އިނގިރޭސިވިލާތުގައި ޖެހިޖެހިގެން ދެ ދުވަހު ރެކޯޑު ޢަދަދެއްގެ މީހުންނަށް ކޯވިޑް-19 ޖެހިއްޖެއެވެ.
ކޯވިޑް-19ގެ ޖުރައްކާތެރި އަދި ވާރުތަވުމުގެ ބާރުގަދަ ވައްތަރެއްކަމަށްވާ އޮމިކްރޯން އިނގިރޭސިވިލާތުގައި ހަލުވިކަމާއެކު ފެތުރެމުންދާ ދަނޑިވަޅެއްގައި އެ ޤައުމުގެ ޞިއްޙަތާބެހޭ ވުޒާރާއިންވަނީ ރެކޯޑު ޢަދަދެއްގެ ބަޔަކަށް ބަލިޖެހިގެން ހަސްފަތާލުން ފަރުވާދޭން ޖެހިދާނެކަމުގެ އިންޒާރުވެސް ދީފައެވެ. ފާއިތުވި 24 ގަޑިއިރުގެ ތެރޭގައި އިނގިރޭސިވިލާތުގައި 88,376 މީހުންނަށްވަނީ ކޯވިޑް-19 ޖެހިފައެވެ. އެއީ އޭގެ ކުރީ ދުވަހަށްވުރެ 10،000 މީހުން އިތުރު ޢަދަދެކެވެ.
އިނގިރޭސިވިލާތުގެ ޗީފް މެޑިކަލް އޮފިސަރ ކުރިސް ވިޓީ ވިދާޅުވީ އޮމިކްރޯނުގެ ޖެހޭ މީހުންގެ ޙާލަތު ބޮޑަށް ގޯސްނުވި ނަމަވެސް ބަލީގެ އެވައްތަރު ޖެހޭ މީހުންނަށް ހަސްފަތާލުން ފަރުވާދޭން ޖެހޭކަމަށެވެ. އަދި އޮމިކްރޯނަކީ ވާރުތަވުމުގެ ބާރުގަދަ ވައްތަރެއްކަމުން ރެކޯޑު ޢަދަދެއްގެ ބަޔަކަށް ހަސްފަތާލުން ފަރުވާދޭން ޖެހި ޞިއްޙީ ނިޒާމަށް ނުތަކާވަރަށް ބާރުބޮޑުވުން އެކަށީގެންވާކަމަށެވެ. މިދިޔަ ޖަނަވަރީ މަހުގެ ތެރޭގައި އިނގިރޭސިވިލާތުގައި އެއް ދުވަހުގެ މަތިން ކޯވިޑް-19 ޖެހުނު 4,583 މީހުންނަށް ހަސްފަތާލުންވަނީ ފަރުވާ ދިފައެވެ.
އިނގިރޭސިވިލާތުގައި ޖުމުލަ 11.1 މިލިޔަން މީހުންނަށްވަނީ ކޯވިޑް-19 ޖެހިފައެވެ. އަދި ބަލީގައި އެ ޤައުމުން 147،000އަށްވުރެ ގިނަ މީހުންވަނީ މަރުވެފައެވެ.