އޮޅުވާލައިގެން ފޭކް ބުކިންގ ހައްދައިގެން ރާއްޖެއަށް ފަތުރުވެރިން ގެންނަ މައްސަލަތަކެއް ބަލަމުން އަންނަކަމަށް ފުލުހުން ބުނެފިއެވެ.
އޮޅުވާލައިގެން ރާއްޖެއަށް ފަތުރުވެރިން ގެންނަ މައްސަލަތައް ގިނަވެފައިވާއިރު، ފުލުހުން ވިދާޅުވީ އެފަދަ މައްސަލަތަކެއް ފުލުހުންނަށް ހުށައަޅަފައިވާކަމަށެވެ. ނަމަވެސް އިތުރު ތަފްސީލް ފުލުހުން ނުދެއްވައެވެ.
އޮޅުވާލައިގެން ފޭކް ބުކިންގ ހައްދައިގެން ރާއްޖެއަށް ފަތުރުވެރިން ގެންނަ މައްސަލަތައް ހުއްޓުވުމަށް އިމިގްރޭޝަންގެ ސިސްޓަމަށް ބަދަލުތަކެއް ގެނައުމުގެ މަސައްކަތް ކުރަމުންދާކަމަށް މޯލްޑިވްސް އިމިގްރޭޝަނުންވެސް ވަނީ ވިދާޅުވެފައެވެ.
ފޭކް ބުކިން ހައްދައިގެން ފަތުރުވެރިން ގެނެސް ހުއްދަ ނެތް ތަންތަނުގައި ބައިތިއްބާ މައްސަލާގައި، މީހުން ދިރުއުޅޭ ރަށްރަށުގައި ޚާއްސަ އިސްޕެކްޝަނެއްވެސް ކަމާބެހޭ ފަރާތްތަކުން ވަނީ ފަށާފައެވެ. މާލެއާއި މީހުން ދިރިއުޅޭ އެހެން ރަށްރަށުގައި މި އިންސްޕެކްޝަން ކުރިއަށްގެންދަނީ މޯލްޑިވްސް ޕޮލިސް ސާރވިސްއާއި، މޯލްޑިވްސް އިމިގްރޭޝަނާއި، މިނިސްޓްރީ އޮފް ޓުއަރިޒަމާއި، މިނިސްޓްރީ އޮފް އިކޮނޮމިކް ޑިވެލޮޕްމަންޓާއި، ލޯކަލް ގަވަރމަންޓް އޮތޯރިޓީއާއި، ހެލްތު ޕްރޮޓެކްޝަން އެޖެންސީ ގުޅިގެންނެވެ.
ޓޫރިސްޓުންގެ ގޮތުގައި ގެސްޓް ހައުސްތަކަށް ބުކިންގ ހަދައިގެން ފަތުރުވެރިން ރާއްޖެ ގެނެސް، އެމީހުން އަމިއްލަ ގެތަކުގައި ބައިތިއްބައި، އުޞޫލުތަކާއި ޚިލާފުވާނަމަ އެކަންކަން ސަރުކާރުން ހުއްޓުވާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުވެސް ދާދިފަހުން ވަނީ ވިދާޅުވެފައެވެ. އަދި ކޯވިޑްގެ ނުރައްކާތެރި ޙާލަތަށްފަހު، ރާއްޖޭގެ އިޤްތިޞާދު ރަނގަޅުވެ، ރާއްޖެ އަންނަ ފަތުރުވެރިންގެ ޢަދަދު އިތުރުވާން ފެށިނަމަވެސް މިކަން ދެމެހެއްޓޭނީ އަދިވެސް ވިސްނުންތެރިކަމާއެކު މަސައްކަތްތަކެއް ކޮށްގެންކަމަށް އެމަނިކުފާނު ވިދާޅުވެފައިވެއެވެ.
ފުލުހުން ވިދާޅުވެފައިވަނީ ކޯވިޑްގެ ހާލަތާ ގުޅިގެން ރާއްޖެ އަންނަ ފަތުރުވެރިން މާލެއާއި މީހުން ދިރިއުޅޭ އެހެން ރަށްރަށުގައި ޗުއްޓީ ހޭދަކުރުމާއި ގުޅޭގޮތުން އެޗް.ޕީ.އޭއިން ކަނޑައަޅާފައިވާ އުސޫލުތަކާ އެއްގޮތަށް އަމަލުރަމުންދޭތޯ ބެލުމުގެ އިތުރުން މިކަމާއި ގުޅިގެން ބަލަންޖެހޭ ކަންކަން ބަލައި، އުޞޫލާ ޚިލާފުވާ ފަރާތްތަކާމެދު އަޅަންޖެހޭ ފިޔަވަޅުތައް އަޅަމުންދާނެކަމަށެވެ.