ކުޑަކުދިންގެ ޢަދުލުގެ ޤާނޫނުގެދަށުން އައްސޭރި ޖަލުގައި އަލަށް ޤާއިމުކުރި ޖުވެނައިލް ސެންޓަރުގައި، ފުރިހަމަކުރަން ޤާނޫނުން ލާޒިމުކޮށްފައިވާ ކަންކަން ފުރިހަމަކޮށްފައިވޭތޯ ބެއްލެވުމަށް ޗިލްޑްރަންސް އޮމްބަޑްސްޕަރސަންގެ އޮފީހުން ހިއްމަފުށީ އައްސޭރި ޖަލަށް ޒިޔާރަތްކޮށްފިއެވެ.
މި ޒިޔާރަތުގައި ޗިލްޑްރަންސް އޮމްބަޑްސްޕަރސަން ނިއުމަތު ޝަފީގުގެ އިތުރުން ޗިލްޑްރަންސް އޮމްބަޑްސްޕަރސަންސް އޮފީސް، ސީއޯއޯގެ ކޮމްޕްލަޔަންސް އެންޑް އެންފޯސްމަންޓް ޑިޕަރޓްމަންޓުން ބައިވެރިވިއެވެ.
މި ޒިޔާރަތުގައި އައްސޭރި ޖަލުގެ ޑިޓެންޝަން ސެންޓަރުގައި ތިބި ކުދިންނާ ބައްދަލުކޮށް، އެ ކުދިންނަށް ޤާނޫނުގެދަށުން ކަށަވަރުކޮށްދޭންޖެހޭ ޙައްޤުތަކާއި ލިބެންޖެހޭ ޚިދުމަތްތައް ފޯރުކޮށްދޭ މިންވަރު އެ ޓީމުން ވަނީ ދެނެގަނެފައެވެ.
ސީއޯއޯއިން ވަނީ ޖުވެނައިލް ޑިޓެންޝަން ސެންޓަރުގެ މަސައްކަތްތަކާގުޅޭ ކަރެކްޝަނަލް ސަރވިސްގެ އިސްވެރިންގެ ޓީމާވެސް ބައްދަލުކުރައްވާފައެވެ. އަދި މި ސެންޓްރުގައި ކުޑަކުދިންގެ ޙައްގުތައް ރައްކާތެރިކުރުމުގެ ޤާނޫނާއި ކުޑަކުދިންގެ ޢަދުގެ ޤާނޫނު ތަންފީޒުކުރެވޭ މިންވަރު ވަޒަންކޮށް މަޢުލޫމާތު ހޯދާފައިވެއެވެ.
ޗިލްޑްރަންސް އޮމްބަޑްސްޕަރސަން @niumaath ހިންމަފުށީ އައްސޭރި ޖަލުގައި ހުންނަ ޖުވެނައިލް ޑިޓެންޝަން ސެންޓަރަށް ޒިޔާރަތްކުރައްވައި، އެ ސެންޓަރުގެ އިންތިޒާމުތައް ބައްލަވައިލައްވައިފި. https://t.co/2utgHbP7Io pic.twitter.com/cgOp5iHKm9
— Children's Ombudsperson's Office (@ChildsOmbudsMV) February 7, 2022
ޗިލްޑްރަންސް އޮމްބަޑްސްޕަރސަންގ އޮފީހުން ވިދާޅުވީ މި ޒިޔާރާތުގައި ލިބުނު މަޢުލޫމާތުގެ އަލީގައި އިސްލާހުކޮށް، އިތުރަށް ހަރުދަނާކުރަންޖެހޭ ކަމެއް ފާހަގަކުރެވޭނަމަ އެކަންކަން ކަމާގުޅޭ އިދާރާތަކާއެކު ޙިއްސާކުރާނެކަމަށެވެ. އަދި ޙިއްސާކުރާ ކަންކަން ތަންފީޒުކުރާ މިންވަރުވެސް ގަވައިދުން ބަލަމުންދާނެކަމަށެވެ.
ކ.ހިންމަފުށީގެ އައްސޭރި ޖަލުގައި ޖުވެނައިލް ޑިޓެންޝަން ސެންޓަރ ޤާއިމުކޮށް ޚިދުމަތް ފެށީ ޖެނުއަރީ 30ވަނަ ދުވަހުއެވެ. މިސެންޓަރަކީ ޤާނޫނުގައި ބުނާ އުސޫލުތަކުގެ މަތީން އެސެންޓަރުން ލިބެންޖެހޭ އެންމެހައި ކަންކަން ލިބޭގޮތަށް ޤާއިމްކޮށްފައިވާ ސެންޓަރެކެވެ. މި ސެންޓަރުގައި މަސައްކަތްކުރާނީ ދާއިރާގެ ތަމްރީން ލިބިފައިވާ މުވައްޒަފުންނެވެ.
ސަރުކާރުން ދަނީ ކުށްކުރާ ކުދިންނަކީ މުޖުތަމައަށް ނިކުމެ އަލުން ޚިދުމަށްކުރެވޭ ބަޔަކަށް ހެދުމަށް މަސައްކަތް ކުރަމުންނެވެ. ކުޑަކުދިންގެ އަދުލުގެ ޤާނޫނުގެ އެންމެބޮޑު ބޭނުމަކީވެސް މުޖުތަމައުގައި ތިބި މިފަދަ ކުދިންނަށް ދައުލަތުން ފޯރުކޮށްދޭ އެހީތެރިކަން ފޯރުކޮށް، އަމާން މުޖުތަމައެއް ޤާއިމްކުރުމެވެ.