ކަރަބާއޮ ކަޕް ފުޓްބޯޅަ މުބާރާތުގެ ކުއާޓަރ ފައިނަލުން ޗެލްސީ ޖާގަހޯދައިފިއެވެ. މިމުބާރާތުގެ ކުއާޓަރ ފައިނަލުން ޗެލްސީ ޖާގަހޯދީ ސައުތުހެމްޓަން އާއި ބައްދަލުކުރިމެޗް އެއްލަނޑު އެއްލަނޑުން އެއްވަރު ވުމުން ޕެނަލްޓީ ޖަހައިގެން 4 ލަނޑު 3 ލަނޑުންނެވެ.
ޗެލްސީއިން އެންމެފަހުން ލީގުގައި ނޯވިޗް އާއި ބައްދަލު ކޮށް 7 ލަނޑު ސުންލަނޑުން މޮޅުވި މެޗްގައި ވާދަކުރި ކުޅުންތެރިންނަށް ހަ ބަދަލެއް ގެނެސްގެން ކުޅުނު މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ޗެލްސީއެވެ. މިމެޗްގެ ފުރަތަމަ ލަނޑު މެޗްގެ 44 ވަނަ މިނެޓްގައި ޖަހައި ލިޑު ނެގީ ޗެލްސީގެ ކައި ހަވާޓްޒްއެވެ. ނަމަވެސް ސައުތުހެމްޓަނުން ވަނީ ދެވަނަ ހާފްގެ ކުޅުން ފެށިތާ ދެވަނަ މިނެޓްގައި ލަނޑެއް ޖަހާ މެޗުގެނަތީޖާ ހަމަހަމަކޮށްފައެވެ. މިލަނޑު އެޓީމަށް ޖަހައިދިނީ ޗޭ އެޑަމްސްއެވެ. މިމެޗްގައި މީގެ އިތުރުންވެސް ލަނޑު ޖަހާނެ ރަނގަޅު ފުރުސަތު ދެޓީމަށް ލިބުނު ނަމަވެސް އެއިން އެއްވެސް ހަމަލާއެއް ކާމިޔާބު ކުރެވޭގޮތެއް ނުވިއެވެ. މިމެޗްގައި ޗެލްސީއިން ޖެހި ހުރިހާ ޕެނަލްޓީއެއް ކާމިޔާބު ކުރިއިރު ސައުތުހެމްޓަންގެ ތިއޯ ވެލްކޮތާއި، ވިލް ސްމޯލްބޯން ޖެހި ޕެނަލްޓީ ކާމިޔާބެއް ނުވިއެވެ.
މިމުބާރާތުގެ ކުއާޓަރ ފައިނަލްގައި ޗެލްސި ބައްދަލުކުރާ ޓީމެއް އެނގޭނީ އަންނަ ހޮނިހިރު ދުވަހު ބާއްވާ ގުރުއަތަށް ފަހުއެވެ.