ޔުއޭފާ ޔޫރޮޕާ ލީގުގެ ރައުންޑް އޮފް 32 ގެ ފުރަތަމަ ލެގްގައި އެފްސީ ބާސެލޯނާ އާއި ނަޕޯލީ ބައްދަލުކުރި މެޗް އެއްވަރު ވެއްޖެއެވެ. ބާރސާގެ ދަނޑުގައި ކުޅުނު މިމެޗް ނިމުނީ އެއްލަނޑު އެއްލަނޑުން ދެޓީމް އެއްވަރު ވެގެންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ބާރސާއެވެ. ނަމަވެސް މިމިމެޗްގެ ފުރަތަމަ ލަނޑު މެޗްގެ 29 ވަނަ މިނެޓްގައި ޖަހައި ލީޑު ނެގީ ނަޕޯލީއިންނެވެ. މިލަނޑު އެޓީމަށް ކާމިޔާބު ކޮށްދިނީ ޕިއޮޓްރޭ ޒިއެލިންސްކީއެވެ. މިމެޗްގައި ބާރސާއިން އެއްވަރު ކުރި ލަނޑު މެޗްގެ 59 ވަނަ މިނެޓްގައި ޖަހައިދިނީ ލިބުނު ޕެނަލްޓީއަކުން ފެރާން ޓޯރޭޒްއެވެ. މިމެޗްގައި ދެޓީމުން ކުރެ އެއްވެސް ޓީމަކަށް ލަނޑެއް ނުޖެހެނީސް ޓޯރޭސް އަށް ލަނޑު ޖަހާނެ ރަނގަޅު ފުރުސަތެއް ލިބިގެންދިޔައެވެ. އަދި މެޗް ނިމެން ކައިރިވެފައިވަނިކޮށް ވެސް ޓޯރޭޒަށް ލަނޑު ޖަހާނެ ރަނގަޅު ފުރުސަތު ލިބި ބޭކާރު ވެގެންދިޔައެވެ. މިމެޗްގައި ވަރަށް ފަހުން އާސެނަލްއިން ބާރސާއަށް ބަދަލުވި ޕިއޭ އެމެރިކް އައުބެމެޔާންގް ކުޅުނު ނަމަވެސް އޭނާއަށް މާއެދެވޭ ކުޅުމެއް ދެއްކިފައެއް ނުވެއެވެ.
މިދެޓީމުގެ މެދުގައި ކުޅޭ ދެވަނަ ލެގުގެ މެޗް ކުޅުމަށް ހަމަޖެހިފައިވަނީ މިއަންނަ ބުރާސްފަތި ދުވަހު ނަޕޯލީގެ ދަނޑުގައެވެ. މިފަހަރު ޔޫރޮޕާ ލީގުގައި ބާރސާ ވާދަކުރަމުން މިދަނީ ޗެމްޕިއަންސް ލީގުގެ ގްރޫޕް މަރުހަލާއިން ތިންވަނައަށް ދިއުމުންނެވެ. އަދި މިއީ ވޭތުވެދިޔަ 18 އަހަރުގެ ތެރޭގައި ބާރސާ މިމުބާރާތުގައި ވާދަކުރާ ފުރަތަމަ ފަހަރެވެ.