ރައްޔިތުންގެ މަޖިލީހުގެ ކޮމަންޑޫ ދާއިރާގެ މެމްބަރު ހުސެއިން ވަހީދު އަވަހާރަވެއްޖެއެވެ. ހުސެއިން އަވަހާރަވެފައިވަނީ ރޭގެ ވަގުތެއްގައި އޭޑީކޭ ހޮސްޕިޓަލްގައެވެ.
ހުސެއިން ވަހީދު ކެންސަރުގެ އާލާސްކަންފުޅުގައި އުޅުއްވާތާ ވަނީ ގިނަ ދުވަސްތަކެއް ވެފައެވެ. އަދި ބައްޔަށް ފަރުވާ ހޯއްދެވުމަށް ރާއްޖެއިން ބޭރުގައިވެސް ގިނަ ދުވަސްތަކެއް ހުސެއިން ވަނީ ހޭދަކުރައްވާފައެވެ.
ބައްޔަށް ފަރުވާ ހޯއްދެވުމަށް ރާއްޖެއިން ބޭރުގައި އަހަރެއްހާ ދުވަހު ހުންނެވުމަށްފަހު އަލުން މަޖިލީހުގެ ޖަލްސާތަކުގައި ހުސެއިން ބައިވެރިވެޑައިގެންނެވީ މިއަހަރުގެ މާރިޗު މަހުގެ 29 ގައެވެ. އެދުވަހުގެ ޖަލްސާގައި ވާހަކަފުޅު ދައްކަވަމުން ހުސެއިން ވަނީ އާލަސްކަންފުޅާއި އުޅުއްވިއިރު ގިނަ ބައެއްގެ ހެޔޮ ދުޢާއާއި މެސެޖު ލިބުނުކަން ފާހަގަކުރައްވާ އެކަމަށް ޝުކުރު އަދާކުރައްވާފައެވެ. އަދި އަނެއްކާވެސް އެނބުރި އައިސް ރައްޔިތުންނާއި މުޚާތަބްކޮށް ވާހަކަދެއްކޭތީ އެކަމަށް ﷲއަށް ޝުކުރު ކުރާކަމަށް ހުސެއިން ވިދާޅުވިއެވެ.
" އަޅުގަނޑު އެންމެ ފުރަތަމަވެސް ވަރަށް ގިނަ ދުވަސް ރާއްޖެއިން ބޭރުން ބޭސްފަރުވާއެއް ކުރުމަށްފަހު މިއަދު އަނެއްކާވެސް މިހިސާބަށް އައިސް ތިޔަ އެންމެބޭފުޅުންނާއި ބައްދަލުވެ އެއްޗެއް ބުނެލަން ލިބުމުން މާތްﷲ ސުބުހާނަހޫ ވަތަޢާލާގެ ހަޒުރަތަށް ޝުކުރު ކުރަން. އަދި ހަމައެއާއިއެކު އަޅުގަނޑު ބޭރުގައި ހޭދަކުރި ދުވަސްތަކުގައި އަޅުގަނޑުގެ ވަރަށް ގާތް ރައްޓެހިންނާއި، ދާއިރާގެ އެކިއެކި ރައްޔިތުންނާއި، ހެޔޮއެދޭ އެތައް މެމްބަރުންނެއް އަޅުގަނޑަށް ގުޅައި ހާލުބަލަމުން ދިޔަ ކަމަށްޓަކައި އުފާކޮށް އެންމެ ބޭފުޅުންނަށް ޝުކުރު ދަންނަވަން. އަދި އަޅުގަނޑަށް ހެޔޮ ދުޢާ ކޮށްދެއްވި އަދި ހެޔޮ ދުޢާކޮށްދެއްވަމުންދާ ހުރިހާ އަހުންނާއި އުހުތުންނަށް ހިތުގެ އެންމެ އަޑިން ޝުކުރު ދަންނަވަން." މާރިޗު 29 ގެ ޖަލްސާގައި ހުސެއިން ވަހީދު ވިދާޅުވިއެވެ. މިނޫން އެއްވެސް ވާހަކައެއް އެދުވަހު ހުސެއިން ވިދާޅެއްނުވެއެވެ.
ހުސެއިން ވަހީދު އަވަހާރަވުމުން ދައުލަތުގެ ވަޒީރުންނާއި ރައްޔިތުންގެ މަޖިލީހުގެ މެމްބަރުންނާއި ގިނަ ބަޔަކު އަންނަނީ ސޯޝަލް މީޑިއާގައި ހިތާމަ ފާޅުކުރަމުންނެވެ.
