ދެނުކު އިރުމަތީ އޭޝިޔާގެ ޤައުމުތަކުގެ މައްޗަށް އެކުލެވޭ އާސިޔާންގެ އެންމެ އިސްވެރިންގެ ބައްދަލުވުމުގައި ބަައިވެރިވެވަޑައިގަތުމުގެ ދަޢުވަތު މިޔަންމާގެ އަސްކަރީވެރިޔާ މިން އައުންގް ހިޔަންގަށް ނުދިނުމަށް ނިންމައިފިއެވެ.
މިދިޔަ ފެބުރުއަރީ މަހުގެ 1ވަނަ ދުވަހު މިޔަންމާގައި ކުރި އަސްކަރީ ބަޣާވާތުގެ މޭސްތިރިޔާކަމަށްވާ މިން އައުންގް ހިޔަންގަށް ދަޢުވަތު ނުފޮނުވަން ނިންމާފައިވަނީ އާސިޔާންގެ ޚާރިޖީ ވަޒީރުންގެ މެދުގައި ބޭއްވި ކުއްލި ބައްދަލުވުމެއްގައެވެ. ޤައުމުތަކުގެ ދާޚިލީ މައްސަލަތަކާ ޢާއްމު ގޮތެއްގައި ނުބެހޭ އާސިޔާނުން ނިންމާފައިވަނީ ސިޔާސީ ވިސްނުން ނުގެންގުޅުއްވާ ބޭފުޅަކަށް އެ ދަޢުވަތު ދިނުމަށެވެ. ނަމަވެސް ދަޢުވަތު ފޮނުވާނެ ވަކި ބޭފުޅެއް އާސިޔާނުން ހާމަކޮށްފައެއް ނުވެއެވެ.
އާސިޔާނުގެ މެންބަރު ޤައުމެއްކަމަށްވާ ސިންގަޕޫރުން ބުނެފައިވަނީ މިން އައުންގް ހިޔަންގަށް ދަޢުވަތު ނުފޮނުވުމަކީ ކުރަން އުނދަގޫ ނަމަވެސް ކޮންމެހެންވެސް ކުރަންޖެހޭކަމެއްކަމަށެވެ. އަދި މިޔަންމާއަށް ހަމަޖެހުންގެނައުމަށް އާސިޔާނުން ތަންފީޒުކުރަން މަސައްކަތްކުރި އެއްވެސް ކަމެއް ޙާޞިލުނުވާކަމަށްވެސް ސިންގަޕޫރުން ބުނެފައިވެއެވެ.
ދިހަ ޤައުމުގެ މައްޗަށް އެކުލެވޭ އާސިޔާނުގެ ރިޔާސަތު ބަލަހައްޓާ ބުރޫނާއީން ބުނީ މިޔަންމާގައި އުފެދިފައިވާ ސިޔާސީ ބައިބައިވުންތަކުގެ ސަބަބުން ސިޔާސީ ބޭފުޅަކަށް ދަޢުވަތު ދިނުމަކީ އެންމެ ރަނގަޅު ގޮތް ނޫންކަމަށެވެ.
އާސިޔާންގެ އެންމެ އިސްވެރިންގެ ބައްދަލުވުން ބޭއްވުމަށް ހަމަޖެހިފައިވަނީ އޮކްޓޯބަރު މަހުގެ 26ން 28އަށެވެ.