ރައްޔިތުންގެ މަޖިލިސް މިއަހަރަށް ހުޅުވުމަށް ރައީސުލްޖުމްހުރިއްޔާ އިބްރާހިމް މުހައްމަދު ސާލިހު އިއްވައިދެއްވި ރިޔާސީ ބަޔާނުން ތަޢުލީމީ ދާއިރާގެ މުސްތަޤުބަލަށް އުންމީދު ލިބިގެން ހިނގައްޖެކަމަށް ރާއްޖޭގެ ޓީޗަރުން ތަމްސީލްކުރާ، ޓީޗަރުން އެސޯސިއޭޝަން އޮފް މޯލްޑިވްސްއިން ބުނެފިއެވެ.
ޓީޗާސް އެސޯސިއޭޝަނުން މިހެން ބުނެފައި މިވަނީ، ތައުލީމީ ދާއިރާގައި މަސައްކަތްކުރައްވާ ހުރިހާ މުވައްޒަފުންގެ މުސާރަ ބޮޑުކުރެއްވުމަށް ރައީސުލްޖުމްހުރިއްޔާ އިބްރާހިމް މުހައްމަދު ސާލިހު ނިންމެވުމާއި ގުޅިގެނެވެ.
ޓީޗާސް އެސޯސިއޭޝަނުން ނެރުނު ބަޔާނެއްގައި ބުނީ ރިޔާސީ ބަޔާނާއެކު ތަޢުލީމީ ދާއިރާގެ މުސްތަޤުބަލަށް އުންމީދެއް ލިބިއްޖެކަމަށެވެ. އަދި ރިޔާސީ ބަޔާނުން ތައުލީމީ ދާއިރާއާމެދު ލިބުނު އުންމީދަކީ ޤައުމު ބިނާކުރުމަށް އެޅުނު ހަރުދަނާ ފިޔަވަޅެއްގެ ގޮތުގައި ދެކޭކަމަށް ބަޔާނުގައިވެއެވެ.
ޓީޗާސް އެސޯސިއޭޝަނުން ނެރުނު ބަޔާނުގައި ބުނީ ތަޢުލީމީ ދާއިރާ ހަރުދަނާކުރުމަށް 2022 ވަނަ އަހަރުގެ މޭމަހުން ފެށިގެން ދާއިރާގެ ހުރިހާ މުވައްޒަފުންނަށް މުސާރަ ބޮޑުކުރަން ނިންމެވުމަކީ ޓީޗަރުން ތަމްސީލްކުރާ އެސޯސިއޭޝަނުން އުފަލާއެކު ބަލައިގަންނަކަމެއްކަމަށެވެ. އަދި ތަޢުލީމީ ދާއިރާގައި ތިބި ފެންވަރު ރަނގަޅު ޓީޗަރުން އެހެން ދާއިރާތަކަށް ދިއުމާއި ކިޔަވައިގެން ތިބި މޮޅެތި ކުދިން ތަޢުލީމީ ދާއިރާއަށް ޝައުޤުވެރިކަން ކުޑަވެފައިވާ މި ދަނޑިވަޅުގައި، މި ގެނެވުނު ހެޔޮ ބަދަލަށް އެ އެސޯސިއޭޝަނުން މަރުހަބާ ކިޔާކަމަށް ބަޔާނުގައިވެއެވެ.
ތައުލީމީ ދާއިރާގެ ހުރިހާ މުވައްޒަފުންގެ މުސާރަ އަންނަ މެއި މަހުން ފެށިގެން ބޮޑުކުރުމަށް ނިންމެވުމާއެކު ތައުލީމީ ދާއިރާގެ މުވައްޒަފުންގެ މުސާރައިން %56ގެ ކުރިއެރުމެއް އަންނާނެ ކަމަށް ރައީސުލްޖުމްހޫރިއްޔާ ރިޔާސީ ބަޔާނުގައި ވިދާޅުވިއެވެ. މިގޮތުން މިބަދަލާއެކު 21،000ރުފިޔާ ލިބޭ ޕްރިންސްޕަލެއްގެ މުސާރަ 32،000އަށް ބޮޑުވާނެއެވެ. އަދި 14،000 ރުފިޔާ މުސާރައިގެ ގޮތުގައި ލިބޭ މީހުންގެ އިތުރުވުން އުޅޭނީ 28،000 ރުފިޔާގައި ކަމަށް ރައީސް ވިދާޅުވިއެވެ.