އައްޑޫ ސިޓީ އާއި ފުވައްމުލަކުގައި ބަހުގެ ޚިދުމަތް ފެށުމަށްޓަކައި އެއަރކޮންޑިޝަން ކޮށްފައިވާ 13 ބަސް ހޯދުމަށް ނިންމާފައިވާ ކަމަށް އެ ސަރަޙައްދުގެ ދަތުރުފަތުރުގެ ކަންތައްތައް ބަލަހައްޓަމުން އަންނަ މޯލްޑިވްސް ޕޯޓްސް ލިމިޓެޑް، އެމް.ޕީ.އެލުން ބުނެފިއެވެ. ބަހުގެ ޚިދުމަތް އަންނަ މާޗް މަހުގެ ތެރޭގައި ފެށޭނެ ކަމަށްވެސް އެ ކުންފުނިން މައުލޫމާތުދެއެވެ.އައްޑޫ ސިޓީއާއި ފުވައްމުލަކުގައި އެއްގަމު ދަތުރުފަތުރުގެ ޚިދުމަތް ދިނުމަށް އަލަށް ގެނައުމަށް ނިންމާފައިވާ ބަސްތައް ގެނައުމަށް މީހާރު އޯޑަރު ކޮށްފައިވާ ކަމަށާއި، އަންނަ ފެބްރުއަރީ މަހުގެ ފަހުކޮޅު ނުވަތަ މާޗް މަހުގެ ކުރީކޮޅު ބަސްތައް ރާއްޖެ ގެނެވޭނެ ކަމަށް އެމް.ޕީ.އެލުން މައުލޫމާތުދެއެވެ. މި ބަސްތައް ގެނެވުމުން ވީހާވެސް އަވަހަަކަށް ޚިދުމަތް ފެށުމަށް އެކުންފުނިން ދަނީ މަސައްކަތް ކުރަމުންނެވެ. ބަހުގެ ޚިދުމަތް ދިނުމުގެ މަސައްކަތް ފެށުމަށްޓަކައި މިހާރު ޚިދުމަތް ދިނުމަށް ހަމަޖެހިފައިވާ ގޮތުގެ ޕްލޭން ނިމިފައިވާކަމަށް، އަދި މުވައްޒަފުން ހޯދުމުގެ މަސައްކަތްވެސް ނިމިފައިވާކަމަށް، އެމް.ޕީ.އެލްގެ ދަށުން ހިންގަމުން އަންނަ ހިތަދޫ ޕޯޓް ލިމިޓެޑްގެ އެސިސްޓެންޓް މެނޭޖިންގ ޑިރެކްޓަރ މުހައްމަދު ރަޝީދު ވިދާޅުވިއެވެ.ބަހުގެ ޚިދުމަތް ފެށުމުން، ސްކޫލު ކުދިންނަށް ޚާއްސަކޮށްގެން ބަސް ދަތުރުތަކެއް ފަށާނެ ކަމަށް މުހައްމަދު ރަޝީދު ވިދާޅުވިއެވެ. 13 ބަހާއެކު ޚިދުމަތް ފެށި ނަމަވެސް، ކުރިއަށް އޮތް ތަނުގައި ސްކޫލް ބަހުގެ ޚިދުމަތް ދިނުމަށް އިތުރު ބަސް ގެނައުމަށް ނިންމާފައިވާ ކަމަށްވެސް އޭނާ ވިދާޅުވިއެވެ. ބަހުގެ ޚިދުމަތުގެ އަގާއި މެދު ރައްޔިތުން ހިތްހަމަޖެހޭނެ ކަމުގެ ޔަޤީންކަން އެބައޮތްކަމަށްވެސް މުހައްމަދު ރަޝީދު ވިދާޅުވިއެވެ.ދެކުނުގެ ދަތުރުފަތުރުގެ ކަންތައްތަކާއި އެމް.ޕީ.އެލުން ހަވާލުވިފަހުން އެކުންފުނިން ދަނީ ދަތުރުފަތުރުގެ ނިޒާމް ހަރުދަނާކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން މިދިޔަ ޑިސެމްބަރު މަހު އައްޑޫ ސިޓީއާއި ފުވައްމުލަކާއި ދެމެދު ފެރީގެ ޚިދުމަތްވެސް އަލުން ފަށާފައިވެއެވެ.