ޔުއޭފާ ޔޫރޮޕާ ލީގުގައި ރައުންޑް އޮފް 32 ގައި އެޓަލާންޓާ އާއި އޮލިމްޕިއާކޯސް ބައްދަލުކުރި ފުރަތަމަ ލެގް އެޓަލާންޓާ ކާމިޔާބުކޮށްފިއެވެ. އެޓަލާންޓާގެ ދަނޑުގައި ކުޅުނު މިމެޗް އެޓީމް ކާމިޔާބު ކުރީ 2 ލަނޑު އެއްލަނޑުންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ އެޓަލާންޓާއެވެ. މިމެޗްގެ ފުރަތަމަ ލަނޑު މެޗްގެ 16 ވަނަ މިނެޓްގައި ޖަހައި ލީޑު ނެގީ އޮލިމްޕިއާކޯސްއެވެ. މިލަނޑު އެޓީމަށް ކާމިޔާބު ކޮށްދީ އެޓަލާންޓާއަށް ސިހުން ގެނެސްދިނީ ފްރެންސިސްކޯ ސޯރޭޒްއެވެ. މިމެޗްގައި އެޓަލާންޓާއިން މެޗްގެ ނަތީޖާ ހަމަހަމަ ކުރީ މެޗްގެ 61 ވަނަ މިނެޓްގައި ބެރާޓް ޖިމްސިޓީ ޖަހައިދިން ލަނޑުންނެވެ. އަދި އެޓާލާންޓާ މިމެޗުން މޮޅުވި ލަނޑު އޭގެ ދެމިނެޓް ފަހުން ޖަހައިދިނީވެސް އޭނާއެވެ. މިމެޗްގައި އިތުރު ލަނޑެއް ކާމިޔާބު ނުކުރެވުނު ނަމަވެސް ލަނޑު ޖަހާނެ ރަނގަޅު ފުރުސަތު ދެޓީމަށް ވެސް ލިބިގެންދިޔައެވެ.
މިކާމިޔާބީއާއެކު އެޓަލާންޓާއަށް އެއް ލަނޑުގެ ލީޑެއް ލިބިފައިވާއިރު ދެވަނަ ލެގް ކުޅުމަށް ހަމަޖެހިފައި ވަނީ މިއަންނަ ބުރާސްފަތި ދުވަހުގެ ރޭ އޮލިމްޕިއާކޯސްގެ ދަނޑުގައެވެ.