އިންގްލިޝް ޕްރިމިއަރ ލީގުގައި ޓޮޓްނަމް ހޮޓްސްޕަރ އާއި އެންމެފަހުގެ ޗެމްޕިއަން މެންޗެސްޓަރ ސިޓީ ބައްދަލުކުރިމެޗް ސްޕަރސްއިން ކާމިޔާބުކޮށްފިއެވެ. ސިޓީގެ ދަނޑުގައި ކުޅުނު މިމެޗް ސްޕަރސްއިން ކާމިޔާބުކުރީ 3 ލަނޑު 2 ލަނޑުންނެވެ.
ސިޓީއިން މެޗް ކޮންޓްރޯލް ކޮށްގެން ކުޅުނު ނަމަވެސް ލިބުނު ފުރުސަތު ތަކުގެ ބޭނުން އެންމެ ރަނގަޅަށް ކޮށްފައިވަނީ ޓޮޓްނަމުންނެވެ. މިގޮތުން މެޗްގެ 4 ވަނަ މިނެޓްގައި އުފެއްދި ކައުންޓަރ އެޓޭކެއްގައި ޓޮޓްނަމަށް ލީޑު ނަގާދިނީ ޑެޖާން ކުލުސޭވްސްކީއެވެ. މިމެޗްގައި ސިޓީގެ ފުރަތަމަ ލަނޑު މެޗްގެ 33 ވަނަ މިނެޓްގައި ޖަހައި މެޗްގެ ނަތީޖާ ހަމަހަމަ ކޮށްދިނީ އިލްކައި ގުންޑޮގާންއެވެ. މިމެޗްގައި ޓޮޓްނަމަށް ދެވަނަ ފަހަރަށް ލީޑު ނަގައިދިނީ 59 ވަނަ މިނެޓްގައި ހެރީ ކޭން ޖަހައިދިން ލަނޑަކުންނެވެ. އަދި ދެވަނަ ހާފްގެ މެދުތެރޭގައި ކޭންވަނީ އިތުރު ލަނޑެއްވެސް ކާމިޔާބުކޮށްފައެވެ. ނަމަވެސް ވިއޭއާރުން ބެލުމަށްފަހު އެލަނޑު ވަނީ އޮފް ސައިޑް ކަމަށް ނިންމާފައެވެ. މިނަތީޖާގައި އޮވެ މެޗް ނިމެން ދަނިކޮށް ސިޓީއަށް ދެވަނަ ފަހަރަށް މެޗްގެ ނަތީޖާ ހަމަހަމަ ކޮށްދިނީ އިތުރު ވަގުތުގެ ދެވަނަ މިނެޓްގައި ލިބުނު ޕެނަލްޓީއަކުން ރިޔާދު މަހްރެއިޒްއެވެ. މިނަތީޖާއާއެކު މެޗް އެއްވަރު ވެގެން ނިމިދާނެކަމަށް ގިނަ ބަޔަކަށް ހީވި ނަމަވެސް މެޗްގެ އިތުރު ވަގުތުގެ 5 ވަނަ މިނެޓްގައި ކޭންވަނީ އޭނާ މިމެޗްގައި ކާމިޔާބުކުރި ދެވަނަ ލަނޑާއެކު މިމެޗް ޓޮޓްނަމަށް ކާމިޔާބުކޮށްދީފައެވެ.
މިކާމިޔާބީއާއެކު ޓޮޓްނަމަށް މިވަނީ ކުޅުނު 23 މެޗުން ލިބިފައިވާ 39 ޕޮއިންޓާއެކު ތާވަލްގެ 7 ވަނައަށް ކުރިއަށް ޖެހިލާފައެވެ. އަދި މިމެޗުން ސިޓީ ބަލިވުމުން އެޓީމް އުޅެނީ 26 މެޗުން ލިބިފައިވާ 63 ޕޮއިންޓާއެކު ތާވަލްގެ އެއްވަނައިގައެވެ. ނަމަވެސް ދެވަނައިގާ އުޅޭ ލިވަޕޫލާއި ސިޓީ އާއި ދެމެދުގައިވާ ފަރަގު މިހާރުވަނީ 6 ޕޮއިންޓަށް ކުޑަވެގެން ގޮސްފައެވެ. އަދި ލިވަޕޫލުން މިހާރު ނުކުޅެ އޮތް މެޗާއެކު މިފަރަގު 3 ޕޮއިންޓަށް ކުޑަކުރުމަކީވެސް ކުރެވިދާނެކަމަކަށެވެ.