ފާއިތުވި 20 އަހަރުދުވަހު އަފްޣާނިސްތާނުގައި ޙަރަކާތްތެރިވި އެމެރިކާއާއި ހުޅަނގުގެ އަސްކަރީ އިއްތިޙާދުގެ ފައުޖުތައް އެ ޤައުމުން ފޭބުމުގެ އެންމެ ފަހު މަރުޙަލާތައް ފަށައިފިއެވެ. އަފްޣާނިސްތާނުގައި ޙަރަކާތްތެރިވާ ބޭރުގެ ފައުޖުތައް އެ ޤައުމުން ފޭބުމަށް ކަނޑައަޅާފައިވާ އެންމެ ފަހު ތާރީޚަކީ އޮގަސްޓު މަހުގެ 31ވަނަ ދުވަހެވެ.
އެމެރިކާގެ އަސްކަރިއްޔާއިން ބުނެފައިވާ ގޮތުގައި އަފްޣާނިސްތާނުގެ ކާބުލްގެ ބައިނަލްއަޤްވާމީ ވައިގެ ބަނދަރުން ގެންދިޔުމަށް ބާކީ މިހާރު ތިބީ އެ ޤައުމުގެ 1،000 މީހުންކަމަށެވެ. އޭގެ ތެރޭގައި ގިނައީ އެމެރިކާގެ ޚާރިޖީ ވުޒާރާގެ މުވައްޒަފުންނެވެ. އޭގެ އިތުރުން އިނގިރޭސިވިލާތުން ބުނެފައިވަނީ އެ ޤައުމުގެ ހުރިހާ ފައުޖުތަކެއް އަފްޣާނިސްތާނުން ފައިބާފައިވާކަމަށެވެ. އެ ޤައުމުގެ އިތުރުން ޖަރުމަންވިލާތާއި އިޓަލީވިލާތާއި ފަރަންސޭސިވިލާތުގެ ފައުޖުތައްވެސްވަނީ މީގެ ކުރިން އަފްޣާނިސްތާނުން ފައިބައިފައެވެ.
އަފްޣާނިސްތާނުގައި ވެރިކަންކުރާ ޠާލިބާނުން ބުނެފައިވަނީ ބޭރުގެ ފައުޖުތައް އެ ޤައުމުން ދިޔުމުން ކާބުލްގެ ވައިގެ ބަނދަރާ އެ ޖަމާޢަތުން ޙަވާލުވާނެކަމަށެވެ. ޠާލިބާނުންވަނީ ވައިގެ ބަނދަރު ހިންގުމަށް ތުރުކީވިލާތުގެ ހުޅަހެޅުން ބަލައިނުގަތުމަށްފަހު ނުރަސްމީކޮށް ވައިވެ ބަނދަރާ ޙަވާލުވުމަށް ތުރުކީވިލާތުގެ ސަރުކާރުގައި އެދިފައެވެ. ނަމަވެސް ބެލެވޭ ގޮތުގައި ތުރުކީވިލާތުގެ ސިފައިން ވައިގެ ބަނދަރުގައި ޙަރަކާތްތެރިވުމަށް ޠާލިބާނުން ޙުއްދައެއް ނުދޭނެއެވެ.
ޠާލިބާނުންގެ ހުށަހެޅުމަށް ތުރުކީވިލާތުން ވަކި ގޮތެއް ނިންމާފައެއް ނުވެއެވެ. މީގެ ކުރިން ޠާލިބާނުން ބުނެފައިވަނީ ތުރުކީވިލާތުގެ ފައުޖުތައް އަފްޣާނިސްތާނުގައި ޙަރަކާތްތެރިވެފައިވަނީ ނޭޓޯގެ ފައުޖުތަކާއެކުކަމަށާއި އެ ޤައުމުގެ ސިފައިންވެސް އަފްޣާނިސްތާނުން ފައިބަންޖެހޭނެކަމަށެވެ. އެއާއެކު ތުރުކީވިލާތުންވަނީ ކާބުލްގެ ވައިގެ ބަނދަރާ ޙަވާލުވުމުގެ ވިސްނުން ދޫކޮށްލައިފައެވެ.
އޮގަސްޓު މަހުގެ 15ވަނަ ދުވަހު ޠާލިބާން ޖަމާޢަތުގެ ބާރުގެ ދަށަށް އަފްޣާނިސްތާން ގެނައުމުން އެ ޤައުމު ދޫކޮށް ދާން ބޭނުންވާ އެތައް ހާސް ޢާންމުންވަނީ ކާބުލްގެ ބައިނަލްއަޤްވާމީ ވައިގެ ބަނދަރު ހުންނަ ސަރަޙައްދަށް ޖަމާވެފައެވެ. އަދި އެމެރިކާއާއި ނޭޓޯގެ އަސްކަރީ މަތިންދާބޯޓުތަކުގައި ފާއިތުވި ދެ ހަފުތާގެ ތެރޭގައި 113،500އަށްވުރެ ގިނަ މީހުންވަނީ އަފްޣާނިސްތާނުން ބޭރަށް ގެންގޮސްފައެވެ. ނަމަވެސް ބޭރުގެ ފައުޖުތައް އަފްޣާނިސްތާނުން ފައިބަންޖެހޭ މުޙްލަތު ކުރިޔަށް އޮތް މަދު ގަޑިއިރުތަކުގެ ތެރޭގައި ހަމަވުމުގެ ކުރިން އެ ޤައުމުން ދާން ބޭނުންވާ ހުރިހާ އެންމެން ނުގެންދެވޭނެކަމަށް އެމެރިކާއާއި ނޭޓޯއިންވަނީ ބުނެފައެވެ. ޠާލިބާނުން ބުނެފައިވަނީ އޮގަސްޓު 31ވަނަ ދުވަހުގެ ފަހުންވެސް އަފްޣާނިސްތާން ދޫކޮށްދާން ބޭނުންވާ މީހުން ލިޔެކުންތައް ހަމަކޮށްގެން ޢާންމު ދަތުރުފަތުރުގެ ނިޒާމުގެ ތެރެއިން ޤައުމުން ބޭރަށް ދިޔުމުގެ ފުރުޞަތު އޮންނާނެކަމަށެވެ.