އެއްބަސްވެފައިވާ ގޮަތަށް ޔޫއޭއީއަށް ހަތިޔާރު ވިއްކާނެކަމަށް އެމެރިކާގެ ޚާރިޖީ ވަޒީރު އެންތޮނީ ބުލިންކެން ވިދާޅުވެއްޖެއެވެ. އޭނާ އެ މޭރުމުން ވާހަކައްދަކަވާފައިވަނީ އެމެރިކާއިން ވިއްކުމަށް ހަމަޖެހިފައިވާ އެފް35 މަރުކާގެ ހަނގުރާމަމަތީ މަތިންދާބޯޓާއި އަސްކަރީ ޑުރޯނު ނުގަތުމަށް ޔޫއޭއީން ނިންމާފައިވާކަމަށް އަޑުފެތުރިފައިވަނިކޮށެވެ.
މިދިޔަ ޖަނަވަރީ މަހުގެ ތެރޭގައި ޔޫއޭއީންވަނީ އެފް35 މަރުކާގެ 50 ހަނގުރާމަމަތީ މަތިންދާބޯޓާއި 18 އަސްކަރީ ޑުރޯނު ގަތުމަށް އެމެރިކާއާއެކު އެއްބަސްވުމެއްގައި ސޮއިކޮށްފައެވެ. އެ އެއްބަސްވުމުގެ ދަށުން އެމެރިކާއިން ހަތިޔާރު ގަތުމަށް ޔޫއޭއީން 23 ބިލިޔަން އެމެރިކާ ޑޮލަރު ޚަރަދުކުރާނެއެވެ. ނަމަވެސް އެ އެއްބަސްވުމުގެ ބައެއް މާއްދާތަކާއި ހަތިޔާރު އަގުތައް ބެލުމަށް ފަހު އެ އެއްބަސްވުން އުވާލުމަށް ޔޫއޭއީންވަނީ ނިންމައިފައެވެ.
އެމެރިކާގެ ވެރިކަމަށް ޖޯ ބައިޑަން ވަޑައިގެންނެވި ފަހުން ދެކުނު އިރުމަތީ އޭޝިޔާގެ ޤައުމުތަކަށް ކުރައްވައި ފުރަތަމަ ދަތުރުފުޅުގައި މެލޭޝިޔާއަށް ވަޑައިގެން ނޫސްވެރިންނާ ވާހަކަދައްކަވަމުން ބުލިންކެން ވިދާޅުވީ އެމެރިކާއިން އެންމެ އިސްކަމެއް ދެނީ އިސްރާއީލަށް އެންމެ ޒަމާނީ ހަތިޔާރު ވިއްކުމަށްކަމަށާއި އެ ސަރަޙައްދުގައި އޮންނަ ޔޫއޭއީފަދަ ޤައުމުތަކަށް ވިއްކާ ހަތިޔާރުތަކުގައި ތަފާތުތަކެއް ހުންނާނެކަމަށެވެ. އެއީ ކުރިމަތިލުމެއްގައި އިސްރާއީލަށް ކުރި ލިބޭނެ ގޮތަށް މަގުފަހިކުރުމަށްކަމަށްވެސް ބުލިންކެން ވިދާޅުވިއެވެ. ނަމަވެސް އެ ސިޔާސަތުގެ ދަށުން ޔޫއޭއީއަށް ހަތިޔާރު ވިއްކުމަށް އެއްވެސް ހުރަހެއް ނެތްކަމަށްވެސް އޭނާ ވިދާޅުވިއެވެ.
ޒަމާނުއްސުރެ އެމެރިކާއިން އިސްރާއީލަށް އަހަރަކު އެތައް ބިލިޔަން އެމެރިކާ ޑޮލަރެއްގެ ހަތިޔާރެއް ވިއްކައެވެ. އޭގެ އިތުރުން މެދުއިރުމަތީގެ އެމެރިކާގެ ބައިވެރިންކަމަށްވާ ސަޢުދީ ޢަރަބިއްޔާއާއި ޔޫއޭއީއަށްވެސް ގިނަ ޢަދަދެއްގެ ހަތިޔާރު ވިއްކައެވެ.