އިންގްލިޝް ޕްރިމިއަރ ލީގުގެ މެންޗެސްޓަރ ޔުނައިޓެޑަށް ކުޅެމުންދާ މާކަސް ރަޝްފޯޑް އެޓީމްގެ ފަރިތަކުރުންތަކުގައި ބައިވެރިވާން ފަށައިފިއެވެ. ޔޫރޯ 2020 ގެ ފައިނަލްގައި ބަދަލު ކުޅުންތެރިއެއްގެ ގޮތުގައި ކުޅެން އެރިފަހުން މިހާތަނަށް ރަޝްފަޑް ކުޅެފައެއް ނުވެއެވެ. އަދި ސީޒަން ފަށަން ވަރަށް ގާތްވެފައިވަނިކޮށް ރަޝްފޯޑް ވަނީ އޭނާގެ ކޮނޑު ހުޅަށް ލިބިފައިވި އަނިޔާއަކާއި ގުޅިގެން އޮޕަރޭޝަނެއް ކޮށްފައެވެ.
ޔުނައިޓެޑްގެ ކޯޗް އޮލޭގަނަރ ސޯލްޝެއާ ބުނީ ރަޝްފަޑް އިއްޔެ ފަރިތަކުރުންތަކުގައި ފުރިހަމައަށް ބައިވެރިވެފައިވާކަމަށެވެ. އަދި ފަރިތަކުރުންތަކުގައި އޭނާއަށް ބައެއް ކުޅުންތެރިންގެ ފަރާތުން ޓެކްލް ކުރިތަންވެސް ފެނިގެން ދިޔަ ކަމަށާއި ނަމަވެސް އޭނާ ފެނުނީ ރަނގަޅުކޮށް ކަމަށް ސޯލްޝެއަރ ބުންޏެވެ. މިއަދު އެވަޓަން އާއި ދެކޮޅަށް ކުޅޭ މެޗްގެ ކުރިން ވާހަކަ ދައްކަމުން ސޯލްޝެއާ ވަނީ މެޗްތަކުގެ ޝޭޑިއުލް ރޭވިފައިވާ ގޮތާމެދު ކަންބޮޑުވުން ފާޅުކޮށްފައެވެ.
މިގޮތުން މިދިޔަ ބުދަދުވަހު ވިޔަރެއާލް އާއި ޗެމްޕިއަންސް ލީގުގައި ވާދަކުރުމަށްފަހު 72 ގަޑިއިރު ނުވަނީސް އަލުން ލީގުގައި ކުޅެން ޖެހޭއިރު އަންގާރަ ދުވަހު ޗެމްޕިއަންސް ލީގުގައި ވާދަކުރި މެންޗެސްޓަރ ސިޓީ އާއި ލިވަޕޫލް މާދަމާ ރޭ ލީގުގައި މެޗް ކުޅެން ޖެހޭތީ އެކަމާ ހިތްހަމަ ނުޖެހުން ސޯލްޝާ ފާޅުކުރިއެވެ. މިއީ ވިސްނާލަން ޖެހޭ ކަންތައްތައް ކަމަށާއި ނަމަވެސް ޓީވީގެ ބޭނުމަށް މިބަދަލު ގެނެސްފައިވާ ސަބަބު ނުވިސްނޭ ކަމަށް އޭނާ ބުންޏެވެ. އަދި މިދިޔަ ސީޒަންގައިވެސް ކަން ވެފައިވަނީ އެހެން ކަމަށް އޭނާ ބުންޏެވެ.