އެއްބަސްވެފައިވާ ގޮތަށް ހިނގަމުން މިދާ ރިޔާސީ ދައުރު ނިމެންދެން ސަރުކާރާއެކު ޖުމްހޫރީ ޕާޓީ ދެމިއޮންނާނެ ކަމަށް ޖުމްހޫރީ ޕާޓީގެ ލީޑަރު ޤާސިމް އިބްރާހީމް ވިދާޅުވެއްޖެއެވެ.
ޖުމްހޫރީ ޕާޓީން މިއަދު ބޭއްވި ނޫސްވެރިންގެ ބައްދަލުވުމުގައި ޤާސިމް އިބްރާހީމް ވިދާޅުވީ، އެޕާޓީން ޤަބޫލުކުރަނީ 2018 ވަނަ އަހަރުގެ ރިޔާސީ އިންތިޚާބު ކާމިޔާބިކުރުމަށް ކުރެވުނު މަސައްކަތުގެ ތެރެއިން އެއްބަސްވި ގޮތަށް ސަރުކާރުގެ ތެރެއިން ކޯލިޝަންގެ ބައިވެރިންނަށް ފުރުސަތު ލިބިގެންދިއުމަށް ކަމަށެވެ. ރާއްޖޭގެ މިހާރުގެ ހާލަތަށް އިޝާރާތްކުރައްވައި ޤާސިމް ވިދާޅުވީ ޤައުމަށް ކުރިމަތިވެފައިވާ މި ދަތި ދަނޑިވަޅުގައި ސަރުކާރަށް އެއްބާރުލުންދީގެން އިޚްލާސްތެރިކަމާއެކު ޖުމްހޫރީ ޕާޓީން މަސައްކަތްކުރަމުން ގެންދާނެކަމަށެވެ.
ޖުމްހޫރީ ޕާޓީއަށްވުރެ ޑިމޮކްރެޓިކް އުސޫލުން ހިންގާ ޕާޓީއެއްނެތްކަމަށް ވިދާޅުވަމުން ޤާސިމް ވިދާޅުވީ ކުރިން ހެދި ކޯލިޝަންތައް ރޫޅިގެންދިޔައީ ޖުމްހޫރީ ޕާޓީގެ އެއްވެސް މައްސަލައެއް އޮވެގެންނޫންކަމަށެވެ.
"އަޅުގަނޑުމެންގެ އެއްބަސްވުން އޮތީ މި 5 އަހަރު ދުވަހަށް. 5 އަހަރުގެ އެއްބަސްވުމެއްގައި އަޅުގަނޑުމެން މިތިބީ. އެއްބަސްވުމާ އެއްގޮތަށް ކަންތައްތައް ދިޔައަސް އަދި ނުދިޔަސް އެ ނުދާކަމަށް ބަލައިގެން ނޫން އަޅުގަނޑުމެން މިތިބީ. ހެޔޮހިތުން އެކަން ބަލައިގެން މިތިބީ، އިޚްލާސްތެރިކަމާއެކު ޤައުމު ހަމނުޖެހުމުގެ ތެރެއަށް ވައްޓާނުލައި އަޅުގަނޑުމެންނަށް ވެވެން އޮތް އެންމެ ރަނގަޅަށް ސަރުކާރަށް އެހީތެރިވަމުން މިދަނީ" ޤާސިމް ވިދާޅުވިއެވެ.
