މެލޭޝިޔާގެ ކުރީގެ ބޮޑުވަޒީރު މަހާތިރު މުޙައްމަދު އަދިވެސް އޮންނެވީ ފަރުވާ ހޯއްދެވުމަށް ހަސްފަތާލުގައި އެނދުމަތިކޮށްފައިވާކަމަށާއި އޭނާގެ ޙާލުކޮޅު ރަނގަޅުވަމުންދާކަމަށް އޭނާގެ ޢާއިލާއިން ބުނެފިއެވެ.
ޢުމުރުފުޅުން 96 އަހަރުގެ މަހާތިރުގެ ޢާއިލާއިން ނެރުނު ބަޔާނެއްގައި ބުނެފައިވަނީ މެލޭޝިޔާގެ ނޭޝަނަލް ހާޓު އިންސްޓިޓިއުޓުގައި މަހާތިރު އެނދުމަތިކޮށްފައިވަނީ ހިތުގެ އާލާސްކަންފުޅަކަށް ފަރުވާ ދެއްވުމަށްކަމަށެވެ. އަދި މަހާތިރަށް އަވަސް ޝިފާއެއް ދެއްވުން އެދި ރައްޔިތުން ހެޔޮ ދުޢާ ކުރުމަށް ޢާއިލާއިން ވަރަށް ބޮޑަށް އެދޭކަމަށްވެސް އެ ބަޔާނުގައި ބުނެފައިވެއެވެ.
މެލޭޝިޔާގެ ނޭޝަނަލް ހާޓު އިންސްޓިޓިއުޓުގައި މަހާތިރު އެނދުމަތިކޮށްފައިވަނީ ޖަނަވަރީ މަހުގެ 8ވަނަ ދުވަހުއެވެ. މިދިޔަ ޑިސެންބަރު މަހުގެ 16ވަނަ ދުވަހުވެސް އެ ހަސްފަތާލުގައި މަހާތިރު އެނދުމަތިކޮށްފައިވެއެވެ. މަހާތިރަށް ތަފާތު ޞިއްޙީ މައްސަލަތަކާވަނީ ކުރިމަތިލައްވަން ޖެހިވަޑައިގެންފައެވެ. އެ ގޮތުން އޭނާވަނީ ހިތުގެ ގިނަ އޮޕަރޭޝަންތަކެއް ކުރައްވައިފައެވެ.
މެލޭޝިޔާގެ ކުރީގެ ބޮޑުވަޒީރުކަން އެންމެ ދިގު މުއްދަތަކަށް ކުރައްވާފައިވަނީ މަހާތިރެވެ. އޭނާވަނީ 1981ވަނަ އަހަރުން 2003ވަނަ އަހަރަށް މެދުނުކެނޑި ބޮޑުވަޒީރުކަން ކުރައްވައިފައެވެ. އަދި 2018ވަނަ އަހަރުގެ ތެރޭގައި އޭނާވަނީ އަލުން ބޮޑުވަޒީރުކަމާ ޙަވާލުވެވަޑައިގެންފައެވެ. ނަމަވެސް ވެރިކަންކުރާ އިއްތިޙާދުގައި ޖެހުނު މައްސަލަތަކަށްފަހު އޭނާވަނީ ބޮޑުވަޒީރުކަމުން އިސްތިޢުފާދެއްވައިފައެވެ. އޭނާއަކީ އަދިވެސް މެލޭޝިޔާގެ ސިޔާސީ މަޞްރަޙުގައި ނުފޫޒުގަދަ ބޭފުޅެކެވެ.