މުޖުތަމަޢު ބާރުވެރިކުރުމަށް ޖަމިއްޔާތަކުން ކުރިއަށްގެންދާ މަސައްކަތްތަކަށް ސަރުކާރުން އެހީވުމުގެ ގޮތުން، 15 ޖަމިއްޔާއަކަށް މާލީ އެހީދީފިއެވެ.
ސަރުކާރުގެ އެހީގައި މަދަނީ ޖަމުއިއްޔާތައް ބާރުވެރިކުރުވާ، ޖަމިއްޔާތަކުގެ މަސައްކަތް ފުޅާކުރުމަކީ ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙްގެ ވަޢުދުފުޅެކެވެ.
މި ވަޢުދުގެ ދަށުން މިނިސްޓްރީ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަމަންޓުން ހުޅުވާލީ، ޖަމިއްޔާތަކުން ކުރިއަށްގެންދިއުމަށް ބޭނުންވާ މުހިންމު ޕްރޮޖެކްޓަކަށް ސަރުކާރުގެ ފަރާތުން މާލީ އެހީދިނުމަށެވެ. ފުރުޞަތު ހުޅުވާލީ އެންމެ މަތިން ޕޮއިންޓް ލިބޭ 15 ޕްރޮޖެކްޓަކަށް މާލީ އެހީ ދިނުމަށެވެ.
މިންގަނޑުތަކަށް ބެލުމަށްފަހު މިހާރު ވަނީ އެންމެ މަތިން ޕޮއިންޓް ލިބުނު 15 ޕްރޮޖެކްޓް ކުރިއަށްގެންދިއުމަށް ޖަމުއިއްުޔާތަކާއި ފައިސާ ހަވާލުކޮށްފައެވެ. މި ޖަމުއިއްޔާތަކާއި ހަވާލުކޮށްދެއްވީ ޔޫތު މިނިސްޓްރީ ހިންގެވުމާއި ވަގުތީ ގޮތުން ހަވާލުވެ ހުންނެވި، މިނިސްޓަރ އޮފް ޓުއަރިޒަމް ޑރ.އަބްދުﷲ މަޢުސޫމްއެވެ.
އެންޖީއޯތަކަށް މާލީ އެހީ ދިނުމަށް ހުޅުވާލި ފުރުޞަތުގަ 62 ޖަމިއްޔާއަކުން ޕްރޮޕޯސަލް ހުށައެޅިއެވެ.
މާލީ އެހީ ދިނުމަށް ހޮވުނު ޕްރޮޖެކްޓްތަކުގެ ތެރޭގައި ތިމާވެއްޓާމެދު މީހުން ހޭލުންތެރިކުރުމަށް ކުރިއަށްގެންދާ ޕްރޮޖެކްޓްތަކާއި ރަށްރަށުގައި އިޖްތިމާޢީ ސަރަޙައްދުތައް ޤާއިމުކުރުމާ، މުޖުތަމަޢުއަށް ޤާނޫނީގޮތުން އެހީ ދިނުމުގެ ޕްރޮޖެކްޓްތަކާއި، ނަފްސާނީ އަދި ޖިސްމާނީ ދުޅަހެޔޮކަމަށް މަސައްކަތްކުރުމުގެ ޕްރޮޖެކްޓްތަކާ އާމްދަނީ ހޯދުމަށް ދަސްކޮށްދޭ ޕްރޮޖެކްޓްތައް ހިމެނެއެވެ.
- އެހީ ލިބުނު މަދަނީ ޖަމިއްޔާތަކަކީ:
- 1. ނަލަ ފެހި މީދޫ
- 2. ލިވް އެންޑް ލަރން އެންވަޔަރަމަންޓް މޯލްޑިވްސް
- 3. މޯލްޑިވްސް ފެމިލީ ފައުންޑޭޝަން
- 4. ހުވަދޫ އެއިޑް
- 5.ތިނަދޫ އެސޯސިއޭޝަން ފޯ ޔޫތް ޑިވެލޮޕްމަންޓް އެންޑް އެންވިރޮންމެންޓް
- 6. އިންސްޓިލް މޯލްޑިވްސް
- 7. ތިނަދޫ އެކުވެރިންގެ ރޫހު
- 8. ނައިފަރު ޖުވެނައިލް
- 9. ނަޑެއްލާ އައިލެންޑް ޑިވެލޮޕްމަންޓް ސޮސައިޓީ
- 10. ޑައިބެޓީސް ސޮސައިޓީ އޮފް މޯލްޑްވސް
- 11. ނެޓްވޯކް އޮފް ޑިވެލޮޕިން ސޮސައިޓީ
- 12. ވެށި ސާފު
- 13. ޕަބްލިކް އިންޓްރެސްޓް ލޯ ސެންޓަރ
- 14. ޖަރނީ
- 15. ކެއަރ 88 އީޕީއެސްއެސް
އެހީ ހަވާލުކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ މަޢުޞޫމް ވިދާޅުވީ ޖަމިއްޔާތަކުން ކުރާ މަސައްކަތަކީ ސަރުކާރުން ކުރިއަށްގެންދާ މަސައްކަތްތަކަށް ލިބިގެންދާ ބޮޑު އެހީއެއްކަމަށެވެ. އަދި މިފަހަރުގެ އެހީ ހަވާލުކުރި ޖަމިއްޔާތަކުގެ ޕްރޮޖެކްޓްކަކީވެސް ސަރުކާރުގެ ސިޔާސަތާ ގުޅޭ، އެރަށެއްގެ ކައުންސިލް އަދި ރައްޔިތުންނަށް އެންމެ ބޭނުންތެރި ޕްރޮޖެކްޓްތަކެއްކަމަށް މިނިސްޓަރ ވިދާޅުވިއެވެ. 15 ޖަމިއްޔާއިން ހުށައެޅި ޕްރޮޖެކްޓްތަކަށް ޖުމްލަ 2.9 މިލިއަން ރުފިޔާގެ އެހީ ސަރުކާރުން ހަވާލުކޮށްފައިވާކަމަށް މިނިސްޓަރ މަޢުޞޫމް ވިދާޅުވިއެވެ.
"މި ޖަމިއްޔާތަކަށް ލިބުނު އެހީ ހެޔޮގޮތުގައި ބޭނުންކޮށް، އެހެން ޖަމިއްޔާތަކަށް ނަމޫނާއަކަށް ވާންޖެހޭ. މުޖުތަމަޢުގެ ތަރައްޤީއާ ހަމަޖެހުމަށް ހުރަސް ނޭޅޭނެހެން، އެއްޖަމިއްޔާ އަނެއް ޖަމިއްޔާގެ މަސައްކަތްތައް ވާދަވެރިވުން މުހިންމު. އޭރުން މުޖުތަމަޢުއަށް ލިބޭ ލާބަ ބޮޑުވާނެ." މިނިސްޓަރ މަޢުސޫމް ވިދާޅުވިއެވެ.
ޖަމިއްޔާތަކުން ހުށައެޅި ޕްރޮޕޯސަލްތަކުގެ ތެރެއިން އެހީ ލިބޭ ޕްރޮޖެކްޓްތައް ކަނޑައެޅީ، އެކަމަކަމަށްޓަކާ ހޮވާލެވުނު ކޮމިޓީއަކުންނެވެ. މިނިސްޓްރީ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަމަންޓުން ވަނީ އަންނަ އަހަރުވެސް، ޖަމިއްޔާތަކަށް މި އެހީ ދިނުމަށް ނިންމާފައެވެ.