ސަރުކާރުން ކ.ގާފަރުގައި ޤާއިމްކޮށްފައިވާ 25 ޓަނުގެ އައިސް ޕްލާންޓް ރައީސުލްޖުމްހޫރިއްޔާ އިބްރާހީމް މުޙަައްމަދު ޞާލިޙް، ހުޅުއްވައި ދެއްވައިފިއެވެ.
އެމަނިކުފާނުގެ އަރިހުގައި ރައީސުލްޖުމްހޫރިއްޔާގެ ނައިބު ފައިޞަލް ނަސީމާއި ބައެއް ވަޒީރުންވެސް މި ރަސްމިއްޔާތުގައި ބައިވެރިވެވަޑައިގެންފައިވެއެވެ.
މި ސަރަޙައްދުގެ ގިނަ މަސްވެރިންނަށް އައިސް ހޯދުމުގައި އިތުރު ލުއި ފަސޭހަތަކެއް ފޯރުކޮށްދިނުމުގެ ގޮތުން ގާފަރުގައި ޤާއިމުކޮށްފައިވާ އައިސް ޕްލާންޓަކީ 25 ޓަނުގެ އައިސް އުފައްދާ އަދި 50 ޓަނުގެ ސްޓޯރޭޖް ކެޕޭސިޓީގެ އައިސް ޕްލާންޓެކެވެ. ސަރުކާރުން 3.5 މިލިއަން ރުފިޔާ ޚަރަދުކޮށްގެން ޤާއިމްކުރި މި އައިސް ޕްލާންޓަކީ މިނިސްޓްރީ އޮފް ފިޝަރީސް، މެރިން ރިސޯސަސް އެންޑް އެގްރިކަލްޗަރއިން މިފްކޯއާ ޙަވާލުކޮށްގެން ކުރިޔަށްގެންދިޔަ މަޝްރޫޢެކެވެ.
އައިސްޕްލާންޓް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ފިޝަރީޒް މިނިސްޓަރ ޑރ.ޙުސައިން ރަޝީދު ޙަސަން ވިދާޅުވީ ސަރުކާރު އައިރު މުޅި ރާއްޖޭގައި އައިސް އުފެއްދޭ ކެޕޭސިޓީއަކީ 1600 ޓަން ކަމަށެވެ. ނަމަވެސް ސަރުކާރުން އަލަށް ޤާއިމްކުރި އައިސްޕްލާންޓާއެކު އައިސް އުފެއްދޭ މިންވަރު އިތުރުވެފައިވާކަމަށް ވިދާޅުވެފައެވެ. އެގޮތުން މިސަރުކާރުން މިހާތަނަށް 225 ޓަނުގެ އައިސް އުފެއްދޭނެ ނިޒާމް ޤާއިމްކޮށްފައިވާކަމަށް ވިދާޅުވިއެވެ.
އައިސް ޕްލާންޓް ހުޅުއްވައިދެއްވުމަށްފަހު ރައީސުލްޖުމްހޫރިއްޔާ ވަނީ ގާފަރުގައި ދެ ޖިންސުގެ މީހުންނަށް އަމާޒުކޮށްގެން ކުރިޔަށްގެންދިޔަ މަސްކެނޑުމުގެ މުބާރާތް ޝަރަފުވެރިކޮށްދެއްވާފައެވެ. ރައީސުލްޖުމްހޫރިއްޔާގެ އަރިހުގައި ރައީސުލްޖުމްހޫރިއްޔާގެ ނައިބުވެސް ވަނީ މި މުބާރާތް ބައްލަވާލައްވާފައެވެ. މަސްވެރިންގެ ދުވަހުގެ ޙަރަކާތްތަކުގެ ތެރެއިން ރައީސުލްޖުމްހޫރިއްޔާގެ ނައިބު ވަނީ ގާފަރު މޮނިއުމެންޓް ވެސް ހުޅުއްވައިދެއްވާފައެވެ. މި މޮނިއުމެންޓުން ރަމްޒުކޮށްދެނީ ގާފަރަކީ މަސްވެރި ރަށެއްކަމާއި، އެކުވެރި ރައްޔިތެއް އުޅޭ މެހެމާންދާރީ ރަށެއްކަމެވެ.
މީގެ އިތުރުން ރައީސުލްޖުމްހޫރިއްޔާ ވަނީ މަސްވެރިންގެ ދުވަހާއި ގުޅުވައިގެން މިިނިސްޓްރީ އޮފް ފިޝަރީސް، މެރިން ރިސޯސަސް އެންޑް އެގްރިކަލްޗަރއިން ގާފަރުގައި އިންތިޒާމުކޮށްގެން ކުރިޔަށްގެންދާ ފިޝަރީޒް އެކްސްޕޯއަށް ޒިޔާރަތްކުރައްވައި އެތަން ބައްލަވާލައްވާފައެވެ. ރައީސުލްޖުމްހޫރިއްޔާގެ އަރިހުގައި ރައީސުލްޖުމްހޫރިއްޔާގެ ނައިބުވެސް ވަނީ މި އެކްސްޕޯއަށް ޒިޔާރަތްކުރައްވާފައެވެެ.
މި އެކްސްޕޯގައި މަސްވެރިކަމާއި ގުޅޭ ވިޔަފާރިތަކުގެ 8 ސްޓޯލެއް ޤާއިމުކޮށްފައިވާއިރު ރައީސުލްޖުމްހޫރިއްޔާ ވަނީ މިފްކޯ ސްޓޯލަށް ޒިޔާރަތްކުރައްވައި ފަސް އައު ޕްރޮޑަކްޓެއް ލޯންޗް ކޮށްދެއްވާފައެވެ. މިފްކޯ ސްޓޯލްގެ އިތުރުން، އެންސިސްގެ ސްޓޯލަކާއި، ހޮރައިޒަން ފިޝަރީޒްގެ ސްޓޯލަކާއި، މައިޒާން އިލެކްޓްރޯނިކްސްގެ ސްޓޯލަކާއި، ޓަރމޯޑިޒޭން މޯލްޑިވްސްގެ ސްޓޯލަކާއި، ނޫ ރާއްޖެ ޕްރޮގްރާމްގެ ސްޓޯލަކާއި، އޫރިދޫގެ ސްޓޯލެއްގެ އިތުރުން ގާފަރުގެ ފަންނުވެރިންގެ ސްޓޯލެއް ހިމެނެއެވެ.
މީގެއިތުރުން ރައީސުލްޖުމްހޫރިއްޔާ ވަނީ މިރޭ ބޭއްވުމަށް ހަމަޖެހިފައިވާ މަސްވެރިންގެ ދުވަހުގެ ރަސްމީ ޖަލްސާ ޝަރަފުވެރިކޮށްދެއްވުމަށްވެސް ހަމަޖެހިފައެެވެ. އެމަނިކުފާނުގެ އަރިހުގައި ރައީސުލްޖުމްހޫރިއްޔާގެ ނައިބު ފައިޞަލް ނަސީމާއި ބައެއް ވަޒީރުންވެސް މި ރަސްމިއްޔާތުގައި ބައިވެރިވެވަޑައިގަންނަވާނެއެވެ.