ޑީނަމޯ ކިޔޭވްއަށް ކުޅޭ ޔޫކްރެއިންގެ ބައިނަލްއަޤްވާމީ ކުޅުންތެރިޔާ ބިޓަލީ މައިކޮލެންކޯ އިންގްލިޝް ޕްރިމިއަރ ލީގުގެ އެވަޓަންއަށް ސޮއިކޮށްފިއެވެ. މައުލޫމާތުލިބިފައިވާގޮތުގައި މައިކޮލެންކޯ ސޮއިކޮށްފައިވަނީ ހަތަރު އަހަރާއި ހަމަސްދުވަހުގެ އެއްބަސްވުމެއްގެ ދަށުންނެވެ.
ވައަތު ބެކަށް ކުޅޭ މިކުޅުންތެރިޔާވަނީ ޔޫކްރެއިން ޤައުމީ ޓީމަށް މިހާތަނަށް 21 ފަހަރު ކުޅެފައެވެ. އަދި އޭނާވަނީ މިދިޔަ އަހަރު ބޭއްވި ޔޫރޯ 2020 ގައި ވާދަކޮށް ކްއާޓަރ ފައިނަލުން ޖާގަހޯދި ޔޫކްރެއިން ޓީމުގައި މުހިންމު ދައުރެއް އަދާކޮށްފައެވެ. 22 އަހަރުގެ މިކުޅުންތެރިޔާ ސޮއިކުރި އަދަދު ހާމަކޮށްފައިނުވި ނަމަވެސް މިއެއްބަސްވުން 17 މިލިއަން ޕައުންޑަށް އަރައެވެ. އެވަޓަންގެ ވެބްސައިޓަށް ދިން އިންޓަވިއުއެއްގައި މައިކޮލެންކޯ ވަނީ އޭނާ އަބަދުވެސް އިންގްލޝް ޕްރިމިއަރ ލީގުގައި ކުޅެން ހުވަފެން ދެކެމުން އައި ކަމަށެވެ. އަދި އެވަޓަންއަށް ބަދަލުވުމަކީ އޭނާގެ ކެރިއަރުގައި އެޅުނު ބޮޑު އަދި މުހިންމު ފިޔަވަޅެއް ކަމަށެވެ. މައިކޮލެންކޯއަކީ އެވަޓަންގެ މިހާރު ކޯޗް ރަފައެލް ބެނީޓޭޒް އެޓީމަށް ގެންދިޔަ ހަވަނަ ކުޅުންތެރިޔާއެވެ. މިކުޅުންތެރިޔާވަނީ ޑީނަމޯ ކިޔެވް އާއެކު ޔޫކްރެއިންގެ ލީގު އެއްފަހަރު ކާމިޔާބު ކުރުމުގެ އިތުރުން ޔޫކްރޭނިއަން ކަޕް ދެފަހަރު ކާމިޔާބުކޮށްފައެވެ.
އިނގިރޭސިވިލާތަކީ ފުޓްބޯޅަ އުފަންވި ޤައުމުކަމަށާއި މިޤައުމުގައި މިކުޅޭ ފުޓްބޯޅަ އޭނާގެ ކުޅުމާއި ވަރަށް ގުޅެނެކަމަށްވެސް މައިކޮލެންކޯ ބުންޏެވެ. އެވަޓަންގެ ސަޕޯޓަރުން ކުރިމަތީ ކުޅެން ކެތް މަދުވެފައިވާ ކަމަށާއި އަދި އެންމެފަހުން އެވަޓަން ގުޑިސަން ޕާކްގައި ކުޅެފައިވާ ދެތިން މެޗް ބަލާލާފައިވާ ކަމަށާއި އަދި ސަޕޯޓަރުން ފެނިގެންދިޔައީ އާދަޔާ ޚިލާފުކޮށް ކަމަށްވެސް މައިކޮލެންކޯ ވަނީ ބުނެފައެވެ.