ހުޅުމާލެ ދެވަނަ ފިޔަވަހީގައި ވަގުތީ މިސްކިތެއް އެޅުމަށް އިސްލާމިކް މިނިސްޓްރީން ބަޔަކާ ހަވާލުކޮށްފިއެވެ. މި މަސައްކަތް ހަވާލުކޮށްފަވަނީ ޔެސް މޯލްޑިވްސް ޕްރައިވެޓް ލިމިޓެޑާއެވެ.
ހިޔާ ހައުސިން ޔުނިޓްތަކާއެކު ހުޅުމާލޭ ދެވަނަ ފިޔަވައްސަށް ގިނަ އާއިލާތަކެއް މިހާރުވެސްވަނީ ދިރިއުޅުން ބަދަލުކޮށްފައެވެ. މިއާއެކު އެތަނުގައި އާއްމު ޚިދުމަތްތައް ޤާއިމުކުރުމުގެ މަސައްކަތް ސަރުކާރު ގުޅިގެންވަނީ ފަށާފައެވެ. ހުޅުމާލޭ ދެވަނަ ފިޔަވަހީގައި ހިޔާ ހައުސިން ޔުނިޓްތައް ހުރި ސަރަޙައްދުގައި ވަގުތީ މިސްކިތެއް ހެދުމުގެ މަސައްކަތްވެސް ހަވާލުކޮށްފައިވަނީ މި މަސައްކަތުގެ ދަށުންނެވެ.
އިސްލާމިކް މިނިސްޓްރީން މަޢުލޫމާތު ދޭގޮތުގައި މިމިސްކިތަކީ 450 މީހުންގެ ޖާގައިގެ މިސްކިތެކެވެ. ހައުސިން ޑިވެލޮޕްމަންޓް ކޯޕަރޭޝަން އެޗްޑީސީން ވިދާޅުވީ މިސްކިތް ހެދުމަށް ބިން ދޫކޮށްފައިވަނީ ހިޔާ ފްލެޓްތައް ކައިރިންކަމަށެވެ.
މިސްކިތުގެ މަސައްކަތް ނިންމުމަށް ހަވާލުކޮށްފަވަނީ 2 މަހާއި 20ދުވަހުންނެވެ. މިޕްރޮޖެކްޓަކީ ސަރުކާރުން 4.3 މިލިއަން ރުފިޔާ ޚަރަދުކޮށްގެން ކުރިއަށްގެންދާ މަސައްކަތެކެވެ.
ހުޅުމާލެ ދެވަނަ ފިޔަވަހީގަ އިތުރު މިސްކިތެއްގެ މަސައްކަތްވެސް މިހާރު ކުރިއަށްދެއެވެ. މި މިސްކިތަކީ އަމިއްލަ ފަރާތަކުން ހުޅުމާލޭގައި ތަރައްޤީކުރާ މިސްކިތެކެވެ. "މަސްޖިދުލް އަމީލް ޖަލީލް"ގެ މަސައްކަތް މިހާރުވަނީ ނިމުމަކާ ގާތްވެފައެވެ. މި މަސައްކަތުގައި މިވަގުތު ކުރިއަށްދަނީ ކަރަންޓާއި ފެން ގުޅުމުގެ މަސައްކަތާއި އަދި އެތެރޭގެ ބައެއް މަސައްކަތްތަކެވެ.
ފޭސް 2ގައި ބޮޑު އާބާދީއެއް ދިރިއުޅެން ފެށުމުގެ ކުރިން، އެތަނުގައި އާއްމު ޚިދުމަތްތައް ޤާއިމުކުރުމުގެ މަސައްކަތްތައް އެޗްޑީސީންވަނީ ފަށާފައެވެ. އެގޮތުން އާއްމު ދަތުރުފަތުރުގެ ނިޒާމު ލުއިފަސޭހަކޮށްދިނުމަށް، މިމަހުގެ ތެރޭގައި ދެވަނަ ފިޔަވައްސައް ބަހުގެ ޚިދުމަތް ފެށުމަށްވެސް ތައްޔާރުވެފައިވާ ކަމަށް އެޗްޑީސީން ވިދާޅުވެއެވެ. އަދި އާއްމު ޚިދުމަތްތަކުގެ ތެރެއިން ފިހާރައާއި، ބޭސް ފިހާރަ، ކްލިނިކް އަދި ސުޕަމާރޓް ފަދަ ތަންތަން ހެދުމަށްވަނީ ޖާގަ ދޫކޮށްފައެވެ.
ހިޔާ ހައުސިން ޔުނިޓްތަކުގެ އެއްބަސްވުން ޤާއިމުކޮށް ގެތަކުގެ ތަޅުދަނޑި ހަވާލުކުރުމާއެކު ގިނަ އާއިލާތަކެއް މިހާރުވަނީ ހިޔާ ހައުސިން ޔުނިޓްތަކަށް ދިރިއުޅުން ބަދަލުކޮށްފައެވެ.