ހަރުކަށި ފިކުރު ހުއްޓުވުމަށް ތަޢުލީމީ ނިޒާމަށް ބަދަލުތަކެއް ގެންނަންޖެހޭ - ޑރ.އިބްރާހީމް ޙަސަން
ޓެރަރިޒަމާއި ހަރުކަށިފިކުރު ހުއްޓުވުމަށް ތަޢުލީމީ ނިޒާމުގެ ތެރެއިން މަސައްކަތް ކުރަންޖެހޭކަމަށް ހަޔަރ އެޑިއުކޭޝަން މިނިސްޓަރ ޑރ.އިބްރާހީމް ޙަސަން ވިދާޅުވެއްޖެއެވެ. މިނިސްޓަރ މިހެން ވިދާޅުވީ، ސަޢުދީ ޢަރަބިއްޔާގެ ނާއިފް ޢަރަބް ޔުނިވަރސިޓީ ފޮރ ސެކިޔުރިޓީ ސައިންސަސް އާއި ނޭޝަނަލް ކައުންޓަރ ޓެރަރިޒަމް ސެންޓަރ ގުޅިގެން "ދަ އިންޓަރނޭޝަނަލް ޕްރޮގްރާމް ފޮރ ކޮމްބެޓިންގ އެކްސްޓްރީމިޒަމް އެންޑް ޓެރަރިޒަމް"ގެ ނަމުގައި ފެށި މަސައްކަތު ބައްދުލުވުމުގައި ވާހަކަފުޅު ދައްކަވަމުންނެވެ.
"ދަ އިންޓަރނޭޝަނަލް ޕްރޮގްރާމް ފޮރ ކޮމްބެޓިންގ އެކްސްޓްރީމިޒަމް އެންޑް ޓެރަރިޒަމް" މަސައްކަތު ބައްދަލުވުމަކީ، ޓެރަރިޒަމްއާއި ހަރުކަށިފިކުރު ހުއްޓުވައި ތަހައްމަލުކުރުމުގެ ސިފަތައް ލިބިފައިވާ އަމާން ބަދަހި މުޖުތަމައެއް ޤާއިމްކުރުމުގައި ދީނީ ޢިލްމުވެރިންނާއި ތަޢުލީމީ ދާއިރާގައި މަސައްކަތްކުރާ ބޭފުޅުންގެ ދައުރާގުޅޭގޮތުން މަޢުލޫމާތު ޙިއްޞާކުރުމުގެ މަޤްޞަދުގައި ފެށި މަސައްކަތު ބައްދަލުވުމެކެވެ. އަދި މި މަސައްކަތުގައި ޙަރަކާތްތެރިވާ ސަރުކާރުގެ މުއައްސަސާތަކާއި މަދަނީ ޖަމްޢިއްޔާތަކުގެ އިންސާނީ ވަޞީލަތް ތަރައްޤީކުރުމަކީވެސް މި މަސައްކަތު ބައްދަލުވުމުގެ މަޤްޞަދެކެވެ.
މި މަސައްކަތު ބައްދަލުވުން އިފްތިތާޙުކުރުމުގެ ރަސްމިއްޔާތުގައި ވާހަކަފުޅުދައްކަވަމުން ހަޔަރ އެޑިޔުކޭޝަން މިނިސްޓަރ ޑރ.އިބްރާހީމް ޙަސަން ވަނީ، ޓެރަރިސްޓް ޖަމާޢަތްތަކުން މީހުން ރެކްރޫޓުކުރުމަށާއި ޙަމަލާތައް ރޭވުމަށް އިންޓަރނެޓާއި ސޯޝަލްމީޑިޔާ ބޭނުންކުރަމުންދާކަން ފާހަގަކުރައްވާ އެންމެން އެފަދަ ކަންކަމަށް ސަމާލުވުމަށް އިލްތިމާސްކުރައްވާފައެވެ.
