ރާއްޖޭގެ ޖަލުތައް ބަލަހައްޓާ ޕްރިޒަންސް އޮފިސަރުންވެސް ބޮޑީ ވޯން ކެމެރާ ބޭނުންކުރަން ފަށަން ތައްޔާރުވެއްޖެއެވެ.
ޕްރިޒަންސް އޮފިސަރުންވެސް ބޮޑީ ވޯން ކެމެރާ ބޭނުންކުރަން ފަށަން ތައްޔާރުވަމުންދާއިރު، ދިވެހި ފުލުހުންގެ ހިދުމަތުގެ ފަރާތުން މިހާރު ވަނީ ބޮޑީ ވޯން ކެމެރާ ބޭނުންކުރަން ފަށާފައެވެ.
މޯލްޑިވްސް ކަރެކްޝަން ސަރވިސްއިން ވިދާޅުވީ ފްރޮންޓްލައިންގައި ހަރަކާތްތެރިވާ ޕްރިޒަން އޮފިސަރުން ބޮޑީ ވޯން ކެމެރާ ޓްރަޔަލްއެއްގެ ގޮތުގައި ބޭނުންކުރަން ފެށުމުގެ ގޮތުން، އެ ތަކެތި ދިވެހިރާއްޖެއަށް އެތެރެކޮށް ޑިސްޓްރިބިއުޓްކުރާ ޒެޓާ ޓެކްނޮލަޖީސްއާއެކު އެއްބަސްވުމެއްގައި މިއަދު ސޮއިކޮށްފައިވާކަމަށެވެ.
މޯލްޑިވްސް ކަރެކްޝަނަލް ސަރވިސް (އެމްސީއެސް) ފަރާތުން މި އެއްބަސްވުމުގައި ސޮއިކުރެއްވީ ކޮމިޝަނަރ އޮފް ޕްރިޒަންސް އަޙްމަދު މުޙައްމަދުފުޅުއެވެ. އަދި ޒެޓާ ޓެކްނޮލޮޖީސްގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އަލްފާޟިލް މުޙައްމަދު އައިމަން އާދަމްއެވެ.
މޯލްޑިވްސް ކަރެކްޝަނަލް ސަރވިސްއިން ވިދާޅުވީ މި ކެމެރާތަކަކީ އެމެރިކާގެ އެކްސޮން ކުންފުނީގެ އުފެއްދުމެއްކަމަށެވެ. އަދި މި އެއްބަސްވުމުގެ ދަށުން އެ ކުންފުނިން 15 ބޮޑީ ވޯން ކެމެރާއާއި ތިން ޓޭޒަރ ފޯރުކޮށްދޭނެކަމަށް ކަރެކްޝަންސްއިން ވިދާޅުވެއެވެ. އަދި ޓޭޒަރ ޒިންމާދާރުކޮށް ބޭނުންކުރުމާއި ބޭނުންކުރާނެ ޙާލަތްތަކާ ބެހޭގޮތުން ތަމްރީން ފެށުމުގެ އިންޒިތާމް ވަނީ ހަމަޖެހިފައިކަމަށްވެސް މޯލްޑިވްސް ކަރެކްޝަނަލް ސަރވިސްއިން ވިދާޅުވެއެވެ.
މޯލްޑިވްސް ކަރެކްޝަނަލް ސަރވިސްއިން ވިދާޅުވީ މި ތަކެތި ބޭނުން ކުރާނީ ޖަލުތަކުގެ ފްރަންޓްލައިންގައި މަސައްކަތްކުރާ ޕްރިޒަން އޮފިސަރުންކަމަށެ. އަދި މި ފަދަ ޒަމާނީ ޓެކްނޮލޮޖީގެ ވަސީލަތްތައް ބޭނުންކުރުމުގެ ސަބަބުން ޕްރިޒަން އޮފިސަރުން މިހާރަށްވުރެ ޒިންމާދާރުވެ، ޖަވާބުދާރީވުން އިތުރު ވެގެންދާނެކަމަށްވެސް ކަރެކްޝަންސްއިން ވިދާޅުވެއެވެ. މީގެއިތުރުން މިއީ ޖަލުގައި ބަންދުކޮށްފައި ތިބޭ ފަރާތްތަކާއި ޕްރިޒަން އޮފިސަރުންގެ ރައްކާތެރިކަން ކަށަވަރުކޮށްދިނުމަށް މުޙިއްމު ދައުރެއް އަދާކުރާނެ ފިޔަވަޅެއްކަމަށްވެސް ކަރެކްޝަންސްއިން ވިދާޅުވެއެވެ.
ޖަލު ބަލަހައްޓާ އޮފިސަރުން ބޮޑީ ވޯން ކެމެރާ ބޭނުންކުރަން ތައްޔާރުވަމުންދާއިރު، ދިވެހި ފުލުހުންގެ ޚިދުމަތުގެ ބޮޑީ ވޯން ކެމެރާ ޕްރޮގްރާމް މިދިޔަ އާދީއްޔަދުވަހު ވަނީ ރަސްމީކޮށް އިފްތިތާހުކޮށްފައެވެ.