ހުޅަނގު އެފްރިކާގެ ޤައުމެއްކަމަށްވާ ގިނީ ބިސާއުއަށް ގެންނަން އުޅުނު ބަޣާވާތް ނާކާމިޔާބުވެއްޖެއެވެ.
ގިނީ ބިސާއުގެ ސަރުކާރުން ބުނެފައިވަނީ ގިނީ ބިސާއުއަށް ގެންނަން އުޅުނު ބަޣާވާތުގައި ރިޔާސީ ގަނޑުވަރަށް ދިން ޙަމަލާގައި ބަޣާވާތުގެ ހަތަރު ބައިވެރިންނާއި ރިޔާސީ ގާޑުގައި ހިމެނޭ ދެ ސިފައިން މަރުވެފައިވާކަމަށެވެ. އަދި ރިޔާސީ ގަނޑުވަރަށް ޙަމަލާ ދީފައިވަނީ އެ ޤައުމުގެ ރައީސް އުމާރޯ ސިސޯކޯ އެންބޯލޯ ވަޒީރުންގެ މަޖިލީހުގެ ބައްދަލުވުމެއް ބާއްވަވަމުންދިޔަ ވަޤުތެއްގައިކަމަށާއި ޙަމަލާތައް ފަސް ގަޑިއިރަށް ދިގުދެމިގެންދިޔަކަމަށެވެ.
ގިނީ ބިސާއުގެ ރައީސް އެންބޯލޯ ވިދާޅުވެފައިވާ ގޮތުގައި ބަޣާވާތް ކުރަން އުޅުނީ ކޮން ބައެއްކަން ނޭނގޭކަމަށާއި ބަޣާވާތުގެ ފަހަތުގައި ތިބީ މަސްތުވާތަކެތީގެ ވިޔަފާރީގައި އުޅޭ ބައެއްކަމަށް ބެލެވޭކަމަށެވެ. އަދި ބަޣާވާތުގެ ބައިވެރިން މަސައްކަތްކޮށްފައިވަނީ އޭނާގެ އިތުރުން ބޮޑުވަޒީރާ ވަޒީރުންގެ މަޖިލީހުގެ މެންބަރުން އަވަހާރަކޮށްލުމަށްކަމަށް އެންބޯލޯ ވިދާޅުވެފައިވެއެވެ.
ގިނީ ބިސާއުއަކީ ދެކުނު އެމެރިކާއިން ވިލާތުގެ ޤައުމުތަކަށް މަސްތުވާތަކެތި އެތެރެކުރުމަށް ބޭނުންކުރާ މުޙިއްމު މަންޒިލެކެވެ. އޭގެ އިތުރުން ފާއިތުވި އަހަރުތަކުގެ ތެރޭގައި ގިނީ ބިސާއުގައިވަނީ ބޮޑެތި ސިޔާސީ ހަމަނުޖެހުންތަކެއް އުފެދިފައެވެ.
ފާއިތުވި 18 މަސްދުވަހުގެ ތެރޭގައި ހުޅަނގު އެފްރިކާގެ ޤައުމުތަކުގައި ހަތަރު ބަޣާވާތެއްކޮށްފައިވެއެވެ. އޭގެ ތެރެއިން ދެ ބަޣާވާތްކޮށްފައިވަނީ މާލީގައެވެ. މީގެ ހަފުތާއެއް ކުރިން ހުޅަނގު އެފްރިކާގައި އޮންނަ ބުކީނާ ފާސޯގައިވެސްވަނީ ބަޣާވާތެއްކޮށް ސަރުކާރު ބަދަލުކޮށްފައެވެ.