ބިދޭސީ އަންހެންމީހާ ޒަޚަމްކޮށްލި މައްސަލާގައި މީހަކު ހައްޔަރުކޮށްފިއެވެ.
ފުލުހުން ވިދާޅުވީ މިހާތަނަށް ބެލި ބެލުމުން، ތޫނު އެއްޗަކުން ޙަމަލާ ދިނުމުގެ ސަބަބުން ބިދޭސީ އަންހެން މީހާއާއި އޭނާގެ ފިރިމީހާގެ ގައިގައިވެސް ޒަޙަމްތައް ހުރިކަންވަނީ ހާމަވެފައެވެ. އަންހެން މީހާއަށް އައިޖީއެމް ހޮސްޕިޓަލްގައި ދަނީ ފަރުވާދެމުންނެވެ. މި ޙާދިސާގައި އަނިޔާ ލިބުނީ އުމުރުން 26 އަހަރުގެ އަންހެނަކަށެވެ.
މިކަމާ ގުޅިގެން ފުލުހުން ހައްޔަރުކޮށްފައިވަނީ 37 އަހަރުގެ އިންޑިޔާ ފިރިހެނެކެވެ. ނަމަވެސް އެއީ އަންހެން މީހާގެ ފިރިމީހާކަން ފުލުހުން ހާމަކޮށްފައެއް ނުވެއެވެ. ފުލުހުން މިއަދު ހެނދުނު ވިދާޅުވި މާލޭގެ ގެއެއްގައި ބިދޭސީ އަންހެނަކަށް އޭނާގެ ފިރިމީހާ ގެވެށި އަނިޔާކުރާ މައްސަލައެއް ހުށައަޅާފައިވާކަމަށެވެ. އަދި ފުލުހުންވަނީ މައްސަލަ ބަލަން ފަށާފައެވެ.
މި ހާދިސާ ހިނގައިގެން ފުލުހަށް ރިޕޯޓް ކޮށްފައިވަނީ މިއަދި ހެނދުނު 06:20 ހާއިރުއެވެ.
ފުލުހުންގެ އެހީއާއެކު އަންހެން މީހާ ގެއިން ނެރެ، ހޮސްޕިޓަލަށް ގެންދާ ވީޑިއޯއެއްވެސް ސޯޝަލް މީޑިއާގައި ދައުރުވެފައިވެއެވެ. މި ވީޑިއޯއިން ފެންނަ މަންޒަރުގައިވެސް އަންހެން މީހާ ލައިގެން ހުރި ހެދުން ލެއިން ފޯވެފައިވާ މަންޒަރު ފެނެއެވެ. އަދި އޭނާއަށް ރަނގަޅަށް ނުވެސް ހިނގެއެވެ.