ހުޅަނގުގެ އަސްކަރީ އިއްތިޙާދު، ނޭޓޯއާ ކުރިމަތިލުމަށް ރަޝިޔާއާއި ޗައިނާ ގުޅިގެން މަސައްކަތްކުރުމަށް އެ ދެ ޤައުމުގެ އެންމެ އިސްވެރިން ވަޢުދުވެވަޑައިގެންފިއެވެ.
ޗައިނާގެ ވެރިރަށް ބެއިޖިންނަށް ވަޑައިގައިގެން ރަޝިޔާގެ ރައީސް ވުލަޑުމީރް ޕުޓިންވަނީ އެ ޤައުމުގެ ރައީސް ޝީ ޖިންޕިންނާ ބައްދަލުކުރައްވައި އެ ދެ ޤައުމަށް ދިމާވެފައިވާ ސަލާމަތީ ޙާލަތާމެދު ދިގު މަޝްވަރާތަކެއް ކުރައްވައިފައެވެ. އެ މަޝްވަރާތަކުގައި ޕުޓިންނާއި ޝީވަނީ ނޭޓޯގެ ފައުޖުތަކާ ކުރިމަތިލާން ޖެހިއްޖެ ޙާލަތެއްގައި އެ ދެ ޤައުމުން ގުޅިގެން މަސައްކަތްކުރާނެކަމުގެ ޔަޤީންކަން ދެއްވައިފައެވެ. އަދި ފިނި ހަނގުރާމައިގެ ދުވަސްވަރު ރަޝިޔާއާއި ޗައިނާއާ ދެމެދު އޮތް ގުޅުމަށްވުރެ މުޙިއްމު އަދި ބަދަހި ގުޅުމެއް ދެ ޤައުމުގެ ދެމެދުގައި މިހާރު އޮތްކަމަށް ވިދާޅުވެ ޕުޓިންނާއި ޝީވަނީ ދިފާޢީ ދާއިރާގެ އިތުރުން ޖައްވީ ކަންކަމާއި މޫސުމަށް އަންނަމުންދާ ބަދަލުތަކާއި އިންޓެނެޓާއި އާޓިފިޝަލް އިންޓެލިޖެންސްގެ ދާޢީރާއިންނާއި ހަކަތައިގެ ދާއިރާއިން ގުޅިގެން މަސައްކަތްކުރެއްވުމަށް އެއްބަސްވެވަޑައިގެންފައެވެ.
ފާއިތުވި ހަފުތާތަކުގެ ތެރޭގައި ރަޝިޔާއާއި އަވަށްޓެރި ޔޫކްރެއިންނާ ދެމެދުވަނީ ބޮޑު ނުތަނަވަސްކަމެއް އުފެދިފައެވެ. އެ ގޮތުން ރަޝިޔާއިންވަނީ 100،000 ސިފައިން ޔޫކްރެއިންގެ ސަރަޙައްދީ ރޮނގު ކައިރިއަށް ފޮނުވައިފައެވެ. ރަޝިޔާއިން ބުނެފައިވަނީ ޔޫކްރެއިންނަށް ޙަމަލާ ދިނުމުގެ އެއްވެސް ވިސްނުމެއް ނެތްކަމަށާއި އެ ސަރަޙައްދަށް ސިފައިން ފޮނުވީ ސަލާމަތީ ސަބަބުތަކަށްކަމަށެވެ. ނަމަވެސް އެ ޤައުމުން ބުނެފައިވަނީ ނޭޓޯގެ މެންބަރުކަން ޔޫކްރެއިންނަށް ދީފިނަމަ އެ ޤައުމާ ދެކޮޅަށް ފިޔަވަޅު އަޅަން މަޖުބޫރުވާނެކަމަށެވެ. އަދި ޔޫކްރެއިންނަށް މެންބަރުކަން ނުދޭނެކަން ނޭޓޯއިން ޔަޤީންކަން ދޭން ޖެހޭކަމަށްވެސް ރަޝިޔާއިންވަނީ ބުނެފައެވެ.
2014ވަނަ އަހަރުގެ ތެރޭގައި ރަޝިޔާއިންވަނީ ޔޫކްރެއިންނަށް ޙަމަލާ ދިނުމަށްފަހު އެ ޤައުމުގެ ކުރިމިޔާ ސަރަޙައްދު ރަޝިޔާގެ ބާރުގެ ދަށަށް ގެނެސްފައެވެ. އަދި ރަޝިޔާގެ އަސްކަރީ އަދި މާލީ އެހީތެރިކަމާއެކު ޔޫކްރެއިންގެ އިރުމަތީ ސަރަޙައްދުތަކުގައި އެ ޤައުމުން ވަކިވެގަތުމުގެ ޙަރަކާތްތަކެއްވަނީ ފަށައިފައެވެ. އެ ގޮތުން އެ ސަރަޙައްދުގައި ރަޝިޔާއަށް ތާޢީދުކުރާ ޖަމާޢަތްތަކަށް އެހީތެރިވުމަށް ރަޝިޔާގެ ކުލީ ސިފައިންވެސް ޙަރަކާތްތެރިވެއެވެ. އެމެރިކާއާއި ނޭޓޯއިން ބުނެފައިވަނީ ޔޫކްރެއިންނަށް އިތުރު ޙަމަލާއެއް ދިނުމަށްފަހު އެ ޤައުމުގެ ބައެއް ރަޝިޔާގެ ބާރުގެ ދަށަށް ގެނެސްފިނަމަ އެ ކަމުގެ ނަތީޖާ ވަރަށް ހިތިވާނެކަމަށެވެ.
ރަޝިޔާއިން ޔޫކްރެއިންނަށް ޙަމަލާ ދޭން އުޅޭކަމަށް ތުޙްމަތުކޮށް އެމެރިކާ އިސްވެވަނީ ނޭޓޯގެ ފައުޖުތައް ތައްޔާރީ ޙާލަތަކަށް ގެނެސްފައެވެ. އެ ގޮތުން އެމެރިކާއިންވަނީ ޕޯލޭންޑަށް 1،700 ސިފައިން އަދި ރޮމޭނިޔާއަށް 1،000 ސިފައިން ފޮނުވުމަށް ނިންމައިފައެވެ. އެއީ ޔޫކްރެއިންނާ އިންވެގެން އޮންނަ ދެ ޤައުމެވެ. އޭގެ އިތުރުން ޖަރުމަންވިލާތަށް 3،000 ސިފައިން ފޮނުވުމަށްވެސް އެމެރިކާއިންވަނީ ނިންމައިފައެވެ.
ރަޝިޔާގެ އިތުރުން ޗައިނާއަށްވެސްވަނީ އެމެރިކާއާއި ނޭޓޯގެ ފައުޖުތަކާ ކުރިމަތިލާން ޖެހިފައެވެ. އެ ގޮތުން ޗައިނާއިން ވަކިވެ ތައިވާނުން މިނިވަންކަން އިޢުލާންކޮށްފިނަމަ ޗައިނާގެ ވެރިކަމުގެ ދަށަށް ބާރުގެ ބޭނުންކޮށްގެން ތައިވާން އަނބުރައި ގެންނާނެކަމަށް ބުނުމުން އެމެރިކާއިންވަނީ ޗައިނާގެ ޙަމަލާއަކުން ތައިވާން ދިފާޢުކޮށްދޭނެކަމަށް ވަޢުދުވެފައެވެ. އެއާއެކު ޗައިނާއާއި އެމެރިކާއާ ދެމެދުވެސްވަނީ ނުތަނަވަސްކަން އުފެދިފައެވެ.