޮންނަ ދިވެއްސަކު ހައްޔަރުކޮށްފިއެވެ.
މިކަން ހާމަކުރައްވާ ކޮމިޝަނަރ އޮފް ޕޮލިސް މުޙައްމަދު ޙަމީދު ކުރެއްވި ޓުވީޓެއްގައި ވިދާޅުވީ، އައި.އެސް ޖަމާޢަތާގުޅުން އޮންނަ މި މީހާ ހައްޔަރުކޮށްފައިވަނީ ދިވެހި ފުލުހުންނާއި، އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަން އެފް.ބީ.އައި އަދި ޔޫރަޕިއަން ޔޫނިއަންގެ ދެ ޤައުމެއްގެ ކަމާގުޅުންހުރި އިދާރާތައް ހިންގި އޮޕަރޭޝަނެއްގެ ތެރެއިން ކަމަށެވެ.
In a joint operation involving the @FBI and authorities from two European Union nations, @PoliceMv arrested a 30 year old Maldivian man in Male’ on 6th Jan 2022. He is alleged of being a prominent operative associated with the proscribed terrorist organisation “Islamic State”.
— Mohamed Hameed (@M_Hameedh) February 23, 2022
މި އޮޕަރޭޝަންގެ ތެރެއިން ފުލުހުން ހައްޔަރުކޮށްފައިވަނީ އުމުރުން 30 އަހަރުގެ ދިވެހި ފިރިހެނެކެވެ. އެނާ ހައްޔަރުކޮށްފައިވަނީ މިދިޔަ މަހުގެ 6ވަނަ ދުވަހު މާލެއިންނެވެ.
ސީޕީ ވިދާޅުވީ، މި މައްސަލައިގައި ހައްޔުކުރި މީހާއަކީ ހައްދުފަހަނައަޅާ ދިއުމާއި ހަރުކަށި ފިކުރުތައް ފެތުރުމާއި އަދި ވަކިން ޚާއްސަކޮށް ޔޫރަޕްގެ ބިމުގައި ޓެރަރިޒަމްގެ އަމަލުތައް ހިންގުމަށް ގޮވާލުމާއި ޔޫރަޕް ޤައުމުތަކުގެ ވެރިންނަށް ގެއްލުން ދިނުމަށް އެކިކަހަލަ ކެމްޕޭންތައް ހިންގާ މީހެއްކަމަށެވެ. އަދި 2015 ވަނަ އަހަރުން ފެށިގެން އޭނާ ރާއްޖޭގައި ހުރެގެން މި ހަރަކާތް ހިންގާކަން ފާހަގަކުރެވޭކަމަށެވެ.
ފުލުހުންނާއި އެފް.ބީ.އައި އަދި ޔޫރަޕިއަން ޔޫނިއަންގެ ދެ އިދާރާއަކާ ގުޅިގެން މި މައްސަލައަކީ ޓެރަރިޒަމްގެ ބޮޑު މައްސަލައެއްގެ ގޮތުގައި މިހާރު ތަޙްޤީޤުކުރަމުންދާކަމަށް ސީޕީ ވިދާޅުވިއެވެ. އަދި މިކަމާގުޅޭ އިތުރު ތަފްޞީލު ވަރަށް އަވަހަށް ހާމަކުރައްވާނެކަމަށްވެސް ސީޕީ ވިދާޅުވިއެވެ.