އެމެރިކާގެ ކީޕަރ މެޓް ޓަރނަރގެ ސޮއި ހޯދަން އިންގްލިޝް ޕްރިމިއަރ ލީގުގެ އާސެނަލްއިން ނިންމައިފިއެވެ. އުމުރުން 27 އަހަރުގެ ޓަރނަރއަކީ މިހާރު އެމެރިކާގެ މޭޖަރ ލީގު ސޮކަރގެ ނިއު އިންގްލަންޑް ރެވޮލޫޝަނަށް ކުޅެމުން އަންނަ ކުޅުންތެރިއެކެވެ.
ޓަރނަރ އާސެނަލް އާއި ގުޅުމަށް ހަމަޖެހިފައިވަނީ މިއަހަރުގެ ޖޫން މަހުއެވެ. އެހެންކަމުން އޭނާއަށް ކޮންކާކަފް ޗެމްޕިއަންސް ލީގުގައި ނިއު އިންގްލަންޑަށް ކުޅުމުގެ ފުރުސަތު އެބައޮތެވެ. އޭނާ ވަނީ އެމްއެލްއެސްއަށް 106 މެޗް ކުޅެދީފައެވެ. އަދި އެމެރިކާ ޤައުމީ ޓީމަށް 15 މެޗް ކުޅެފައިވެއެވެ. މިދިޔަ ސީޒަންގައި އެމްއެލްސްގެ އެންމެ މޮޅު ކީޕަރުގެ މަގާމަށް ހޮވިފައިވަނީ ވެސް މެޓް ޓަރނަރއެވެ. މިދިޔަ ސީޒަން ނުވަތަ ރެގިއުލަރ ސީޒަންގައި އެންމެ ގިނަ ޕޮއިންޓް ހޯދައިގެން ސަޕޯޓަރސް ޝީލްޑް ނިއު އިންގްލަންޑަށް ހޯދައިދިނުމުގައި ވެސް ޓަރނަރ ވަނީ މުހިންމު ދައުރެއް އަދާކޮށްފައެވެ.
ޓަރނަރ އައުމާއެކު އާސެނަލްގައި ގޯލް ކީޕަރުގެ ވާދަވެރިކަން އިތުރަށް ބޮޑު ވާނެއެވެ. އާސެނަލްގައި މިވަގުތު ތިބީ އާރޮން ރަމްސްޑޭލް އާއި ބަރންޑް ލެނޯއެވެ.