ފޯމިއުލަރ ވަން ކާރު ރޭސް ސީޒަންގައި ހިމެނޭ ޑަޗް ގްރޯން ޕްރީ ރެޑް ބުލްގެ މެކްސް ވަރސްޓަޕެން ކާމިޔާބުކޮށްފިއެވެ. މިރޭސް ވަރސްޓަޕެން ކާމިޔާބުކުރީ މަރސިޑީޒްގެ ވާދަވެރި ލުއިސް ހެމިލްޓަން ފަހަތަށް ޖައްސާލުމަށްފަހުއެވެ.
ނެދަލަންޑްސްއަށް ނިސްބަތްވާ ވަރސްޓަޕެން އަމިއްލަ ޤައުމުގެ ސަޕޯޓަރުން ކުރިމަތީ މިކާމިޔާބީ ހޯދީ ރޭސް ފެށުނީއްސުރެ ލީޑުގައި އޮވެ ރޭސް ނިންމާލައިގެންނެވެ. މިރޭހުން ދެވަނައަށް ދިޔައީ ހެމިލްޓަންއެވެ. އަދި ތިންވަނަ ލިބުނީ މަރސިޑީޒްގެ ޑްރައިވަރ ވެލްޓަރީ ބޮޓާސްއަށެވެ. މިރޭހުން ހަތަރުވަނަ އަލްފާ ޓައުރީގެ ޕިއޭ ގަސްލީ އަށް ލިބުނު އިރު ފަސްވަނައަށް ދިޔައީ ފެރާރީގެ ޑްރައިވަރ ޗާލްސް ލެކްލާރކްއެވެ. ނަމަވެސް އެންމެ އަވަހަށް އެއް ލެޕް ފުރިހަމަ ކުރި ޑްރައިވަރަށް ލިބޭ ޕޮއިންޓް ވަނީ ހެމިލްޓަން ހޯދާފައެވެ.
މިކާމިޔާބީއާއެކު ވަރސްޓަޕެން ވަނީ މިހާތަނަށް ހަތް ރޭސް ކާމިޔާބުކޮށް ޕޮއިންޓް ތާވަލްގައި ވެސް ލީޑު އަލުން ނަގާފައެވެ. މިގޮތުން ވަރސްޓަޕެންއަށް ލިހާރު 224.5 ޕޮއިންޓް ލިބިފައިވާއިރު ހެމިލްޓަންއަށް ލިބިފައިވަނީ 221.5 ޕޮއިންޓެވެ. އަދި ތިންވަނައިގައި އުޅޭ ބޮޓަސްއަށް ލިބިފައިވަނީ 123 ޕޮއިންޓެވެ. ކޮންސްޓްރަކްޓަރސް ތާވަލަށް ބަލާލާއިރު އެއްވަނައިގައި އުޅެނީ 344.5 ޕޮއިންޓާއެކު މަރސިޑީޒްއެވެ. އަދި ރެޑް ބުލް ދެވަނައިގައި އުޅެނީ 332.5 ޕޮއިންޓާއެކުއެވެ. އަދި ތިންވަނައިގައި އުޅޭ ފެރާރީ އަށް ލިބިފައިވަނީ 181.5 ޕޮއިންޓެވެ.