ރާއްޖޭގައި ތިބި އިންޑިއާ ސިފައިން ބޭލުމަށް ގޮވާލާ އިދިކޮޅު ޕީޕީއެމް ޕީއެންސީން ކުރިއަށްގެންދާ "އިންޑިއާ އައުޓް" ހަރަކާތުގެ ސަބަބުން ކުރިމަތިވާ ކަންކަން ދިރާސާކުރުމަށް ރައްޔިތުންގެ މަޖިލީހުގެ ސަލާމަތީ ޚިދުމަތްތަކާއި ބެހޭ (241) ކޮމިޓީން ނިންމައިފިއެވެ.
އިދިކޮޅުން ހިންގާ "އިންޑިއާ އައުޓް" ޙަރަކާތުގެ މައްސަލަ ބެލުމަށް ކޮމިޓީއަށް ހުށައެޅުއްވީ މަޖިލީހުގެ ރައީސް މުޙައްމަދު ނަޝީދެވެ.
މި މައްސަލަ ދިރާސާކުރުމާ ބެއްވި ފުރަތަމަ ބައްދަލުވުމުގައި މަޖިލީހުގެ ރައީސް މުހައްމަދު ނަޝީދުވެސް ވަނީ ބައިވެރިވެވަޑައިގެންފައެވެ. ކޮމިޓީގައި ވާހަކަފުޅު ދައްކަވަމުން ރައީސް ނަޝީދު ވަނީ ރާއްޖެއާއި ބައިނަލްއަޤްވާމީ ގުޅުން ޤާއިމްކޮށްފައިވާ ޤައުމުތަކާ އިދިކޮޅަށް އިންތިޒާމްވެގެން ރާއްޖޭގައި ހަރަކާތް ހިންގައިފިނަމަ އޭގެ ސަބަބުން ރާއްޖެއަށް ލިބިދާނެ ގެއްލުމަކީ ކޮބައިތޯ ދެނެގަތުމަށްކަމަށެވެ. ރައީސް ނަޝީދު ވިދާޅުވީ، ވަކި ޤައުމަކަށް ނުވަތަ ވަކި ޝަހުސިއްޔަތަކަށް ފާޑުކިޔުމަކީ މައްސަލައެއް ނޫންކަމަށެވެ. ނަމަވެސް ދިވެހިންގެ ބަޔަކު އިސްވެ ވަކި ޤައުމަކާ ދެކޮޅަށް ހަރަކާތްތަކެއް ހިންގުމަކީ އެކަމުގެ ސަބަބުން ގެއްލުންތަކެއް ކުރިމަތިވާނެ ކަމެއްކަމަށެވެ.
އެހެންކަމުން އިންޑިއާއާ ދެކޮޅަށް ހިންގާ ހަރަކާތާއި ގުޅޭގޮތުން ރައީސް ނަޝިދު ކޮމިޓީއަށް ހުށައެޅުއްވި މައްސަލަ ދިރާސާކުރާއިރު އަމަލުކުރަން އޮންނަ އުސޫލުން ކުރިއަށް ގެންދިއުމަށް އެދިވަޑައިގަތެވެ. އަދި މިފަދަ މައްސަލަތަކާމެދު އެހެނިހެން ޤައުމުތަކުން ޢަމަލުކޮށްފައިވާ ގޮތްތައް ބެއްލެވުމަށްވެސް ރައީސް ނަޝީދު އެދިވަޑައިގަތެވެ.
"ބައިނަލްއަޤްވާމީ ގުޅުން އުފައްދާފައި އޮތް ގައުމަކާ އިދިކޮޅު ހަރަކާތްތަކެއް އިންތިޒާމްވެގެން ރާއްޖޭގައި ހިންގީމަ، އެޤައުމު ދެކޭނެ ގޮތާއި، އެޤައުމުން ދިވެހިންނާއި ގުޅޭ ގޮތުން އަމަލުކޮށްފާނެ ގޮތަކާއި، މިކަންކަމާ ގުޅޭ ގޮތުން ކޮމެޓީގެ މަޝްވަރާއެއް އޮތުން ނުވަތަ ދިރާސާއެއް އޮތުމަކީ ބޭނުންތެރިކަމެއް." ރައީސް ނަޝީދު އެދިވަޑައިގަތެވެ.
ރައީސް ނަޝީދު މަޖިލީހުގެ ކޮމިޓީއަށް ހުށައެޅުއްވި މައްސަލަ ކޮމިޓިން ބޭރުކޮށްލުމަށް ތ.ގުރައިދޫ ދާއިރާގެ މެންބަރު މުޙައްމަދު ޣައްސާން މައުމޫން ވަނީ ހުށަހަޅުއްވާފައެވެ. ނަމަވެސް ކޮމިޓީން އެގޮތަށް ފާހެއް ނުވިއެވެ. ނަމަވެސް އެ މައްސަލަ ކޮމިޓީން ބެއްލެވުމަށް ހެންވޭރު ހުޅަނގު ދާއިރާގެ މެންބަރު ޙަސަން ލަޠީފް ހުށައެޅުއްވިއެވެ. ޙަސަން ލަޠީފްގެ ހުށައެޅުއްވުމުގައި ވަނީ ބައެއް އިދާރާތައްވެސް ކޮމިޓީއަށް ޙާޒިރުކުރުމަށް ހުށައަޅުއްވާފައެވެ.
މިގޮތުން ކޮމިޓީން އެމައްސަލަ ދިރާސާކުރައްވަމުން ގެންދަވާއިރު، ކަމާ ގުޅުންހުރި މަޢުލޫމާތު ހޯއްދެވުމަށް އެމްއެންޑީއެފް، މޯލްޑިވްސް ޕޮލިސް ސާރވިސް، ޑިފެންސް މިނިސްޓްރީ، ފޮރިން މިނިސްޓްރީ، ހޯމް މިނިސްޓްރީ އަދި މަޖިލީހުގެ ފޮރިން ރިލޭޝަންސް ކޮމިޓީ، ކަސްޓަމްސް އަދި އިމިގްރޭޝަން ޙާޒިރުކުރުމަށް ކޮމިޓީން ވަނީ ނިންމާފައެވެ.
މި މައްސަލައާ ގުޅޭގޮތުން ކޮމިޓީގެ މުޤައްރިރު އަދި ހިތަދޫ އުތުރު ދާއިރާގެ މެންބަރު މުޙައްމަދު އަސްލަމް ވަނީ އެއީ މުހިންމު މައްސަލައެއްކަމުން، ސިޔާސީ ރޫހުގައި މައްސަލަ އެއްވެސް މެންބަރަކު ނުނެންގެވުމަށް އެދިވަޑައިގެންފައެވެ.