ވިލިމާލޭގައި ހުންނަ ކުޑަކުދިންގެ ހިޔާގައި ހިނގާފައިވާ އަލިފާނުގެ ހާދިސާތަކާއި ގުޅިގެން އޭރު ތިބި އެތަނުގެ ވެރިންގެ މައްޗަށް ޖިނާޢީ ތަހްގީގެއް ހިންގަން ފުލުހުން ފަށައިފިއެވެ.
ދައުލަތުގެ ބެލުމުގެ ދަށުގައި ތިބޭ ކުދިން ބަލަހައްޓާ ކުދިންގެ ހިޔާގައި ހިންގަމުންދަނީ، ކުޑަކުދިން ބޭތިއްބުމަށް އެންމެ އެކަށީގެންވާ ތަނެއްގެ ގޮތުގައި ނޫންކަަމަށް ޗިލްޑްރަންސް އޮމްބަޑްސްޕާސަންގެ އޮފީހުން މިދިޔަ އަހަރުގެ މެއި މަހުގެ 4ގައި ވަނީ ކުޑަކުދިންގެ ހިޔާއަށް އަންގާފައެވެ. އަދި އެތަނުގައި ތިބޭ ކުދިންގެ ދިރިހުރުމުގެ ހައްގަށް އުނިކަން އަންނަގޮތަށް އެތަނުގެ ޢަމަލުތައް ހުރިކަމަށްވެސް ޗިލްޑްރަންސް އޮމްބަޑްސްޕާސަންގެ އޮފީހުން އެއިރު ވިދާޅުވެފައިވެއެވެ.
އެހެންކަމުން އަލިފާނުގެ ހާދިސާތަކާއި ގުޅިގެން، ކުޑަކުދިންގެ ހިޔާގެ މަސްއޫލު މަގާމުތަކުގައި ތިބި މުވައްޒަފުން ޖަވާބުދާރީ ކުރުވޭނެހެން ޖިނާޢީ ތަހުގީގެއް ހިންގައިދިނުމަށް، ދިވެހި ފުލުހުންގެ ޚިދުމަތުގައި ޗިލްޑްރަންސް އޮމްބަޑްސްޕާސަންގެ އޮފީހުން އެދިވަޑައިގަތީ މިމަހުގެ 17 ވަނަ ދުވަހުއެވެ. މިކަމާއި ގުޅިގެން ފުލުހުން ވިދާޅުވީ، އަލިފާނުގެ ހާދިސާތަކާއި ގުޅިގެން ކުޑަކުދިންގެ ހިޔާގެ ވެރިންނާމެދު ޖިނާޢީ ތަހުގީގެއް ހިންގުމަށް ޗިލްޑްރަންސް އޮމްބަޑްސްޕާސަންގެ އޮފީހުން އެދިވަޑައިގެންފައިވާތީ އެ ތަޙްޤީޤް މިހާރު ފަށްޓަވާފައިވާކަމަށެވެ. ނަމަވެސް ޖިނާޢީ ތަޙްޤީޤް ހިންގަނީ ކޮންބަޔަކަށްކަމެއް ފުލުހުން ވިދާޅެއް ނުވެއެވެ.
ޗިލްޑްރަންސް އޮމްބަޑްސްޕާސަންގެ އޮފީހުން ވިދާޅުވެފައިވަނީ ވިލިމާލޭގައި ހުންނަ ކުޑަކުދިންގެ ހިޔާ ހިންގަމުންދަނީ އަލިފާނުން އެކުދިން ރައްކާތެރިކުރެވޭނެ ވަސީލަތްތައް ނެތިކަމަށެވެ. އަލިފާނުގެ ހާދިސާތަކުން ކުޑަކުދިންނާއި ތަން ރައްކާތެރިކުރުމަށް ބޭނުންވާނެ ފިޔަވަޅުތައް އެޅުމެއްނެތި ހިންގަމުންދަނީ އެކުދިންގެ ދިރިއުޅުމުގެ ހައްގަށް އުނިކަން އަންނާނެކަމަށް ބެލުމެއް ނެތިކަމަށެވެ. އަދި ދައުލަތުގެ ބެލުމުގެ ދަށުގައި ތިބޭ ކުދިން ބަލަހައްޓާނެ ގޮތުގެ އުސޫލުތައް އެކުލަވާލުމަކީ ޗައިލްޑް އެންޑް ފެމިލީ ޕްރޮޓެކްޝަން ސަރވިސަސްގެ ގާނޫނީ ޒިންމާއެއް ނަމަވެސް މިހާތަނަށް އެފަދަ އުސޫލްތަކެއް އެކުލަވާލާފައި ނުވާކަމަށް އޮމްބަޑްސްޕާސަންގެ އޮފީހުން ވިދާޅުވެފައިވެއެވެ.
މިދިޔަ އަހަރުގެ ތެރޭގައި ކުޑަކުދިންގެ ހިޔާގައި އަލިފާނުގެ ގިނަ ހާދިސާތަކެއް ހިނގާފައިވެއެވެ.
ކުޑަކުދިންގެ ހިޔާ ބަންދުކޮށް އެތަނުގައި ތިބި ކުދިން އަތޮޅުތަކަށް ބަދަލުކުރުމަށް ސަރުކާރުން ވަނީ ނިންމާފައެވެ. އަދި އެތަނުގެ ގިނަ ކުދިން މިހާރު ވަނީ އަތޮޅުތަކުގައި ސަރުކާރުން ޤާއިމްކުރި އަމާން ހިޔާތަކަށް ބަދަލުކޮށްފައެވެ.