އެންމެ ގިނަ މީހުން ވެކްސިންގެ ޑޯސްތައް ފުރިހަމަކުރި ޤައުމަކަށް ސިންގަޕޫރު

އާބާދީގެ ނިޞްބަތުން އެންމެ ގިނަ މީހުން ކޯވިޑް-19ގެ ވެކްސިންގެ ޑޯސްތައް ފުރިހަމަކުރި ޤައުމަކަށް ސިންގަޕޫރުވެއްޖެއެވެ.

ސިންގަޕޫރުގެ ޞިއްޙަތާބެހޭ ވުޒާރާއިން ބުނެފައިވަނީ އެ ޤައުމުގެ 80 އިންސައްތަ މީހުންވަނީ ކޯވިޑް-19ގެ ވެކްސިން ފުރިހަމަކޮށްފައިކަމަށެވެ. އަދި އެއާއެކު ކޯވިޑް-19އިން ރައްކާތެރިވުމަށް އަޅާފައިވާ ފިޔަވަޅުތަކަށް އިތުރު ލުއިތަކެއް ދެވޭނެކަމަށް އެ ވުޒާރާއިންވަނީ ބުނެފައެވެ.

ސިންގަޕޫރުގައި ކޯވިޑް-19 ޖެހިފައިވަނީ 67,171 މީހުންނަށެވެ. އޭގެ ތެރޭގައި ފާއިތުވި 24 ގަޑިއިރުގެ ތެރޭގައި ބަލިޖެހުނު 243 މީހުން ހިމެނެއެވެ. ބަލިމަޑުކަމުގައި އެ ޤައުމުންވަނީ 55 މީހުން މަރުވެފައެވެ.

ސިންގަޕޫރަށްފަހު އާބާދީގެ ނިޞްބަތުން އެންމެ ގިނަ މީހުން ވެކްސިން ޖަހުމުގެ މަރުޙަލާތައް ފުރިހަމަކޮށްފައިވާ ޤައުމުތަކުގެ ތެރޭގައި ޔޫއޭއީއާއި ޤަޠަރު ހިމެނެއެވެ.