ގައުމާއި ރައްޔިތުންނަށް ހިދުމަތްކުރެއްވި ހިތް ހެޔޮ ބޭފުޅެއް
ހުސެއިން އަވަހާރަވުމާއި ގުޅިގެން އެމްޑީޕީގެ ޕާލިމެންޓަރީ ގްރޫޕްގެ ލީޑަރ އަލީ އާޒިމް ކުރެއްވި ޓްވީޓެއްގައި ވިދާޅުވީ ހުސެއިންއަކީ 17 އަދި 19 ވަނަ ރައްޔިތުންގެ މަޖިލީހުގައި ގިނަ ގުނަ މަސައްކަތްތަކެއް ކުރެއްވި ބޭފުޅެއްކަމަށެވެ.
މެންބަރު ހުަސެއިން ވަހީދަކީ 17 އަދި 19 ވަނަ ރައްޔިތުންގެ މަޖްލީހުގައި ގިނަގުނަ މަސައްކަތްތަކެއް ކުރެއްވި ބޭފުޅެއް. ހުސެއިން ވަހީދު ނިޔާވި ޙަބަރު އަޑުއެހީ ވަރަށް އަސަރާ ފުން ހިތާމަޔާއެކު. ހުސެއިން ވަހީދައް ސުވަރުގެ މިންވަރު ކުރައްވާ އާއިލާއަށް ކެތްތެރިކަން ދެއްވާށިއެވެ. އާމީން
— ??? ???? (@aliaazim) December 13, 2021
ފޮރިން މިނިސްޓަރ އަބްދުﷲ ޝާހިދު ހުސެއިން ވަހީދު ސިފަކުރެއްވީ ހިތްތިރި، އިހްލާސްތެރި އަދި ހިތްވަރުގަދަ ބޭފުޅެއްގެ ގޮތުގައެވެ. އަދި ރާއްޖެ އަށް ޑިމޮކްރަސީ ގެނައުމަށް ކުރި ދަތުރުގައި ހުސެއިން މުހިއްމު ދައުރެއް އަދާކުރައްވާފައިވާކަންވެސް މިނިސްޓަރ ޝާހިދު ފާހަގަކުރެއްވިއެވެ.
Deeply grieved by passing of my dearest friend Hon. Hussain Waheed MP. He was a person of humility, sincerity & great courage - a champion of the democracy movement. I shall miss him dearly.
— Abdulla Shahid (@abdulla_shahid) December 13, 2021
Sincere condolences to family. May Allah SWT grant Hussain Jannath al Firdhouse. Amen! pic.twitter.com/FrTrl4QDKk
މަޖިލީހުގައި ހިމެނިވަޑައިގަންނަވާ އިދިކޮޅު ޕީޕީއެމް ޕީއެންސީގެ މެމްބަރުންވެސް ގެންދަވަނީ ހުސެއިން އަވަހާރަވުމުން އެ ހިތާމައިގައި ބައިވެރިވެޑައިގަންނަވަމުންނެވެ.
އަޅުގަނޑުގެއަޚު ކޮމަންޑޫ ދާއިރާ މެންބަރު ހުސެއިން ވަޙީދު ކެންސަރުބަލީގެ އާލާސްކަންފުޅުގައި އަވަހާރަވި ޚަބަރުލިބުނީ ފުންހިތާމައާއިއެކު. މަރުޙޫމަށް ސުވަރުގޭގެ ދާޢިމީ ނިޢުމަތް މިންވަރުކުރައްވާ ޢާއިލާއަށް ކެތްތެރިކަން ދެއްވާށި. އާމީން
— Ahmed Shiyam (@Shiyamaldives) December 13, 2021
إِنَّا لِلَّٰهِ وَإِنَّا إِلَيْهِ رَاجِعُونَ
17 ވަނަ ރައްޔިތުންގެ މަޖިލީހުގައިވެސް ކޮމަންޑޫ ދާއިރާ ތަމްސީލުކުރެއްވި މެމްބަރަކީ ހުސެއިން ވަހީދެވެ. އޭގެ ފަހުން އެއް ދައުރުގެ މެދު ކެނޑުމަކަށްފަހު އަނެއްކާވެސް ކޮމަންޑޫ ދާއިރާގެ ގޮނޑި ހުސެއިން ކާމިޔާބުކުރެއްވިއެވެ.
ހުސެއިން ވަހީދުގެ އަނބިކަނބަލުންގެ އިތުރުން ފިރިހެން ބޭފުޅަކާއި އަންހެން ދެ ބޭފުޅުން ދުނިޔޭގައި އެބަ ތިއްބެވިއެވެ.