މާދަމާ ބަންގލަދޭޝްގައި ފަށާ ސެންޓްރަލް ޒޯން ވޮލީބޯޅަ މުބާރާތް ރާއްޖޭގެ ޤައުމީ ފިރިހެން ވޮލީ ޓީމަށް ގެއްލިއްޖެއެވެ.
މުބަރާތުގައި ބައިވެރިވުމަށް ވޮލީ ޓީމު އިއްޔެ ބަންގްލަދޭޝަށް ފުރަން ދިޔުމުން ފުރޭގޮތް ނުވީ އެޓީމުގެ ކުޅުންތެރިއަކު ކޯވިޑް-19އަށް ޕޮޒިޓިވްވެފައިވާތީއެވެ. މުޅި މުބަރާތް ގެއްލޭތީ ބަންގްލަދޭޝަށް ދެވޭނެ އިތުރު ގޮތެއް އޮތްތޯ ބެލުމަށް ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)އިން ގިނަ މަސައްކަތްތަކެއްވަނީ ކޮށްފައެވެ. ވީއޭއެމްގެ އެދުމާއެކު އެޗްޕީއޭއިން ވަނީ މުޅި ޓީމުގެ ޕީސީއާރް ޓެސްޓު ރޭގެ ވަގުތެއްގައި ހަދާފައެވެ. މި ޓެސްޓުތަކުގެ ނަތީޖާ އައިގޮތެއް ކަށަވަރުކޮށް ނުދިންނަމަވެސް ޕީއެސްއެމްނިއުސްއަށް މަޢުލޫމާތު ދެއްވަމުން އެޗްޕީއޭގެ އޮފިޝަލު ވިދާޅުވީ ކޯވިޑް-19 އާއި ގުޅިގެން އެޗްޕީއޭއިން ކަނޑައަޅާފައިވާ ގައިޑްލައިންގެ ދަށުން ޤައުމީ ފިރިހެން ވޮލީ ޓީމު އެއްކޮށް ކަރަންޓީންކޮށްފައިވާކަމަށެވެ.
ޓީމުގެ ހުރިހާ ކުޅުންތެރިން އެއަރޕޯޓަށް ދިޔައީ ނެގެޓީވް ޕީސީއާރު ޓެސްޓަކާއެކުގައި ނަމަވެސް ޓީމުގެ ޑައިރެކްޓް ކޮންޓެކްޓް ކުޅުންތެރިން ތިބުމުން ޤައުމީ ވޮލީ ޓީމަށް ޑާކާ އަށް ފުރޭގޮތް އިއްޔެވަނީ ނުވެފައެވެ. އެހެންކަމުން ޤައުމީ ވޮލީ ޓީމަށް ސެންޓްރަލް ޒޯން ވޮލީ މުބާރާތް މިވަނީ އެއްކޮށް ގެއްލިފައެވެ.
މިމުބާރާތް ފެށުމަށް ހަމަޖެހިފައިވަނީ މާދަމާއެވެ. މުބާރާތް ރޭވިފައިވާގޮތުން ފުރަތަމަ މެޗުގައި ރާއްޖެ ވާދަކުރަން ހަމަޖެހިފައި އޮތީ މުބާރާތް ބާއްވާ ގައުމު ބަންގްލަދޭޝްއާއެވެ. ސެންޓްރަލް ޒޯން މުބާރާތުގައި ކުރިން އޮތްގޮތުން ފިރިހެން ބައިގައި ވާދަކުރަނީ ރާއްޖޭގެ އިތުރުން ނޭޕާލް، ލަންކާ އަދި އުޒްބަކިސްތާނެވެ.
ފިރިހެން ޓީމުން ސެންޓްރަލް ޒޯން މުބާރާތައް ތައްޔާރުވާން މާލޭގައި ވަނީ މި މަހު ތެރޭގައި ހަ މެޗެއް ކުޅެފައެވެ. ސްރީ ލަންކާގެ ޤައުމީ ޓީމާ ދެކޮޅަށް ކުޅުނު ތިން މެޗުން ރާއްޖެ ވަނީ ސީދާ ތިން ސެޓުން ބަލިވެފައެވެ. އޭގެ ފަހުން އިންޑިއާގެ ހައިދަރުއާބާދު ސްޕައިކާސްއާ ދެކޮޅަށް ގައުމީ ވޮލީ ޓީމު ކުޅުނު ތިން މެޗުން ވަނީ މޮޅުވެފައެވެ. ފުރަތަަމަ ދެ މެޗުން ހައިދަރުއާބާދު ސްޕައިކާސް އަތުން މޮޅުވީ ތިން ސެޓު އެއް ސެޓުންނެވެ. އަދި ފަހު މެޗުން ގައުމީ ފިރިހެން ވޮލީ ޓީމު ވަނީ ސީދާ ތިން ސެޓުން މޮޅުވެފައެވެ.
މި ފަހަރުގެ ސެންޓްރަލް ޒޯން މުބާރާތް ބާއްވަނީ ދެ އަހަރުގެ މެދުކެނޑުމަކަށް ފަހުއެވެ.
ފިރިހެން ވޮލީ ޓީމަށް ބަންގަލަދޭޝަށް ނުދެވުނު ނަމަވެސް ގައުމީ އަންހެން ވޮލީ ޓީމު ވަނީ ސެންޓްރަލް ޒޯން އަންހެން ބައިގައި ވާދަކުރުމަށް އިއްޔެ ބަންގްލަދޭޝަށް ފުރާފައެވެ. އެ މުބާރާތް ކުރިއަށްދާނީ މިމަހުގެ 23-29 އަށެވެ.
ގައުމީ އަންހެން ވޮލީ ޓީމުގެ ކޯޗަކީ ދިވެހި ސިފައިންގެ ކުލަބާއެކު ކާމިޔާބީތަކެއް ހޯދާފައިވާ ތަޖްރިބާކާރު ކޯޗް މުމްތާޒް ޢަލީ (މުންތޭ) އެވެ.
މި ފަހަރު ސެންޓްރަލް ޒޯން އަންހެން މުބާރާތުގައި ރާއްޖެ އާއި ބަންގްލަދޭޝްގެ އިތުރުން ދެން ވާދަކުރާނީ ނޭޕާލް، އުޒްބަކިސްތާން، ކިރްގިސްތާނުގެ އިތުރުން ލަންކާއެވެ. ފުރަތަމަ މެޗުގައި ބުރާސްފަތި ދުވަހު އަންހެން ޓީމް ނިކުންނާނީ ބަންގްލަދޭޝާ ދެކޮޅަށެވެ.
ސެންޓްރަލް ޒޯންގެ އަންހެން އަދި ފިރިހެން މުބާރާތް ވެސް ބަންގްލަދޭޝްގައި ކުރިއަށްދާނީ ފުރަތަމަ ލީގު ބުރެއް ކުޅުމަށް ފަހު އެންމެ ގިނަ ޕޮއިންޓް ހޯދާ ދެ ޓީމެއް ފައިނަލުގައި ކުޅޭ ގޮތަށެވެ. އަދި ތިންވަނަ އާއި ހަތަރުވަނަ ޓީމު ރޭންކިން މެޗެއް ކުޅޭނެއެވެ.