ސިއްޙީ ދާއިރާ ޑިޖިޓަލައިޒް ކުރުމުގެ އެއްބަސްވުމެއްގައި މިނިސްޓްރީ އޮފް ހެލްތާއި ފެނަކަ ކޯޕަރޭޝަން ލިމިޓެޑާއި ދެމެދު ސޮއިކޮށްފިއެވެ. މިކަމަށްޓަކައި ބޭއްވި ރަސްމިއްޔާތުގައި ހެލްތު މިނިސްޓްރީގެ ފަރާތުން ސޮއިކުރެއްވީ، މިނިސްޓަރ އަހުމަދު ނަސީމްއެވެ. ފެނަކައިގެ ފަރާތުން ސޮއިކުރެއްވީ އެކުންފުނީގެ އެމްޑީ އަހުމަދު ސައީދުއެވެ.
މި އެމް.އޯ.ޔޫ އަކީ ސިއްޙީ ދާއިރާ ޑިޖިޓަލައިޒް ކުރުމަށް ބޭނުންވާ އެހީތެރިކަން ފޯރުކޮށްދިނުމަށްޓަކައި ވެވުނު އެއްބަސްވުމެކެވެ. އެގޮތުން ފެނަކައިގެ އައި.ޓީ ޓީމުން ސިއްޙީ ދާއިރާގެ އައި.ޓީ އިންފްރާސްޓްރަކްޗަރ އޮޑިޓެއް ހެދުމުގެ މަސައްކަތް ކުރިއަށްދާނެއެވެ. މިއާއެކު ސިއްހީ ދާއިރާ ޑިޖިޓަލައިޒް ކުރުމަށްޓަކައި ހަރުދަނާ ކުރަންޖެހޭ ކަންތައްތައްވެސް އެނގިގެންދާނެއެވެ.
މިއެއްބަސްވުމުގައި ސޮއިކުރުމުގެ ރަސްމިއްޔާތުގައި ވާހަކަ ދައްކަވަމުން ފެނަކައިގެ އެމްޑީ ވިދާޅުވީ އެ ކުންފުންޏަކީ ހަމައެކަނި ފެނާއި ނަރުދަމާގެ ކަންތައްތައް ބެލެހެއްޓުމާއި، އިންޖީނުތަކާއި ފެން ޕްލާންޓްތައް މަރާމާތުކުރުމުގެ އިތުރުން ސަރުކާރުގެ އެހެން ކުންފުނިތަކަށް ދޫނުކުރާވަރުގެ ރަނގަޅު އައި.ޓީ ސިސްޓަމްތަކެއް ޤާއިމުކުރުމުގެ ޤާބިލުކަންވެސް އެ ކުންފުންޏަށް ލިބިގެންވާކަމަށެވެ.
" އަޅުގަނޑު ދެކެން ބޭނުންވާ ހުވަފެނަކީ ފެނަކައިގެ އައިސީޓީ ޑިޕާޓްމަންޓް މެދުވެރިކޮށް ހެލްތު މިނިސްޓްރީގެ މުއައްސަސާތަކުގައި ލިބެންޖެހޭ އެންމެހާ ޚިދުމަތްތައް، ރައްޔިތުންނަށް އެކަށީގެންވާ ހަރުދަނާ މިންވަރެއްގައި ރައްކާތެރިކަމާއިއެކު ލިބޭނެ މާހައުލެއް ޤާއިމުވެގެންދިއުން." ފެނަކައިގެ އެމްޑީ އަހުމަދު ސައީދު ވިދާޅުވިއެވެ.
ހެލްތު މިނިސްޓަރ އަހުމަދު ނަސީމް ވިދާޅުވީ މިފަދަ ސިސްޓަމެއް ޤާއިމުކުރެވިއްޖެނަމަ އެއީ މިނިސްޓްރީއަށް ލިބިގެންދާނެ ވަރަށް ބޮޑު ހެޔޮ ބަދަލެއް ކަމަށެވެ.
މިމަޝްރޫޢެއްގެ ސަބަބުން ސިއްޙީ ޚިދުމަތްދޭ ތަންތަނުން ދެމުންދާ ޚިދުމަތްތަކާއި ކުރެވޭ މަސައްކަތްތަކުގެ މައުލޫމާތުތައް، ޑޭޝްބޯރޑްފަދަ އެކި ޑިޖިޓަލް ވަސީލަތްތައް މެދުވެރިކޮށް ދުވަހުން ދުވަހަށް ފެންނާނެ ނިޒާމެއް ޤާއިމްވެގެންދާނެއެވެ. އެގޮތުން ހެލްތު މިނިސްޓްރީގެ އެއް އަމާޒުކަމަށްވާ ސިއްޙީ ދާއިރާގައި ބޭނުންކުރަމުންދާ އެކި ސިސްޓަމްތަކާއި އެޕްލިކޭޝަންތައް، ނެޝަނަލް ހެލްތު އިންފޮރމޭޝަން ސިސްޓަމާއި ގުޅާލުމަށްވެސް މަގުފަހިވެގެންދާނެއެވެ.