ކޯވިޑް ޖެހިގެން 49އަހަރުގެ ދިވެއްސަކު ނިޔާވެއްޖެއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ވިދާޅުވީ ނިޔާވެފައިވަނީ ހުޅުމާލޭ މެޑިކަލް ފެސިލިޓީގަ ފަރުވާދެމުންދިޔަ ދިވެހި އަންހެނެއްކަމަށެވެ. މިމީހާ ނިޔާވީ ކޯވިޑަށް ފަރުވާދެމުންދަނިކޮށް މިއަދު މެންދުރު ފަހު 02:30 ހާއިރުއެވެ. މިއީ މި ބަލީގަ ރާއްޖެއިން ނިޔާވި 225ވަނަ މީހާއެވެ.
ކޯވިޑް ޖެހިގެން މިއަދު ހެނދުނުވަނީ އައްޑޫގައިވެސް މީހަކު ނިޔާވެފައެވެ. ހެނދުނު 07:30ހާއިރު ނިޔާވެފަވަނީ އުމުރުން 92އަހަރުގެ ދިވެހި އަންހެނެކެވެ. މި ދެ ދުވަސްތެރޭ ރާއްޖެއިން 3މީހުންވަނީ ބަލީގަ ނިޔާވެފައެވެ.
ކޯވިޑް ބަލި ރާއްޖޭގައި ހަލުއި ކަމާއެކު ފެތުރެން ފެށުމާ ގުޅިގެން އެޅި ރައްކާތެރިކަމުގެ ފިޔަވަޅުތަކާއެކު ކޯވިޑް ފެތުރޭ މިންވަރުވަނީ ކޮންޓްރޯލް ކުރެވިފައެވެ. އެޗްޕީއޭއިން އެންމެ ފަހުން އާއްމުކުރި ތަފާސް ހިސާބުތައް ދައްކާގޮތުން ރާއްޖެއިން މިހާތަނަށް 79959 މީހުންވަނީ ކޯވިޑަށް ޕޮޒިޓިވްވެފައެވެ. މީގެ ތެރެއިން 78076 މީހުންވަނީ ބަލިން ރަނގަޅުވެފައެވެ.