ދިވެހި ތާރީޚުގެ ތެރެއިން ދިވެހި ޤައުމު ޕޯޗިގީޒުންގެ އަތް ދަށުން ސަލާމަތްކުރުމަށް ބޮޑުތަކުރުފާނު ވެވައިޑައިގެން ޖިހާދުގެ މައްޗަށް ބިނާކޮށް "ބޮޑުތަކުރުފާނު" ނަމުގައި ހޯމް މިނިސްޓްރީން ގެނެސްދިނުމަށް ހަމަޖެހިފައިވާ ފިލްމް އިފްތިތާޙުކޮށްފިއެވެ.
މިކަން އިފްތިތާޙުކޮށްދެއްވީ އުތީމުގައި ބޭއްވި ޤައުމީ ދުވަހުގެ ޚާއްސަ ޖަލްސާގައި ހޯމް މިނިސްޓަރ އިމްރާން އަބްދުﷲއެވެ.
"ބޮޑުތަކުރުފާނު" މި ފިލްމަކީ ދިވެހި ތާރީޚު ދިރުވާ އާލާކޮށް، އޭރުގެ ދިވެހި ޤައުމުދެކެ ލޯބިވި ދަރީންގެ ހިތްވަރާއި އަޒުމް އަންނަން އޮތް ޖީލުތަކަށް ވާސިލްކޮށްދިނުމަށް ހޯމް މިނިސްޓްރީން ކުރިއަށްގެންދިއުމަށް ނިންމާފައިވާ ބޮޑު ޕްރޮޖެކްޓެކެވެ.
ޤައުމީ ދުވަސް އުތީމުގައި ކޮންމެ އަހަރަކުވެސް ކުލަގަދަކޮށް ފާގަކުރަމުން އަންނައިރު، މިއަހަރު އުތީމުގައި ބޭއްވި ޤައުމީ ދުވަހުގެ ޚާއްސަ ޖަލްސާ ޝަރަފުވެރިކޮށްދެއްވީ ހޯމް މިނިސްޓަރ އިމްރާން އަބްދުﷲއެވެ. މިނިސްޓަރ އިމްރާންގެ ވާހަކަފުޅުގައި ވިދާޅުވީ، ދިވެހި ބިމާއި ދީން ޙިމާޔަތްކުރުމަށްޓަކައި މަސައްކަތް ކުރެއްވި ކޮންމެ ބޭފުޅަކީ އެމީހުންގެ ޖާނާއި މާލު ޤައުމަށްޓަކާއި ޤުރުބާންކުރަން ތައްޔާރަށް ތިބެ ކުރީ ސަފަށް ނިކުތް ބޭފުޅުންކަމަށެވެ.
މުޙައްމަދު ތަކުރުފާނުގެ ޤައުމީ ޖިހާދުގެ މައްޗަށް "ބޮޑުތަކުރުފާނު" ފިލްމް އުފައްދަން ނިންމައި, ފިލްމް އިފްތިތާހުކޮށްފިhttps://t.co/UEEzd67cJ1 pic.twitter.com/IsuPUTLmV4
— Home Ministry, MV (@HomeMinistrymv) October 7, 2021
ދިވެހި ފަތްފުއްތަކުންވެސް އެންމެ ފާހަގަކުރެވޭ، ދިވެހިންގެ ޤައުމީ ދުވަހުގެ ބަތަލު އައްޞުލްތާނުލް ޢާޒީ މުޙައްމަދު ތަކުރުފާނުގެ ދިރިއުޅުމުގެ ކޮންމެ ކަމަކީވެސް އެއިން އިބްރަތް ހާސިލްވާ މުހިންމު ކަންތައްތައްކަމަށް މިނިސްޓަރ ވިދާޅުވިއެވެ. އަދި ކާބަފައިގެން ސިފަތަކާއި ހަމަތައް ދަމަހައްޓާ ޖީލެއް ބިނާކުރުމަށް އެންމެ އެކުގައި މަސައްކަތް ކުރެއްވުމަށް މިނިސްޓަރ ގޮވާލެއްވިއެވެ.
ބޮޑުތަކުރުފާނުގެ ދިރިއުޅުމުގެ މައްޗަށް ބިނާކޮށް ގެނެސްދިނުމަށް ހަމަޖެހިފައިވާ ފިލްމަކީ، ގައުމަށްޓަކާ ގުރުބާންވި ދަރިއެއްގެ ވާހަކަ ގެނެސްދީ އެއިން މިހާރުގެ ޒުވާނުންނަށް އެތައް އިބުރަތެއް ލިބޭނެ ފިލްމެއްކަން މިނިސްޓަރ ފާހަގަކުރެއްވިއެވެ.
""މިއީ ބޮޑުތަކުރުފާނުގެ ޖިހާދާ ޤުރުބާނީ ޒަމާނުގެ ވިސްނުމާ އެއްގޮތަށް ޅަދަރިންނާ ހަމައަށް ގެނައުމަށް ފެށި ޕްރޮޖެކްޓެއް. މިއީ މުޅި ޖިހާދުވެގެތެރެއިން މީހުން ބިނާކޮށް އުފެއްދެވި ބޭފުޅެއް. ދިނާ ޤައުމަށްޓަކާ އަމިއްލައަށް ޤުރުބާންވާންޖެހޭކަމުގެ އެތަށް މިސާލެއް." މިނިސްތަރ ވިދާޅުވިއެވެ.
ޤައުމީ ޖަލްސާގެ ތެރެއިން އުތީމު ކައުންސިލްގެ ފަރާތުން ވަނީ ހޯމް މިނިސްޓަރ އިމްރާން އަބްދުﷲއަށް ޚާއްސަ ހަނދާނީ ފިލައެއް އަރުވާފައެވެ.
އުތީމުގަ ބޭއްވި ޖަލްސާގައި އަތޮޅުތެރޭގެ ހުރިހާ ރަށްތަކުން ބައިވެރިވިއެވެ. އަދި ޤައުމީ ދުވަހާއި ގުޅިގެން އުތީމުގައި އެކިއެކި ހަރަކާތްތައް އަންނަނީ ހިންގަމުންނެވެ.