ޕެރިސް ސެއިންޓް ޖަރމެއިން އަށް ކުޅެ ބްރެޒިލްގެ ތަރި ނޭމާގެ ފަލަށް ލިބުނު އަނިޔާ އަކާއި ގުޅިގެން އަށް ހަފްތާއަށް ކުޅުމާއި ފުރަށް ދާން ޖެހިއްޖެއެވެ.
ނޭމާގެ ފަޔަށް އަނިޔާ ވެފައިވަނީ ފްރެންޗް ލީގް އާން ގައި އެންމެ ފަހުން ސެއިންތް އެޓިއޭން އާއި ބައްދަލުކޮށް 3 ލަނޑު އެއްލަނޑުން މޮޅުވި މެޗްގެ ފަހު ވަގުތުކޮޅުގެ ތެރެގައެވެ. މިއަނިޔާގެ ސަބަބުން ނޭމާއަށް ޕީއެސްޖީއިން ލިގުގައި ކުޅޭ ހަތް މެޗާއި ޗެމްޕިއަންސް ލީގުގެ އެއްމެޗް ގެއްލޭނެއެވެ. މިގޮތުން އަނިޔާއަށްފަހު ހެދި ޓެސްޓް ތަކުން އޭނާގެ ވައަތު ފައިގެ ތަނބިކައްޓަށް ވަނީ ވަރަށް ބޮޑަށް އަނިޔާވެފައެވެ. ޕީއެސްޖިއިން ވަނީ އިތުރު ތަފްސީލް އެނގޭނީ 72 ގަޑިއިރު ފަހުން ކަމަށްވެސް ހާމަކޮށްފައެވެ.
މިވަގުތު ޕީއެސްޖީ އުޅެނީ ލީގު އާން ގައި 12 ޕޮއިންޓުގެ ލީޑެއްގައެވެ. އަދި ޗެމްޕިއަންސް ލިގުގައި ގްރޫޕްގެ ދެވަނަ ޓީމުގެގޮތުގައި ދެވަނަ ބުރުގެ ޖާގައެއް މިހާރުވަނީ ކަށަވަރު ވެފައެވެ. ޗެމްޕިއަންސް ލީގުގެ ގްރޫޕް ސްޓޭޖްގެ ފަހު މެޗްގައި ޕީއެސްޖީ ޑިސެމްބަރ ހަތެއްގައި ނިކުންނާނީ ކްލަބް ގްރޫޖް އާއި ދެކޮޅަށެވެ.