އިޓަލިއަން ސެރީއާގައި ސަސުއޮލޯ އާއި އޭސީ މިލާން ބައްދަލުކުރިމެޗުން މިލާން ބަލިވެ ޕޮއިންޓް ތާވަލްގެ އެއްވަނައިގާ އުޅޭ ނަޕޯލީއާއި ދެމެދުގައިވާ ފަރަގު ބޮޑުވެއްޖެއެވެ. މިލާންގެ ދަނޑުގައި ކުޅުނު މިމެޗް ސަސުއޮލޯ ކާމިޔާބު ކުރީ ފަހަތުން އަރާ 3 ލަނޑު އެއްލަނޑުންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ދެޓީމްގެ ފަރާތުންވެސް ފެނިގެންދިޔައީ ވަރަށް ހަމަހަމަ ކުޅުމެކެވެ. މިމެޗްގެ ފުރަތަމަ ލަނޑު މެޗްގެ 21 ވަނަ މިނެޓްގައި ޖަހާ ލީޑު ނެގީ މިލާންގެ ކެޕްޓަން އެލޭސިއޯ ރޮމަގްނޯލީއެވެ. ނަމަވެސް މިލަނޑު ޖެހިތާ ތިން މިނެޓްފަހުން ސަސުއޮލޯގެ ޖިއާންލޫކާ ސްކަމަކާ ވަނީ ލަނޑެއް ޖަހާ މެޗްގެ ނަތީޖާ ހަމަހަމަކޮށްފައެވެ. އަދި މިމެޗުގެ ލީޑު ސަސުއޮލޯއިން ނެގީ މެޗްގެ 33 ވަނަ މިނެޓްގައި މިލާންގެ ޑިފެންޑަރ ސައިމަން ކިއާ އަތުން ބައިކޮޅަށް ވަން ލަނޑަކުންނެވެ. އަދި މިމެޗްގައި އެޓީމުގެ ފަހު ލަނޑު މެޗްގެ 66 ވަނަ މިނެޓްގައި ޖަހާދިނީ ޑޮމެނިކޯ ބެރާޑީއެވެ. އަދި މެޗްގެ 77 ވަނަ މިނެޓްގައި ކުރި ފައުލަކާއި ގުޅިގެން މިލާންގެ ކެޕްޓަން ރޮމަގްނޯލީއަށްވަނީ ސީދާ ރަތް ކާޑެއް ދައްކާފައެވެ.
މިމެޗުން ބަލިވުމުން މިލާން މިހާރު އުޅެނީ 14 މެޗުން ލިބިފައިވާ 32 ޕޮއިންޓާއެކު ތާވަލްގެ ދެވަނައިގައެވެ. އަދި މިއީ އެޓީމް ޖެހިޖެހިގެން ބަލިިވި ދެވަނަ މެޗެވެ. މިމެޗުން ލިބުނު ތިން ޕޮއިންޓާއެކު ސަސުއޮލޯ މިހާރު އުޅެނީ 18 ޕޮއިންޓާއެކު ތާވަލްގެ 12 ވަނައިގައެވެ.