އަފްޣާނިސްތާނަށް އެހީތެރިކަން ފޯރުކޮށްދިނުމަށް ސަރަޙައްދީ 10 ޤައުމަކުން އެއްގަލަކަށް އަރައިފިއެވެ.
ރަޝިޔާގެ ވެރިރަށް މޮސްކޯގައި ބޭއްވި މަތީފަންތީގެ ބައްދަލުވުމެއްގައި އަފްޣާނިސްތާނުގައި ވެރިކަންކުރާ ޠާލިބާން ޖަމާޢަތުގެ އިތުރުން ރަޝިޔާއާއި ޗައިނާއާއި ޕާކިސްތާނާއި އިންޑިޔާއާއި ކުރީގެ ރޫސީވިލާތުގައި ހިމެނޭ ކަޒަކިސްތާނާއި ކިރްގިސްތާނާއި ތުރުކުމަނިސްތާނާއި އުޒްބަކިސްތާނުގެ މަތީފަންތީގެ ވަފުދުތައްވަނީ ބައިވެރިވެފައެވެ. އެ ބައްދަލުވުމުގައި އެ ޤައުމުތަކުންވަނީ އަފްޣާނިސްތާނަށް އެހީތެރިކަން ފޯރުކޮށްދިނުމުގެ އިތުރުން އެ ޤައުމު އާރާސްތުކުރުމަށް މާލީ އެހީ ހޯދުމަށް އދން އިސްނަގައިގެން ބައްދަލުވުމެއް ބޭއްވުމަށް ގޮވާލައިފައެވެ. އަދި ޢިޤްތިޞާދީ އަދި އިންސާނީ ބޮޑު ކާރިޘާއަކުން އަފްޣާނިސްތާން ސަލާމަތްކުރުމަށް ބައިނަލްއަޤްވާމީ މުޖުތަމަޢުން ހިފަހައްޓާފައިވާ އެ ޤައުމުގެ މުދަލާއި ފައިސާ ދޫކުރުމަށްވެސްވަނީ ގޮވާލައިފައެވެ. އެ ޤައުމުތަކުން ބުނެފައިވަނީ އަފްޣާނިސްތާން އާރާސްތުކުރުމަށް އެންމެ ބޮޑު އެހީތެރިކަމެއް ފޯރުކޮށްދޭން ޖެހޭނީ 2001ވަނަ އަހަރު އެ ޤައުމު އިސްތިޢުމާރުކުރި ޤައުމުތަކުންކަމަށެވެ.
އެ ބައްދަލުވުމުގައި އެމެރިކާއިން ބައިވެރިނުވި ނަމަވެސް އެ ޤައުމުން ބުނެފައިވަނީ މުސްތަޤްބަލުގައި ބާއްވައި އެފަދަ ބައްދަލުވުމެއްގައި އެ ޤައުމުން ފަހަރުގައި ބައިވެރިވެދާނެކަމަށެވެ.