ކުރިއަށް އޮތް ރިޔާސީ އިންތިޚާބުގައި ވާދަކުރާނަންތޯ އަދި ރައީސް ޞާލިޙް ދެވަނަ ދަޢުރަކަށް ކުރިމަތިލައްވާނަމަ އެމަނިކުފާނަށް ޖޭޕީން ތާޢީދުކުރާނަންތޯ ސުވާލުކުރުމުން ޤާސިމް ވިދާޅުވީ އެމަނިކުފާނު ރިޔާސީ އިންތިޚާބުގައި ވާދަކުރެއްވުމާމެދު ގޮތެއް ނިންމަން އަދި މާއަވަސްކަމަށެވެ. އަދި ރައީސް ޞާލިޙްއާއެކު 2023 ގައި ކުރިއަށްދާނެތޯ ނުވަތަ ނޫންތޯ ނިންމާނީ އެޕާޓީގެ ކައުންސިލުން އެކަމަށް ބާއްވަންޖެހޭ ބައްދަލުވުންތަކުން ފާސްވެއްޖެނަމަކަމަށެވެ.
ނޫސްވެރިންގެ މިބައްދަލުވުމުގައި ޤާސިމް ވަނީ ޖުމްހޫރީ ޕާޓީގެ މެންބަރުންގެ ގޮތުގައި ތިއްބެވުމަށްފަހު ދާދިފަހުން ސިޔާސީ ޕާޓީއެއް ހައްދަވައިގެން މަސައްކަތް ކުރައްވަމުން ގެންދަވާ ދަނގެތި ދާއިރާގެ މެންބަރު މުޙައްމަދު ނާޒިމާއި ތިމަރަފުށީ ދާއިރާގެ މެންބަރު އަބްދުﷲ ރިޔާޒަށް ވަރަށް ބޮޑަށް ފާޑުވިދާޅުވެ ވާހަކަފުޅުދައްކަވާފައެވެ. އަމިއްލައަށް އެދިގެން ޖުމްހޫރީ ޕާޓީއަށް ވަނުމަށްފަހު ޕާޓީގެ ޓިކެޓުގައި މަޖިލީހަށް ހޮވިވަޑައިގެންނެވުމުން ޕާޓީންވަކިވެ އެޕާޓީގެ ސިޔާސީ މުސްތަގުބަލާ ގުޅޭގޮތުން ވާހަދައްކަވާ ކަމަށް ވިދާޅުވެ ޤާސިމްވަނީ ނުރަސްމީކޮށް ބަހުގެ ހަމަލާތަކެއްވެސް ރައްދުކޮށްފައެވެ.
"މިހާރު އެބޭފުޅުން ހޮވިވަޑައިގެންތިބި ރައްޔިތުންގެ މަޖިލީހުގެ ދާއިރާތަކަށް ހޮވިފައިތިބީ އެބޭފުޅުން އަމިއްލަފުޅު ގޮތުންތޯ މިސުވާލުކޮށްލަމާ ހިނގާ. ބަލާލާއިރު ކޮންމެ ބޭފުޅަކަށް ހަތަރު ފަސް މިލިޔަން ރުފިޔާ ޚަރަދުކޮށްގެން، އަޅުގަނޑުގެ އަމިއްލަ އުޅަނދުފަހަރުގައި އެތައް ބައިވަރު ދަތުރެއްކޮށްދީގެން އެމީހުން ހޮވައިދިނީމަ، މިފަދަ ރީތިކޮށް ކަންތައް ކުރީމަ ކަންތައް ކުރިގޮތް ބައްލަވާ" ޖޭޕީގެ ލީޑަރު ވިދާޅުވިއެވެ.
ޤާސިމް ވިދާޅުވީ އެމަނިކުފާނު ހުންނެވީ އެޕާޓީގެ މެންބަރުންގެ ގޮތުގައި ތިބި މެންބަރުންނަށް ނުހަނު އިތުބާރު ކޮށްގެންކަމަށާއި ނަމަވެސް އެމަނިކުފާނާއި ދޭތެރޭ ވަރަށް ނިކަމެތިކޮށް ބަސް ބުނާކަން ފާހަގަކުރެވޭކަމަށެވެ. ނަމަވެސް އެކަންކަމާއި ކަންބޮޑުވެ ދެރަނުވާކަމަށްވެސް އޭނާ ވިދާޅުވިއެވެ.