ކޮޕާ އިޓާލިއާގެ ސެމީފައިނަލުން އިންޓަރ މިލާން ޖާގަހޯދައިފިއެވެ. މިމުބާރާތުގެ ސެމީފައިނަލުން އިންޓަރ ޖާގަހޯދީ ރޭ ކުޅުނު ކުއާޓަރ ފައިނަލް މެޗްގައި އޭ އެސް ރޯމާ އާއި ބައްދަލުކުރިމެޗް ކާމިޔާބުކޮށްގެންނެވެ.
އިންޓަރގެ ދަނޑުގައި ކުޅުނު މިމެޗް އެޓީމުން ކާމިޔާބުކުރީ 2 ލަނޑު ސުންލަނޑުންނެވެ. މިމެޗްގެ ފުރަތަމަ ލަނޑު މެޗްގެ 2 ވަނަ މިނެޓްގައި ޖަހައިދިނީ މިސީޒަންގައި ރޯމާއިން އިންޓަރއަށް ބަދަލުވި ފޯވަޑް އެޑިން ޖެކޯއެވެ. އަދި މިމެޗްގައި އެޓީމުގެ ދެވަނަ ލަނޑު މެޗްގެ 68 ވަނަ މިނެޓްގައި ޖަހައިދިނީ އެލެކްސިސް ސަންޗޭޒެވެ. މީގެއިތުރުންވެސް ލަނޑު ޖަހާނެ ރަނގަޅު ފުރުސަތު ދެޓީމަށް ވެސް ލިބިގެންދިޔަކަން ފާހަގަކޮށްލެވެއެވެ.
މިކާމިޔާބީއާއެކު މިމުބާރާތުގެ ސެމީފައިނަލުން އިންޓަރ އަށް ޖާގަލިބިފައިވާއިރު ސެމީ ފައިނަލްގައި އެޓީމު ބައްދަލުކުރާނީ އޭސީ މިލާނާއި ލާޒިއޯ ބައްދަލުކުރާ ކުއާޓަރ ފައިނަލް މެޗުން މޮޅުވާ ޓީމަކާއެވެ. މިސީޒަންގައި އިންޓަރ އަށް ތިން ތަށި ކާމިޔާބު ކުރުމުގެ ފުރުސަތުވެސް ވަނީ ހުޅުވިފައެވެ.