ރާއްޖޭގެ ބޮޑު ބަޔަކަށް މިހާރު ކުރަމުންދާ ވިއްސާރައަކީ ދެމޫސުން ބެދޭ ދުވަސްވަރު ކުރާ ވިއްސާރަ ކަމަށް މޫސުމާ ބެހޭ ޤައުމީ އިދާރާއިން ވިދާޅުވެއްޖެއެވެ.
މޫސުމާ ބެހޭ ޤައުމީ އިދާރާއިން ވިދާޅުވީ މިހާރު ކުރަމުންދާ ވިއްސާރަ އަލިކުރާނެ ކަމަށް ބެލެވެނީ އަންނަ ހަފްތާގެ އަންގާރަ ހިސާބުގައިކަމަށެވެ. އެހެންނަމަވެސް މިދުވަސްވަރު މިކުރާ ވިއްސާރައިގައި އާއްމުކޮށް ބަނަކޮށް އޮތުމާއި ކެރީގެ އަސަރު ކުރިނަމަވެސް މޫސުން މާބޮޑަށް ގޯސްވާނެ ކަމަށް ނުބެލެވޭ ކަމަށް މޫސުމާ ބެހޭ ޤައުމީ އިދާރާއިން ލަފާކުރެއެވެ.
އެއިދާރާއިން ވިދާޅުވީ ކުރިއަށް އޮތް 24 ގަޑިއިރަށް ބަލާއިރުވެސް ރާއްޖޭގެ ބޮޑު ސަރަޙައްދަކަށް ކެރީގެ އަސަރުކުރާނެކަމަށެވެ. ރާއްޖޭގެ އެކި ހިސާބަށް ވައި އާދައިގެ ވަރަކަށް ގަދަނަމަވެސް ދަތުރު ނުކުރެވޭ މިންވަރަށް ކަނޑުތައް ގަދަ ނުވާނެކަމަށް މެޓު އޮފީހުން ލަފާކުރެއެވެ.
މެޓު އޮފީހުން ވިދާޅުވީ ވައިޖެހޭނީ އިރުއުތުރާއި އިރުން ގަޑިއަކު 10 މޭލާއި 20 މޭލާ ދެމެދުގެ ބާރުމިނުގައި ކަމަށާއި ވިލާގަނޑުގައި ގަޑިއަކު ގާތްގަނޑަކަށް 35 މޭލަށް ވައިގަދަވުން އެކަށީގެންވާކަމަށެވެ. އެހެންކަމުން ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި ގަދަވާނެކަމަށްވެސް އެއިދާރާއިން ލަފާކުރެއެވެ.