އިންޑިއާގެ މަޝްހޫރު ލަވަކިޔުންތެރިޔާ ލަތާ މަންގޭޝްކަރު މަރުވެއްޖެއެވެ. ލަތާ މަރުވިއިރު އޭނާގެ އުމުރަކީ 92 އަހަރެވެ.
ލަތާ މަރުވީ ކޯވިޑަށް ފަރުވާ ދެމުން ދަނިކޮށެވެ. އޭނާއަށް ކޯވިޑު ޖެހިގެން ހޮސްޕިޓަލުގައި އެޑްމިޓުކޮށްފައިވަނީ މިދިޔަމަހުގެ ކުރީކޮޅުއެވެ. ކޯވިޑަށް ޕޮޒިޓިވުމަށްފަހު ލަތާއަށްވަނީ ނިއުމޯނިއާ ޖެހިފައެވެ. އޭނާއަށް ފަރުވާދެމުން ދިޔައީ އައިސީޔޫގައި ވެންޓިލޭޓަރުގައެވެ. އަދި މިދިޔަ މަހުގެ 28 ވަނަ ދުވަހު ހާލު ރަނގަޅުވަމުންދާތީ ވަނީ ވެންޓިލޭޓަރުން ނަގާފައެވެ. އެހެންނަމަވެސް އިއްޔެ އޭނާގެ ހާލަތު އިތުރަށް ގޯސްވެ އަނެއްކާވެސް ވެންޓިލޭޓަރުގައި ފަރުވާދޭން ފެށިއެވެ.
ލަތާ އަކީ އިންޑިއާގެ ރަން އަޑުގެ ގޮތުގައި މަޝްރޫހުކަން ހޯދާފައިވާ ލަވަކިޔުންތެރިއެކެވެ. އުމުރުން އެންމެ 13 އަހަރުގައި އޭނާ ވަނީ ލަވަކިޔުމުގެ ދާއިރާއަށް ނިކުމެފައެވެ. އެގޮތުން ލަތާގެ ލަވަކިޔުމުގެ ކެރިއާގައި 70 އަށްވުރެ ގިނަ އަހަރު ހޭދަކޮށްފައިވާއިރު، އެކި ބަހުރުވައިގެން 30000 އަށްވުރެ ގިނަ ލަވަ އޭނާވަނީ ކިޔާފައެވެ.