ސަރުކާރަށް ދިގުމުއްދަތަށް ޚިދުމަތްކުރެއްވި 106 ބޭފުޅަކަށް، ޝަރަފުގެ ބެޖާއި އައްޑަނަ ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙް ދެއްވައިފިއެވެ.
ދިވެހި ދަޢުލަތަށް ދިގު މުއްދަތަށް ޚިދުމަތް ކުރުމުގެ އިނާމު ދެއްވުމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙް ނިންމަވާފައިވަނީ، ދަޢުލަތަށް ދިގުމުއްދަތަށް ޚިދުމަތްކޮށްދެއްވި ޚިދުމަތްތެރިންގެ އަގު ވަޒަންކޮށް ހިތްވަރު ދެއްވުމުގެ ގޮތުންނެވެ. މި އިނާމު ދެއްވަނީ ދަޢުލަތަށް 35 އަހަރަށްވުރެ ދިގު މުއްދަތަށް ޚިދުމަތްކޮށްދެއްވި ބޭފުޅުންނަށެވެ.
މިއިނާމު ލިބިވަޑައިގެންނެވި 106 ބޭފުޅުންނާ، ޝަރަފުގެ ބެޖާއި އައްޑަނަ ހަވާލުކޮށްދެއްވީ ދިވެހިންގެ އެއްބައިވަންތަ ކަމުގެ ދުވަހުގެ ޖަލްސާގައި ރައީސުލްޖުމްހޫރިއްޔާ އިބްރާޙިމް މުޙައްމަދި ޞާލިޙުއެވެ.
ޖަލްސާގައި އިނާމު ލިބިވަޑައިގެންނެވި ބޭފުޅުންގެ ތެރޭގައި 50އަހަރަށްވުރެ ދިގު މުއްދަތަށް ދަޢުލަތަށް އިޚްލާސްތެރި ޚިދުމަތްތައް ކޮށްދެއްވި ދެ ބޭފުޅުން ހިމެނިވަޑައިގަންނަވައެވެ. އެއީ ހއ.އުލިގަމު މެޖިސްޓްރޭޓް(ރިޓަޔަރޑް) އަލްއުސްތާޛު އިދުރީސް އާދަމް އާއި މިހާރުވެސް ރާއްޖޭގެ ޚާރިޖީ ދާއިރާގެ ޚިދުމަތުގައި ދެމިހުންނެވި، މިނިސްޓްރީ އޮފް ފޮރިން އެފެއާޒްގެ އެމްބެސެޑަރ އެޓް ލާޖްގެ މަޤާމުގައި ހުންނެވި މާފަންނު މާހުރާ އަޙުމަދު ސަލީމްއެވެ. އަޙުމަދު ސަލީމްވަނީ ޚާރިޖީ ދާއިރާގައިވެސް 30 އަހަރަށްވުރެ ދިގު މުއްދަތައް ޚިދުމަތްކުރައްވާފައެވެ. އަޙުމަދު ސަލީމް ސަރުކާރުގެ އެކި މިނިސްޓްރީތަކުގެ އިސް މަޤާމުތައް ފުރުއްވާފައިވެއެވެ.
ހއ.އުލިގަމު މެޖިސްޓްރޭޓް(ރިޓަޔަރޑް) އަލްއުސްތާޛު އިދުރީސް އާދަމް އެންމެ ގިނަ ދުވަހު ޚިދުމަތްކުރެއްވީ ޝަރުޢީ ދާއިރާގައެވެ. އަދި އަތޮޅާއި ރަށުގެ އެކި މައްސަލަތައް ޙައްލުކޮށްދެއްވުމަށް އަމިއްލަ އިސްނެންގެވުމުގައި ގިނަ ޚިދުމަތްތައް ކޮށްދެއްވިއެވެ.
"ދިވެހި ދަޢުލަތަށް ދިގު މުއްދަތުގައި ޚިދުމަތް ކުރައްވައިގެން މިރޭ އިނާމް ޙާސިލްކުރެއްވި ހުރިހާ ބޭފުޅުންނަށް އިޚްލާސްތެރިކަމާއެކު، މަރުހަބާއާ ތަޙުނިޔާ ދަންނަވަން. އެއްބައިވަންތަކަމުގެ ދުވަހުގެ މުނާސަބަތުގައި ބާއްވާ މި ޖަލްސާގައިވެސް ދަޢުލަތަށް ދިގު މުއްދަތަކަށް ޚިދުމަތް ކުރައްވާފައިވާ ބޭފުޅުންގެ ޚިދުމަތުގެ އަގު ވަޒަންކުރެވިގެން އެބަދޭ. މިއީ 35އަހަރަށްވުރެ ދިގު މުއްދަތަށް ޚިދުމަތްކުރެއްވި އަދި ޚިދުމަތް ކުރައްވަމުންދާ ބޭފުޅުންގެ ތެރެއިން މި އިނާމަށް ޝަރުތު ހަމަވާ ބޭފުޅުންނަށް އަރުވާ އިނާމެއް." ރައީސުލްޖުމްހޫރިއްޔާ ވިދާޅުވިއެވެ.
— The President's Office (@presidencymv) December 26, 2021
ދިވެހި ދައުލަތަށް ޚިދުމަތް ކުރުމުގެ އިނާމު ދެއްވީ ދައުލަތުގެ މުއައްސަސާއެއްގައި ނުވަތަ ސަރުކާރުގެ ކުންފުންޏެއްގައި ނުވަތަ ސަރުކާރުގެ މެޖޯރިޓީ ހިއްސާ އޮތް ކުންފުންޏެއްގައި ދިގު މުއްދަތަށް ޚިދުމަތް ކުރަމުންދާ އަދި ޚިދުމަތް ކުރެއްވި ބޭފުޅުންނަށެވެ.
ރައީސުލްޖުމްހޫރިއްޔާވަނީ ދަޢުލަތަށް ދިގުމުއްދަތަށް ޚިދުމަތްކުރުމުގެ އިނާމު، ކޮންމެ އަހަރަކުވެސް ދެއްވުމަށް ނިންމަވާފައެވެ.
މި އިނާމު މިއަހަރު ދެއްވާފައި މިވަނީ ދެ ބަޔަކަށް ބަހާލައިގެންނެވެ. އެގޮތުން މިއަހަރުގެ ޖުމްހޫރީ ދުވަހުގެ މުނާސަބަތުގައި ބޭއްވި ޖަލްސާގައިވަނީ 117 ބޭފުޅަކަށް ދަޢުލަތަށް ދިގު މުއްދަތައް ޚިދުމަތް ކުރެއްވުމުގެ އިނާމު އަރުވާފައެވެ.