ބޮލީވުޑުގެ މަޝްހޫރު ލަވަކިޔުންތެރިޔާ އަލޮކޭޝް ލަހިރީ ނުވަތަ ބައްޕީ ލަހިރީ މަރުވެއްޖެއެވެ. އޭނާ މަރުވީ އިންޑިއާގެ މުމްބާއީގެ ކްރިޓިކެއަރ ހޮސްޕިޓަލުގައި ފަރުވާދެމުން ދަނިކޮށް ރޭގެ ވަގުތެއްގައެވެ.
ޢުމުރުން 69 އަހަރުގެ ބައްޕީ ބައްޕީ ލަހިރީ މަރުވީ ބަލިޙާލަތު ބޮޑުވެގެން ހޮސްޕިޓަލުގައި ފަރުވާދެވޭތާ މަހަކަށްވުރެ ގިނަ ދުވަސް ފަހުންނެވެ. އޭނާ މަރުވީ ނޭވާލުމުގެ ނިޒާމަށް ދިމާވާ ސިއްޙީ މައްސަލައެއްކަމަށްވާ ''އޮބްސްޓްރަކްޓިވް ސްލީޕް އެޕްނޭ''ގެ ސަބަބުންކަމަށް ޚަބަރުތައް ބުނެއެވެ.
ބައްޕީ ލަހިރީ އަކީ 1972ވަނަ އަހަރުންފެށިގެން 2020ވަނަ އަހަރާ ހަމައަށް ލަަވަކިއުމުގައި ޙަރަކާތްތެރިވަމުންދިޔަ މަޝްހޫރު ފަންނާނެކެވެ. 1970ގެ އަހަރުތަކުން ފެށިގެން ބޮލީވުޑުގެ އެތައް ފިލުމަކަށް އޭނާ ލަވަކިޔާފައިވެއެވެ. އޭނާގެ ގިނަ ލަވަތަކަކީ ފޯރިގަދަ އެހާމެ ބޮޑު މަޤުބޫލުކަމެއް ހޯދި ލަވަތަކެކެވެ. ބައްޕީ ލަހިރީއަށް ވަނީ ފިލްމުވެއަރ އެވޯޑާއި މިއުޒިކް މިރްޗީ އެވޯޑްފަދަ ބައެއް އެވޯޑުތައްވެސް ލިބިފައެވެ.
ބައްޕީ ލަހިރީއަކީ ލަވަކިއުންތެރިއެއްގެ އިތުރުން މިއުޒިކް ކޮމްޕޯސަރެއްވެސް މެއެވެ. އަދި އޭނާއަކީ އެކްޓްކުރުމާއި ރެކޯޑިން ޕްރޮޑިއުސަރެއްގެ ގޮތުގައިވެސް ފާހަގަކޮށްލެވުނު ފަންނާނެކެވެ.
ބައްޕީ ލަހިރީވަނީ ފަހުން ސިޔާސީ މައިދާނުގައިވެސް ހަރަކާތްތެރިވެފައެވެ. 2014ވަނަ އަހަރު އޭނާ ވަނީ މިހާރު އިންޑިއާގެ ވެރިކަންކުރާ ޕާޓީ ޕާރަތިޔާ ޖަނަތާ ޕާޓީ (ޕީޖޭޕީ)އާ ގުޅިފައެވެ.
ބައްޕީ ލަހިރީ މަރުވުމުގެ ހިތާމާގައި އިންޑިޔާގެ ޢާއްމު ރައްޔިތުންނާއި ބޮލީވުޑު ފަންނާނުން އަންނަނީ ބައިވެރިވަމުންނެވެ. ބައްޕީ ލަހިރީއަކީ މިމަހުގެ ތެރޭގައި މަރުވި ބޮޑުވުގެ މަޝްހޫރު ދެވަނަ ލަވަކިޔުންތެރިއާއެވެ. މިމަހުގެ 6ވަނަ ދުވަހު މަޝްހޫރު ލަވަކިއުންތެރިޔާ ލަތާ މަންގޭޝްކަރު ވަނީ މަރުވެފައެވެ.