މީލާދީ އާ އަހަރު ފާހަގަކުރުމަށް މާލޭގައި ހަވާއެރުވުމާއި ބަޑިބޭހުގެ ކުޅިވަރުތަކާއެކު މިއުޒިކް ޝޯވއެއް ބޭވުމަށް ހަމަޖެހިއްޖެއެވެ. "މަރުޙަބާވީސް"ގެ ނަމުގައި ބާއްވާ މިމިއުޒިކް ޝޯވް އޮންނާނީ ހުޅުމާލެ ސިންތެޓިކް ޓްރެކް ސަރަޙައްދުގައި، އަންނަ ހުކުރު ދުވަހުގެ ރޭއެވެ.
މިނިސްޓްރީ އޮފް ޔޫތް، ސްޕޯޓްސް އެންޑް ކޮމިއުނިޓީ އެމްޕަވަމަންޓުން އިންތިޒާމްކޮށް ބާއްވާ ޝޯވގައި އިންޑިއާގެ މަޝްހޫރު ލަވަކިޔުންތެރިޔާ އަންކިތް ތިވާރީގެ ލައިވް ހުށައެޅުންތައް އޮންނާނެއެވެ. އަންކިތް ތިވާރީއަކީ ބޮލީވުޑްގެ އެތައް ފިލްމަކަށް ހިޓް ލަވަތައް ކިޔައިދީފައިވާ ލަވަކިއުންތެރިއެކެވެ. އެގޮތުން އާޝިގީ 2، ވިލަންފަދަ ފިލްމްތަކުން މަޝްހޫރިވި ގިނަ ލަވަތައް ހިމެނެއެވެ.
"މަރުޙަބާވީސް" ޝޯވްގައި ދިވެހި ފަންނާނުންގެ ހުށައެޅުންތައްވެސް އޮންނާނެއެވެ. އެގޮތުން ހަބޭސް ބޮޑު ބެރު ގްރޫޕާއި، މޯލްޑިވިއަން އައިޑޮލްއިން މަޝްހޫރުކަން ހޯދި ލަވަކިޔުންތެރިޔާ ޝަލަބީ އިބްރާހީމްގެ ހުށައެޅުންތައް އޮންނާނެއެވެ.
2022ވަނަ އަހަރަށް މަރުޙަބާ ކިޔުމުގެ ގޮތުން، ކުރިއަށްގެންދާ ބަޑިބޭހުގެ ކުޅިވަރުތައްވެސް މި ޝޯވްގެ ތެރެއިން ކުރިއަށްދާނެއެވެ. ޝޯވްއަށް ވަނުމަށް ހުޅުވާލާފައިވަނީ މުޅިން ހިލޭއެވެ. ޝޯވް ފަށާނީ ހުޅުމާލޭ ސިންތަޓިކް ޓްރެކުން، ރޭގަނޑު 21:00ގައެވެ. ޝޯވ އޮންނަ ސަރަޙައްދަށް ވަނުމަށް އާއްމުންނަށް ހުޅުވާލާނީ އެރޭގެ 19:45އިން ފެށިގެންނެވެ. ޝޯވްގައި 5000އެއްހައި މީހުންނަށް ބައިވެރިވެވޭނެކަމަށް ޔޫތް މިނިސްޓްރީން ލަފާކުރައްވައެވެ.
ޝޯވް ބާއްވަނީ ސަރުކާރާއި ސަރުކާރު ޙިއްސާވާ ކުންފުނިތަކާއި، އަދި ބައެއް އަމިއްލަ ކުންފުނިތަކުގެ އެހީތެރިކަމާއެކުއެވެ. އާ އަހަރުގެ ފެށުން، ކޮންމެ އަހަރަކުވެސް ކުލަގަދަ ގޮތެއްގައި އަންނަނީ ފާހަގަކުރަމުންނެވެ. އަދި މިއީ އާއްމުންގެ މެދުގައި ބޮޑު ތަރުޙީބެއް އޮންނަ ޙަރަކާތެކެވެ.