މިނިސްޓަރ ވިދާޅުވީ، ތަޢުލީމީ ނިޒާމުގެ ތެރެއިން ކްރިޓިކަލް ތިންކިންގގެ ހުނަރުތައް އަށަގަންނުވައި، އަނިޔާވެރިކަމާއި ދުރުވުމަށާއި، ޤަނޫނުތަކާއި އިންސާނީހައްޤުތައް ޒުވާނުންނަން އުންގަންނައިދިނުމަކީ ވަރަށް މުހިއްމުކަމެއްކަމަށެވެ. އެގޮތުން ޓެރަރިޒަމްއާއި ހަރުކަށިފިކުރު ހުއްޓުވުމަށް ތަޢުލީމީ ނިޒާމުގެ ތެރެއިން މަސައްކަތް ކުރަންޖެހޭކަމަށް މިނިސްޓަރ ވިދާޅުވިއެވެ. މިނިސްޓަރ ވަނީ މިފަދަ ކަންކަމުން އަރައިގަނެ ހުއްޓުވުމަށް މުޅި މުޖުތަމަޢުގެ ޒިންމާ ބޮޑުކަމަށެވެ. އެގޮތުން ކޮންމެ މީހެއްގެ ސަލާމަތާއި ރައްކާތެރިކަމަށް ފަރުދީ ފެންވަރުގައިވެސް ވިސްނަންޖެހޭކަން ފާހަގަކުރައްވައި މިނިސްޓަރ ވަނީ ސޯޝަލް މީޑިއާގެ ވަސީލަތްތަކުން ލިބޭ އެކި މަޢުލޫމާތުތަކުގެ ސައްޙަކަން ކަށަވަރުކުރުމަށްވެސް ގޮވާލައްވާފައެވެ.
"މުޅި ދުނިޔެއަށް ކުރިމަތިވެފައިފާ ޓެރަރިޒަމާއި ހައްދުފަހަނަ އެޅުމުގެ ފިކުރަށް، ރެކްރޫޓުކުރާ ގޮތްތައް މިވަނީ ވަރަށް ބޮޑަށް ބަދަލުވެފައި. މިހާރު އެމީހުންގެ އަމާޒަކަށްވެފައިވަނީ ސޯޝަލް މީޑިއާގެ އެކި ވަސީލަތްތައް ބޭނުންކޮށްގެން ޒުވާނުން އެކަންކަމަށް ރެކްރޫޓްކުރުން. މިކަންކަން ހުއްޓުވުމަށް ސޯޝަލް މީޑިއާގެ އެކި ވަސީލަތްތަކުން ހޯދާ ނުވަތަ ލިބޭ މަޢުލުމާތުގެ ސައްޙަކަން ކަށަވަރުކުރުން މުހިންމު." ޑރ.އިބްރާހީ ޙަސަން ވިދާޅުވިއެވެ.
މި މަސައްކަތު ބައްދަލުވުމުގައި ވާހަކަފުޅު ދައްކަވަމުން ނެޝަނަލް ކައުންޓަރ ޓެރަރިޒަމް ސެންޓަރގެ ޑިރެކްޓަރ ޖެނެރަލް ބްރިގޭޑިއާ ޖެނެރަލް ޒަކަރިއްޔާ މަންސޫރު ދެއްކެވި ވާހަކަފުޅުގައިވަނީ ޓެރަރިޒަމްއާއި ހަރުކަށިފިކުރު ހުއްޓުވުމަށް އެ ސެންޓަރުން ކުރާ މަސައްކަތްތަކުގެ މައްޗަށް އަލިއަޅުއްވާލައްވައި ވާހަކަފުޅު ދައްކަވާފައެވެ.
ހަތަރު ދުވަހުގެ މުއްދަތަށް ކުރިއަށްގެންދާ މި މަސައްކަތު ބައްދަލުވުމުގެ ހުރިހާ ސެޝަންތަކެއްވެސް ނަންގަވައިދެއްވާނީ ނާއިފް ޢަރަބް ޔުނިވަރސިޓީގެ ފަންނީ މާހިރުންނެވެ. މި މަސައްކަތު ބައްދަލުވުމުގެ އިތުރުން، ދިވެހިރާއްޖޭގެ އިސްލާމީ ޔުނިވަރސިޓީ އާއި މި ސެންޓަރ ގުޅިގެން ބާއްވާ އޯޕަން ފޯރަމެއް ހޯމަ ދުވަހުގެ ރޭ އޮންނާނެކަމަށް ނެޝަނަލް ކައުންޓަރ ޓެރަރިޒަމް ސެންޓަރުން ވިދާޅުވެއެވެ. ނާއިފް ޢަރަބް ޔުނިވަރސިޓީއާއި ގުޅިގެން 2019ވަނަ އަހަރުވެސް ރާއްޖޭގެ ކައުންޓަރ ޓެރަރިޒަމް ސެންޓަރުން ވަނީ މިފަދަ މަސައްކަތު ބައްދަލުވުމެއް ބާއްވާފައެވެ.