އިންގްލިޝް ޕްރިމިއަރ ލީގުގައި ލިވަޕޫލާއި ލީޑްސް ޔުނައިޓެޑް ބައްދަލުކުރިމެޗް ލިވަޕޫލް ކާމިޔާބުކޮށްފިއެވެ. ލީޑްސްގެ ދަނޑުގައި ކުޅުނު މިމެޗް ލިވަޕޫލް ކާމިޔާބުކުރީ ހީކުރި ވަރަށް ވުރެ ފަސޭހަ ކަމާއެކު 3 ލަނޑު ސުންލަނޑުންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ލިވަޕޫލެވެ. މިމެޗްގެ ފުރަތަމަ ލަނޑު މެޗްގެ 20 ވަނަ މިނެޓްގައި ޖަހާފައިވަނީ މުހަންމަދު ސަލާއެވެ. މިއީ ސަލާ ޕްރިމިއަރ ލީގުގައި ކާމިޔާބުކުރި 100 ވަނަ ލަނޑެވެ. ސަލާ 100 ލަނޑު ޖަހާފައިމިވަނީ 161 މެޗުންނެވެ. އަދި އެޓީމްގެ ދެވަނަ ލަނޑު މެޗްގެ 50 ވަނަ މިނެޓްގައި ޖަހާދިނީ ފަބީނިއޯއެވެ. މިމެޗްގެ 60 ވަނަ މިނެޓްގައި ލީޑްސްގެ ޕަސްކާލް ސްޓްރުއިކް ލިވަޕޫލްގެ ހާވީ އެލިއަޓްއަށް ކުރި ނުރައްކާތެރި ފައުލް އަކާއި ގުޅިގެންވަނީ ރަތް ކާޑު ދައްކާފައެވެ. މިފައުލް އާއި ގުޅިގެން އެލިއޮޓްގެ ފައިތިލަ ވަނީ ހުޅުން ނެއްޓިފައެވެ. މިމެޗްގައި ލިވަޕޫލްގެ ތިންވަނަ ލަނޑު މެޗްގެ އިތުރު ވަގުތުގައި ޖަހާދިނީ ސާޑިއޯ މާނޭއެވެ. މިމެޗްގައި ލީޑްސްއަށް ލަނޑެއް ނުޖެހުނު ނަމަވެސް އެޓީމުންވެސް ވަނީ ދޭތެރެ ދޭތެރެއިން ހަމަލާ އުފައްދާފައެވެ.
މިކާމިޔާބީއާއެކު ލިވަޕޫލް މިވަނީ ކުޅުނު ހަތަރު މެޗުން ލިބިފައިވާ 10 ޕޮއިންޓާއެކު ތާވަލްގެ ތިންވަނައަށް އަރާފައެވެ. އެއީ އެއްވަނައިގާ އުޅޭ މެންޗެސްޓަރ ޔުނައިޓެޑާއި ޕޮއިންޓްގެ ގޮތުން ހަމަވި ނަމަވެސް ޖަހާފައިވާ ލަނޑަށް ބަލާއިރު ޔުނައިޓެއަށް ކުރި ލިބޭތީއެވެ. ލީޑްސްއަށް ބަލާލައިރު މިއީ 1958-59 ވަނަ ސީޒަނަށް ފަހު އެޓީމް ކުޅުނު ފުރަތަމަ ހަތަރުމެޗުގެ ތެރެއިން މެޗަކުން މޮޅު ނުވެވުނު ފުރަތަމަ ފަހަރެވެ. އެޓީމަށް 4 މެޗުން ލިބިފައިވާ 2 ޕޮއިންޓާއެކު ކުޅެނީ ތާވަލްގެ 17 ވަނައިގައެވެ.