އަހަރުގެ ހުރިހާ ގްރޭން ސްލޭމް މުބާރާތެއް ކާމިޔާބު ކުރުމުގެ އުންމީދުގައި މަސައްކަޔް ކުރަމުންދާ ދުނިޔޭގައި އެއްވަނައަށް ރޭންކް ކުރެވިފައިވާ ސަރބިއާގެ ނޯވަކް ޖޯކޮވިޗް ޔޫއެސް އޯޕަންގެ ހަތަރުވަނަ ބުރުން ޖާގަހޯދައިފިއެވެ. އޭނާ ހަތަރުވަނަ ބުރުން ޖާގަހޯދީ ތިންވަނަ ބުރުގައި ޖަޕާންގެ ކެއި ނިޝިކޯރީ ބަލިކުރުމަށްފަހުއެވެ.
ފޯރިގަދަ ކުޅުމެއް ފެނިގެންދިޔަ މިމެޗް ޖޯކޮވިޗް ކާމިޔާބުކުރީ ފަހަތުން އަރާ 3 ސެޓް އެއް ސެޓުންނެވެ. އެއީ ފުރަތަމަ ސެޓް ނިޝިކޯރީ ހައެއް ހަތަކުން ކާމިޔާބު ކޮށްފައިވަނިކޮށް ދެން ކުޅުނު ތިން ސެޓް ހައެއް ތިނެއް، ހައެއް ތިނެއް އަދި ހައެއް ދެއަކުން ކާމިޔާބުކޮށްގެންނެވެ. މިފަހަރުގެ ޔޫއެސް މުބާރާތް ކާމިޔާބު ކުރެވިއްޖެ ނަމަ ޖޯކޮވިޗާށް ގްރޭން ސްލޭމް 21 މުބާރާތް ކާމިޔާބުކުރެވި އާ ރިކޯޑެއް ގާއިމް ކުރެވިގެން ދާނެއެވެ. ހަތަރުވަނަ ބުރުގައި ޖޯކޮވިޗަށް ބައްދަލުކުރަން ޖެހެނީ އެމެރިކާގެ ޖެންސެން ބްރޫކްސްބީއާއެވެ.
ބްރީކްސްބީ ހަތަރު ވަނަ ބުރުން ޖާގަހޯދީ ތިންވަނަ ބުރުގައި 21 ވަނައަށް ސީޑް ކުރެވިފައިވާ ރަޝިޔާގެ އަސްލާން ކަރަޓްސޭވް އާއި ބައްދަލުކުރިމެޗް 3 ސެޓް 2 ސެޓުން ކާމިޔާބުކޮށްގެންނެވެ. އެއީ ހައެއް ދޭއް، ތިނެއް ހައެއް، ދޭއް ހައެއް، ހައެއް ތިނެއް އަދި ހައެއް ތިނަކުންނެވެ.
އެހެން މެޗްތަކަށް ބަލާލާއިރު ކޮލިފައިންގ ކުޅެގެން މިމުބާރާތުން ޖާގަހޯދި ޖަރުމަނުވިލާތުގެ އޮސްކަރ އޮޓަރ ވަނީ ގްރޭން ސްލޭމް މުބާރާތެއްގެ ހަތަރު ވަނަ ބުރުން ފުރަތަމަ ފަހަރަށް ޖާގަހޯދާފައެވެ. އެއީ ތިންވަނަ ބުރުގައި އިޓަލީވިލާތުގެ އަންޑްރެއާ ސެއްޕީ އާއި ބައްދަލުކުރިމެޗް 3 ސެޓް އެއް ސެޓުން ކާމިޔާބުކޮށްގެންނެވެ. އެއީ ހައެއް ތިނެއް، ހައެއް ހަތަރެއް، ދޭއް ހައެއް އަދި ހަތެއް ފަހަކުން މެޗް ކާމިޔާބުކޮށްގެންނެވެ. ހަތަރު ވަނަ ބުރުގައި އޭނާ ވާދަކުރާނީ އިޓަލީވިލާތުގެ މަޓިއޯ ބެރެޓިނީއާއެވެ. ބެރެޓިނީ ހަތަރުވަނަ ބުރުން ޖާގަހޯދީ ބެލަރޫސްގެ އިލްޔާ އިވަޝްކާ އާއި ބައްދަލުކުރިމެޗް 3 ސެޓް 2 ސެޓުން ކާމިޔާބުކޮށްގެންނެވެ. ހަމައެއާއެކު 13 ވަނަ އަށް ސީޑް ކުރެވިފައިވާ އިޓަލީވިލާތުގެ ޔަނިކް ސިނަރ ހަތަރުވަނަ ބުރުން ޖާގަހޯދީ ތިންވަނަ ބުރުގައި ގައިލް މޮންފީސް 3 ސެޓް 2 ސެޓުން މެޗް ކާމިޔާބުކޮށްގެންނެވެ.