ވާރލްޑް ކަޕް ކޮލިފައިން ޔޫރަޕް ސަރަހައްދުގެ ގްރޫޕް އައި ގައި އިންގްލަންޑާއި އެންޑޯރާ ބައްދަލުކުރިމެޗް އިންގްލަންޑް ކާމިޔާބުކޮށްފިއެވެ. ލަންޑަންގެ ވެމްބްލީ ސްޓޭޑިއަމްގައި ކުޅުނު މިމެޗް އިންގްލަންޑް ކާމިޔާބުކުރީ 4 ލަނޑު ސުންލަނޑުންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނަ އިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ އިންގްލަންޑެވެ. އެންމެފަހުން ހަންގޭރީ އާއި ބައްދަލުކުރިމެޗްގައި ބޭނުން ކުރި ކުޅުންތެރިން އެއްކޮށް ބަދަލުކޮށްގެން ފެށި މިމެޗްގައި އިންގްލަންޑްގެ ފުރަތަމަ ލަނޑު މެޗްގެ 18 ވަނަ މިނެޓްގައި ޖަހައިދިނީ ޖެސީ ލިންގާޑްއެވެ. މިމެޗްގައި އިންގްލަންޑަށް ދެވަނަ ލަނޑެއް ކާމިޔާބު ކުރެވުނީ މެޗްގެ 72 ވަނަ މިނެޓްގައި ލިބުނު ޕެނަލްޓީއަކުންނެވެ. މިލަނޑު އެޓީމަށް ކާމިޔާބުކޮށްދިނީ ރޭގެ މެޗްގައި ބަދަލު ކުޅުންތެރިއެއްގެ ގޮތުގައި ދެވަނަ ހާފްގައި ކުޅެން އެރި އެޓީމުގެ ކެޕްޓަން ހެރީ ކޭންއެވެ. މިއީ އޭނާ އިންގްލަންޑް ޓީމަށް ކާމިޔާބުކޮށްދިން 40 ވަނަ ލަނޑެވެ. އަދި މިލަނދު ޖެހިތާ 5 މިނެޓް ފަހުން އިންގްލަންޑްގެ ތިންވަނަ ލަނޑު ޖަހައިދިނީ ފުރަތަމަ ލަނޑުވެސް ޖަހައިދިން ލިންގާޑްއެވެ. އަދި ފަހު ލަނޑު މެޗްގެ 85 ވަނަ މިނެޓްގައި ޖަހައިދިނީ އިއްޔެ 20 ވަނަ އުފަންދުވަސް ފާހަގަ ކުރަމުންދިޔަ ބުކާޔޯ ސާކާއެވެ.
މިކާމިޔާބީއާއެކު އިންގްލަންޑް މިހާރު މިވަނީ ވާރލްޑް ކަޕް ކޮލިފައިންގައި މިހާތަނަށް ކުޅުނު ފަސް މެޗްވެސް ކާމިޔާބުކޮށް ލިބިފައިވާ 15 ޕޮއިންޓާއެކު ތާވަލްގެ އެއްވަނައިގައެވެ. އަދި އެންޑޯރާ އުޅެނީ ފަސް މެޗުން ލިބިފައިވާ 3 ޕޮއިންޓާއެކު ތާވަލްގެ ފަސްވަނައިގައެވެ.