އިންގްލިޝް ޕްރިމިއަރ ލީގުގައި މެންޗެސްޓަރ ޔުނައިޓެޑާއި އެވަޓަން ބައްދަލުކުރިމެޗް އެއްވަރުވެގެން ނިމިއްޖެއެވެ. ޔުނައިޓެޑްގެ ދަނޑުގައި ކުޅުނު މިމެޗް އެއްވަރުވީ އެއްލަނޑު އެއްލަނޑުންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ޔުނައިޓެޑެވެ. މިމެޗްގެ ފުރަތަމަ ލަނޑު ފުރަތަމަ ހާފް ނިމެން 2 މިނެޓަށް ވެފައިވަނިކޮށް ޖަހައިދިނީ ބްރޫނޯ ފެނާންޑޭޒްގެ ޕާހަކުން އެންތަނީ މާޝަލްއެވެ. ނަމަވެސް ދެވަނަ ހާފްގައި އެވަޓަންއިން އެޓީމްގެ ކުޅުން ރަނގަޅުކޮށް ޔުނައިޓެޑްގެ ގޯލަށް އިތުރަށް ނުރައްކާ ކުރަން ފެށިއެވެ. ނަތީޖާއަކަށް ވީ މެޗްގެ 65 ވަނަ މިނެޓްގައި އެވަޓަންގެ އެންޑްރޯސް ޓައުންސެންޑް ލަނޑެއް ޖަހައި މެޗްގެ ނަތީޖާ ހަމަހަމަކުރުމެވެ. މިމެޗްގެ ކުޅުން ނިމެން 4 މިނެޓަށް ވެފައިވަނިކޮށް އެވަޓަންއިން ލަނޑެއް ކާމިޔާބު ކުރި ނަމަވެސް ވިއޭއާރުން ބެލުމަށްފަހު ވަނީ އެއީ އޮފްސައިޑް ލަނޑެއް ކަމަށް ނިންމާފައެވެ.
މިނަތީޖާގެ ސަބަބުން ޔުނައިޓެޑް މިހާރު އުޅެނީ ކުޅުނު 7 މެޗުން ލިބިފައިވާ 14 ޕޮއިންޓާއެކު ތާވަލްގެ ތިންވަނައިގައެވެ. އަދި އެވަޓަންއަށް ވެސް ޔުނައިޓަޑެކޭ އެއްގޮތަށް 7 މެޗުން 14 ޕޮއިންޓް ލިބިފައިވި ނަމަވެސް ޖަހާފައިވާ ލަނޑަށް ބަލާއިރު ލިބެނީ ތާވަލްގެ ހަތަރުވަނައެވެ.