އައްޑޫސިޓީގެ ހުޅުމީދުއާއި ފޭދުއާދެމެދު ސައިކަލް ފެރީގެ ޚިދުމަތް ދޭންފަށައިފިއެވެ.
އެމްޓީސީސީން ދެމުންދާ މިޚިދުމަތް ދިނުމުގައި ބޭނުންކުރާ ސައިކަލު ފެރީގައި 15 ސައިކަލުގެ ޖާގައިގެ އިތުރުން 60 ފަސިންޖަރުން އުފުލޭނެކަމަށް އެމްޓީސީސީން ވިދާޅުވެއެވެ. މީގެއިތުރުން އޮއިވަރަށް އަންނަ ބަދަލުތަކާއެކުވެސް ދަތިތަކެއް ނެތި ސައިކަލްތައް ފެރީއަށް އެރުވޭނެފަދަ ޚާއްސަ ލިފްޓެއް ފެރީ ފުރާ ސަރަޙައްދުގައި ހުންނާނެކަމަށް އެކުންފުނިން ވިދާޅުވެއެވެ.
ހުކުރު ދުވަސް ފިޔަވައި ހަފްތާގެ ހުރިހާދުވަހެއްގައި ސައިކަލް ފެރީގެ ޚިދުމަތް ފޯރިކޮށްދެވޭނެކަމަށް އެމްޓީސީސީން ވިދާޅުވިއެވެ. އަދި ސައިކަލް ފެރީގެ ޚިދުމަތުގެ އަގަކީ، ކޮންމެ ސައިކަލަކަށް 20 ރުފިޔާއެވެ.
ސައިކަލް ފެރީގެ ޚިދުމަތް ފޯރުކޮށްދިނުމަށް އެކުންފުނިން ތާވަލުކޮށްފައިވާ ގޮތުގައި ހުޅުމީދުއާއި ފޭދުއާ ދެމެދު ދުވާލަކު 3 ދަތުރު ކުރުމަށް ވަނީ ހަމަޖެހިފައެވެ. މީގެ އިތުރުން ކުރިއަށް އޮތް 2 މަސްދުވަހުގެތެރޭގައި ފަސިންޖަރުން އިތުރުވާނަމަ ޝެޑިއުލަށް ބަދަލުއައުން އެކަށީގެންވާކަމަށް އެކުންފުނިން ވަނީ ވިދާޅުވެފައެވެ.
ދަތުރުފަތުރުގެ ޚިދުމަތް ފޯރުކޮށްދޭ އެންމެބޮޑު ކުންފުނީގެ ހައިސިއްޔަތުން އެމްޓީސީސީގެ އެންމެބޮޑު މަޤްސަދަކީ މިޚިދުމަތުގެ ސަބަބުން ހެޔޮއަގުގައި ފަސޭހަކަމާއެކު ކަނޑާއި އެއްގަމުގެ ދަތުރުފަތުރު، ރައްޔިތުންނަށް ކުރެވޭނެ މަގު ތަނަވަސްކޮށްދެއްވުންކަމަށް އެމްޓީސީސީން ވިދާޅުވެއެވެ.