ދަޢުލަތަށް ގިނަ ދުވަސްތަކެއް ވަންދެން ޚިދުމަތް ކުރެއްވި އިބްރާހީމް ރައޫފް އަވަހާރަވެއްޖެ

ދިވެހި ދައުލަތަށް ގިނަ ދުވަސްތަކެއް ވަންދެން ޚިދުމަތް ކުރުމުގެ އިނާމު، މިދިޔަ އަހަރު ޙާޞިލު ކުރެއްވި އިބްރާހީމް ރައޫފް އަވަހާރަވެއްޖެއެވެ.

އިބްރާހީމް ރައޫފް އަވަހާރަވީ، އާލާސްކަންފުޅާ އުޅުއްވާތާ ދުވަސްތަކެއްވުމަށްފަހު، ރޭ މެންދަމުގެ ވަގުތެއްގައި، އޭ.ޑީ.ކޭ. ހޮސްޕިޓަލްގައެވެ. އަވަހާރަވިއިރު ޢުމުރަކީ 59 އަހަރެވެ.

އިބްރާހީމް ރައޫފަށް ދިވެހި ދައުލަތަށް ޚިދުމަތް ކުރުމުގެ އިނާމު އެރުވީ، މިދިޔަ އެއްބައިވަންތަކަމުގެ ދުވަހުގެ މުނާސަބަތުގައި، 26 ޑިސެންބަރު 2021 ވަނަ ދުވަހުގެރޭ ޖުމްހޫރީ މައިދާނުގައި ބޭއްވެވި ރަސްމީ ޖަލްސާގައި ރައީސުލްޖުމްހޫރިއްޔާއެވެ.

އިބްރާހީމް ރައޫފަކީ، 38 އަހަރަށްވުރެ ގިނަދުވަހު ދައުލަތަށް ޚިދުމަތް ކުރައްވާފައިވާ ބޭފުޅެކެވެ. އިބްރާހީމް ރައޫފް، މާލެއަތޮޅު ކައުންސިލްގެ ނައިބު ރައީސްގެ މަގާމު، ދެ ދައުރު ފުރިހަމަކުރައްވައި، ތިންވަނަ ދައުރުގައި ރައީސްކަންވެސް ކުރައްވާފައިވެއެވެ.

އަލްމަރްޙޫމް އިބްރާހީމް ރައޫފް، ސަރުކާރުގެ ޚިދުމަތް ފެށްޓެވީ 12 ސެޕްޓެންބަރު 1982 ގައެވެ. އަތޮޅުއޮފީހުގައި ޚިދުމަތް ކުރައްވަން ފެށްޓެވީ 13 އޮގަސްޓު 1984 ގައެވެ. ފުރުއްވާފައިވާ ބައެއް މަގާމުތަކުގެ ތެރޭގައި، ކ. އަތޮޅުއޮފީހުގެ ސެކްރެޓަރީ ކަމާއި، އަތޮޅުވެރިޔާގެ އެހީތެރިޔާގެ މަގާމު ހިމެނެއެވެ.